ကြာသပတေး၊ မတ်လ ၂၈ရက်၊ ၂၀၂၄

မြောက်ဦးမှဖမ်းဆီးခံထားရသည့် ကိုရင်ဆို့ (ခေါ်)ကိုကျော်ဇံဝေ(ခ) ဖိုးလပြည့်ကို စက်တင်ဘာ ၁၉ ရက်တွင်ရုံးထုတ်မည်


  • ရေးသူ: Web Master
  • | ရက်စွဲ: ၁၁ စက်တင်ဘာ ၂၀၂၂
  • | ကြည့်ရှုသူ: 2.2k

နိရဥ္စရာ ၊ စက်တင်ဘာ ၁၁/၂၀၂၂

ရခိုင်ပြည်နယ်၊ မြောက်ဦးမြို့မှ ဖမ်းဆီးခံထားရသည့် ကိုရင်ဆို့ (ခ)ကိုကျော်ဇံဝေ (ခ) ဖိုးလပြည့်ကို လာမည့်စက်တင်ဘာလ ၁၉ ရက်တွင် မြောက်ဦးမြို့နယ်တရားရုံး၌ရုံးထုတ်မည်ဟု သူနှင့် နီးစပ်သူတစ်ဦးက နိရဥ္စရာကိုပြောသည်။
"ရုံးထုတ်မဲ့ကိစ္စကို ပြီးခဲ့တဲ့ ၃ ရက် ၄ ရက်လောက်က ဖမ်းထားနေရာက တရားသူကြီးနဲ့ Video call နဲ့ ရမန်ယူထားတယ်လို့ သိရတာ။ မြောက်ဦးရဲစခန်းကိုလည်း မရောက်သေးဘူး။ မိသားစုနဲ့လည်း လုံးဝအဆက်အသွယ် မရသေးဘူး" ဟု ပြောသည်။
လူမှုကွန်ရက်စာမျက်နှာ ဟာသဗီဒီယိုများနှင့် စစ်ရေး၊ နိုင်ငံရေးအခြေအနေများကိုမျှဝေရင်း လူသိများလာနေသည့် မြောက်ဦးမြို့မှ ကိုရင်ဆို့ (ခ) ကိုကျော်ဇံဝေ(ခ) ဖိုးလပြည့်ကို စစ်သားနှင့်ရဲအင်အား ၂၀ ခန့်က စက်တင်ဘာလ ၄ ရက် နံနက် ၈ နာရီခန့်တွင် မြောက်ဦးမြို့၊ တောင်ရပ်ရပ်ကွက်ရှိ သူ၏နေအိမ်မှ ဝင်ရောက် ဖမ်းဆီးခေါ်ဆောင်သွားခြင်းဖြစ်ပြီး လက်ရှိတွင် ရဲလက်ကို မအပ်ဘဲ မြောက်ဦးအခြေစိုက်တပ်ရင်း (၃၇၇)တွင် ဖမ်းဆီးချုပ်နှောင်ထားသည်ဟု သိရသည်။
နိုင်ငံတော်အေးချမ်းသာယာရေးကို ပျက်ပြားစေရန် ရည်ရွယ်လျက် လှုံ့ဆော်ခြင်း၊ ဝါဒဖြန့်ခြင်းများ ပြုမှုလုပ်ဆောင်ခဲ့သည့်အတွက်ဟု စစ်ကောင်စီက စက်တင်ဘာ ၆ ရက်ထုတ် မြန်မာ့အလင်း သတင်းစာတွင် ထုတ်ပြန်ထားသည်။
သူ့ကို နိုင်ငံတော်အကြည်အညိုပျက်စေမှုပုဒ်မ ၅ဝ၅(က)အပါအဝင် ပုဒ်မ ၃ ခုဖြင့် အမှုဖွင့်ထားသည်ဟုလည်း သူ၏နီးစပ်သူများက ပြောသည်။
လက်ရှိတွင် ကိုရင်ဆို့(ခေါ်)ကိုကျော်ဇံဝေ(ခ) ဖိုးလပြည့်ကို မိသားစုနှင့်လည်း တွေ့ခွင့်မပေးသေးဟု သိရသည်။ (NN-13)

ဆက်စပ် သတင်းများ