မြောက်ဦးက ရင်ဆို့(ခ)ကိုကျော်ဇံဝေကိုဖမ်းဆီးရခြင်းမှာနိုင်ငံတော်အေးချမ်းသာယာရေးကို ပျက်ပြားစေရန်ရည်ရွယ်ပြုလုပ်၍ ဖမ်းဆီးရခြင်းဟု စစ်ကောင်စီသတင်းစာများတွင်ဖော်ပြ

နိရဉ္စရာ၊ စက်တင်ဘာ ၆/၂၀၂၂

ရခိုင်ပြည်နယ်၊ မြောက်ဦးမြို့မှ ဖေ့စ်ဘုတ်ဆယ်လီ ရင်ဆို့ (ခ) ကိုကျော်ဇံဝေကို ဖမ်းဆီးရခြင်းမှာ နိုင်ငံတော်အေးချမ်းသာယာရေးကို ပျက်ပြားစေရန် ရည်ရွယ်လျက် လှုံ့ဆော်ခြင်း၊ ဝါဒဖြန့်ခြင်းများ ပြုမှုလုပ်ဆောင်ခဲ့သည့်အတွက် ဖမ်းဆီးခဲ့ရခြင်းဖြစ်သည်ဟု စစ်ကောင်စီက ယနေ့စက်တင်ဘာ ၆ ရက်ထုတ် မြန်မာ့အလင်းသတင်းစာတွင် ထုတ်ပြန်ထားသည်။

ယင်းသို့ထုတ်ပြန်ရာ၌ မြောက်ဦးမြို့ တောင်ရပ် ရပ်ကွက်နေ ဖိုးလပြည့်(ခ)ကျော်ဇံဝေသည် ၎င်းအသုံးပြုသည့် Kyaw Zan Wai ဖေ့စ်ဘုတ်အကောင့်မှနေ၍ နိုင်ငံတော်အေးချမ်းသာယာရေးကို ပျက်ပြားစေရန် ရည်ရွယ်လျက် လှုံ့ဆော်ခြင်း၊ ဝါဒဖြန့်ခြင်းများ ပြုမှုလုပ်ဆောင်ခဲ့သည့်အတွက် တရားဥပေဒနှင့်အညီ ဖမ်းဆီးထိန်းသိမ်း အမှုဖွင့်အရေးယူခြင်းများ ဆောင်ရွက်ခဲ့ရသည်ဟု ပါရှိသည်။

ကိုကျော်ဇံဝေကိုမူ မြောက်ဦးမြို့၊ တောင်ရပ်ရပ်ကွက် သူ၏ နေအိမ်မှ စစ်သားနှင့်ရဲ့အင်အား ၂၀ ခန့်က ဝင်ရောက် ဖမ်းဆီးခေါ်ဆောင်သွားပြီး လက်ရှိ ရဲလက်ကို မအပ်ဘဲ မြောက်ဦးအခြေစိုက်တပ်ရင်း (၃၇၇) တွင် ဖမ်းဆီးထိန်းသိမ်းထားကြောင်း သိရသည်။

ကိုကျော်ဇံဝေ(ခ)ရင်ဆို့သည် သူ၏ Facebook လူမှုကွန်ရက်စာမျက်နှာတွင် ဟာသများနှင့် စစ်ရေး၊ နိုင်ငံရေးအခြေအနေများကို မျှဝေလေ့ရှိသူဖြစ်သည်။

မကြာသေးခင်ကလည်း Exodus အမည်ရှိတေးသီချင်းတစ်ပုဒ်ကိုလည်း သီဆိုထားပြီး ၎င်း၏ ဖေ့စ်ဘုတ်လူမှုကွန်ရက်စာမျက်နှာတွင် ဖြန့်ချိထားခဲ့ကြောင်း သိရသည်။

ထိုထုတ်ပြန်ကြေညာထားသည့်အထဲတွင် "အကြမ်းဖက်အုပ်စုအဖြစ်ကြေညာထားသော CRP NUG နှင့် ယင်းတို့၏ လက်အောက်ခံ အဖွဲ့အစည်းများ၊ ယင်းတို့နှင့် ဆက်နွှယ်နေသော အဖွဲ့အစည်းများ၊ လူပုဂ္ဂိုလ်များသည် နိုင်ငံတော်တည်ငြိမ်အေးချမ်း ရေးကို ပျက်ပြားစေရန်နှင့် ပြည်သူလူထုကို အကြောက်တရားများ ဖြစ်ပေါ်စေပြီး အစိုးရယန္တရားများပျက်ပြားစေရန် ရည်ရွယ်လျက် လှုံ့ဆော်ခြင်း၊ ဝါဒဖြန့်ခြင်း၊ ခြိမ်းခြောက်ခြင်းများကို လူမှုကွန်ရက်များမှ တစ်ဆင့် နည်းမျိုးစုံဖြင့် ပြုလုပ်လျက်ရှိသည်" ဟုရေးသားထားသည်။