ရခိုင်ကမြို့အများအပြားတွင် ကားနှင့်ဆိုင်ကယ်လိုင်စင်များကိုစစ်ဆေးဖမ်းဆီးနေ

နိရဉ္စရာ စက်တင်ဘာ ၈ /၂၀၂၀

စစ်ကောင်စီသည် ရခိုင်ပြည်နယ်က မြို့အများအပြားတွင် ကား၊ဆိုင်ကယ်လိုင်စင်များကို စစ်ဆေးကာ ဖမ်းဆီးမှုပြုလုပ်နေသည်ဟု သတင်းရရှိသည်။

ယနေ့နံနက်တွင်မြောက်ဦး၊ကျောက်တော်၊ မင်းပြားနှင့်မြေပုံမြို့တို့တွင် စစ်တပ်၊ ရဲတို့က လိုင်စင်များကို စစ်ဆေးကာ ဖမ်းဆီးမှုများပြုလုပ်နေသည်ဟု ဒေသခံများက ပြောသည်။

မင်းပြားမြို့တွင် ရဲစခန်းအဝိုင်း၊ ဘဏ်အနီး၊ ရဲလမ်းဆုံ၊ စျေးနားအဝိုင်း၊လေးလမ်း(ခွ)ဆုံ နေရာများတွင် ကား၊ဆိုင်ကယ်၊ ဘေးတွဲ ဆိုင်ကယ် လိုင်စင်တို့ကို စစ်ဆေးနေပြီး အနည်းဆုံး ဆိုင်ကယ်၊ ဘေးတွဲဆိုင်ကယ် ၃၀ လောက်ကို ဖမ်းဆီးပြီးရဲစခန်းထဲကို ခေါ်သွားသည်ဟု  မင်းပြားမြို့ခံတစ်ဦး က နိရဉ္စရာ သို့ပြောသည်။ 

''ဆိုင်ကယ်လိုင်စင်နဲ့ ဖုန်းတွေရောစစ်တာတဲ့။ မြို့ထဲမှာ သွားလာနေတဲ့ ဆိုင်ကယ်၊ တွဲဘီးဆိုင်ကယ်၊ ရေရောင်းတဲ့ ဆိုင်ကယ်မကျန် အကုန်လုံးကို စစ်ဆေးဖမ်းဆီးနေတယ်။ အခုဆို အစီး ၃၀လောက်ရှိတယ်။ အခုတော့ အကုန်လုံးရဲစခန်းကိုခေါ်သွားတယ်။ အရင်နေ့တွေကတော ဒီလိုမစစ်ပါဘူး''ဟု နိရဉ္စရာသို့ပြောသည်။

၎င်းပြင် ပြည်သူများ၏ ဖုန်းများကိုလည်း တင်းတင်းကျပ်ကျပ် စစ်ဆေးမှုများပြုလုပ်နေသည်ဟု ၎င်းကဆက်ပြောသည်။

မြောက်ဦးမြို့ ၊ တောင်ရပ်ရပ်ကွက်လေးလမ်းဆုံ (လေးခွဆုံ) အနီးတွင် ဆိုင်ကယ်များကို အဓိကထားဖမ်းနေပြီး ဆိုင်ကယ်လိုင်ဆင်၊ ဦးထုတ်၊ ယာဥ်မောင်းလိုင်စင်များကို စစ်ဆေးနေကြောင်း မြောက်ဦးမြို့မှ ကိုမင်းဆွေက ပြောသည်။

''မနက်က စပြီးဖမ်းနေတာပါ။ တောင်ရပ် လေးခဆုံးနားမှာဖမ်းနေတာ။ ပြီးခဲ့နေ့တွေကတော့ မဖမ်းပါဘူး။ ဒီနေ့မှ စဖမ်းတာ'' နိရဉ္စရာ သို့ပြောသည်။

မြေပုံမြို့တွင် ယမန်နေ့ စက်တင်ဘာလ ၇ ရက် နေ့ကစစ်ကောင်စီ တပ်သားများစခန်းချနေသည့် နတလရုံး ဗုံးဖောက် တိုက်ခိုက်ခံရပြီးနောက် မင်းပြား-မြေပုံ ကားလမ်းကိုပိတ်၍ စစ်ဆေးနေကြောင်း သိရသည်။

မြေပုံမြို့မှလူငယ်တစ်ဦးက ''မနေ့က နေ့လယ်ကတည်းက ဆိုင်ကယ်တွေ၊ ကားတွေကို မြေပုံအဝင် ကန်သာရွာနားမှာ စစ်နေတာပါ။ ဒီနေ့လည်း စစ်နေပါတယ်။ လိုင်ဆင်စစ်တယ်ပြီးတော့ လူတွေကိုပါ ဖုန်းတွေယူစစ်ပါတယ်''ဟု နိရဉ္စရာ သို့ပြောသည်။

ကျောက်တော်မြို့တွင်လည်း ယနေ့စက်တင်ဘာ ၈ ရက်နေ့လည် ၁၁ နာရီခန့်မှစ၍ ကျောက်တော်မြို့ သာသနာ့ဗိမာန်ရှေ့တွင် စစ်သားနှင့်ရဲများက ဆိုင်ကယ်၊သုံးဘီးလိုင်ဆင်များကို စစ်ဆေးနေကြောင်း သိရသည်။ 

ကျောက်တော်မြို့ခံတစ်ဦးက '' နေ့လည် ၁၁ နာရီလောက်က စပြီးစစ်နေတာပြောကြတယ်။ ဆိုင်ကယ်လိုင်ဆင်တွေနဲ့ ဖုန်းတွေပါယူစစ်ပါတယ်။ အဖမ်းခံထားရတယ်လို့တော့ မကြားမိသေးပါဘူး'' နိရဉ္စရာ သို့ပြောသည်။

စစ်ကောင်စီ တပ်ဖွဲဝင်များသည် ရခိုင်ပြည် နယ်က မြို့များတွင် လိုင်ဆင်အကြောင်း ပြ၍ လမ်းသွားလမ်းလာများကို အမြဲလိုလို စစ်ဆေးတတ်ပြီး စစ်ရေးတင်းမာနေသည့်ယခုအချိန်တွင် လမ်းများကိုပိတ်၍ နေရာအနှံ့စစ်ဆေးနေသဖြင့် ခရီးသွားများစိုးရိမ်ကြောင့်ကြနေကြကြောင်းလည်း ဒေသခံများက ပြောကြားသည်။