ကျောက်ဖြူတွင် အရပ်သားများကို စစ်တပ်က ဖမ်းဆီးမှုတစ်နေ့ထက်တစ်နေ့ပိုများလား၊ စက်တင်ဘာ(၁၁)တရက်တည်းအတွင်းအနည်းဆုံး ၃ဦးဖမ်းဆီးခံရ

နိရဥ္စရာ၊ စက်တင်ဘာ ၁၂/ ၂၀၂၂

ရခိုင်ပြည်နယ်၊ ကျောက်ဖြူမြို့တွင် ဧည့်စာရင်းစစ်မှုကိုအကြောင်းပြပြီး စစ်ကောင်စီတပ်က အရပ်သားများကိုဖမ်းဆီးမှုမှာ တစ်နေ့ထက်တစ်နေ့ တိုးများလာနေသည်ဟုသတင်းရရှိသည်။

စက်တင်ဘာ ၁၁ ရက်နေ့ ညတွင် ဧည့်စာရင်းဝင်စစ်မှုကို အကြောင်းပြပြီး ကျောက်ဖြူမြို့ ပြင်ဖြူမော်ရပ်ကွက်မှ ကိုဖြိုးမင်းထွန်း (ခ)ကိုဖြိုး၊ ရခိုင်ပိုက်ဆိပ်မှ ဦးစိုးဝင်းနိုင်၊  ကုလဘာတောင် ရပ်ကွက်မှ ဦးဝင်းအောင်တို့ကို  ကျောက်ဖြူအခြေစိုက် တပ်ရင်း (၃၄) က ဖမ်းဆီးသွားခဲ့သည်ဟု သိရသည်။

ဖမ်းဆီးခံရသူ ၃ ဦးအထဲက အသက် ၂၉ နှစ်အရွယ်ရှိ ကိုဖြိုးမင်းထွန်း (ခ) ကိုဖြိုးကို ယမန်နေ့ စက်တင်ဘာလ ၁၁ ရက် ည ၁၁ နာရီခန့်တွင် နေအိမ်သို့ဧည့်စာရင်းလာစစ်စဉ် ဖမ်းဆီးသွားခြင်း ဖြစ်သည်ဟု ဇနီးဖြစ်သူမအေးအေးနိုင်က နိရဉ္စရာသတင်းဌာနကို ပြောသည်။

''ည ၁၁ နာရီလောက် ဧည့်စာရင်းလာစစ်တယ်။ ကိုဖြိုးရှိလားမေးတယ်။ ရှိတယ်ဆိုရင်တော့ ခေါ်လိုက်ပါလို့ ပြောတယ်။ မေးစရာရှိလို့ တစ်ညလောက်ခေါ်သွားမယ်။ မနက်လင်းရင် ပြန်လွှတ်ပေးမယ်ပြောပြီး အခုထိ ပြန်မလွှတ်ပေးသေးပါဘူး'' ဟု နိရဥ္စရာ သို့ပြောသည်/

ကိုဖြိုးမင်းထွန်း (ခ)ကိုဖြိုးကို ခလရ (၃၄) တပ်ရင်းမှ ဗိုလ်မှူးတင်အောင်ကျော်နှင့်အဖွဲ့က ဖမ်းဆီး သွားခြင်းဖြစ်သည်ဟု ပြင်ဖြူမော်ရပ်ကွက်အုပ်ချုပ်ရေးမှူးက နိရဥ္စရာကို အတည်ပြုပြောဆိုသည်/

''မနေ့ကညက သူတို့ဖမ်းပြီးလို့  ည ၁၁ နာရီလောက်မှာ ကျွန်တော့်ကိုဖုန်းဆက်လာတယ်။ မေးစရာရှိလို့ ခဏခေါ်သွားအုံးမယ်ဆိုပြီး။ ဖမ်းတာကရဲမပါဘူး။ ကျောက်ဖြူအခြေစိုက် ၃၄ တပ်ရင်းက ဗိုလ်မှူး တင်အောင်ကျော် ဦးဆောင်လာတာ ''ဟု ပြောသည်။ဖမ်းဆီးခံလိုက်ရသူ  ကိုဖြိုးမင်းထွန်းသည် ရွှေငါးပျံကုမ္ပဏီတွင်လုပ်နေသူဖြစ်ပြီး အသက်(၁) နှစ်အရွယ် သမီးငယ်တစ်ဦးရှိကြောင်း သိရသည်။

နောက်ထပ် ဖမ်းဆီးခံရသူမှာ ကျောက်ဖြူမြို့၊ ရခိုင်ပိုက်ဆိပ်ရပ်ကွက် ဦးစိုးဝင်းနိုင်ဖြစ်ပြီး  ယမန်နေ့ ည ၁၁ နာရီခန့်က စစ်တပ်မှဖမ်းသွားကြောင်း ရခိုင်ပိုက်ဆိပ်ရပ်ကွက် ဥက္ကဋ္ဌက နိရဉ္စရာသတင်းဌာနကို ပြောသည်။

'' မနေ့ညက ၁၁ နာရီလောက်က ဦးစိုးဝင်းနိုင်စစ်တပ်ကဖမ်းသွားတာပါ။အိမ်ကနေ ဖမ်းဆီးသွားတာလို့ ပြောပါတယ်။ သူ့အိမ်ကို ဧည့်စာရင်းသွားတော့ ကျနော်တော့ မပါသွားပါဘူး''ဟု နိရဉ္စရာသို့ ပြောသည်။

တတိယမြောက် ဖမ်းဆီးခံရသူတစ်ဦးမှာ ကျောက်ဖြူမြို့ ၊ကုလဘာတောင်ရပ်ကွက်မှ အသက် (၅၃)နှစ် အရွယ် ဦးဝင်းအောင် ဖြစ်ကြောင်း သိရသည်။

 ကုလာဘာတောင်ရပ်ကွက်က သူနှင့်နီးစပ်သူတစ်ဦးက''  သူ့ကို မနေ့ည ၁၀နာရီခွဲခန့်လောက်မှာ ဖမ်းတာပါ။ ဧည့်စရင်းလာစစ်တယ်ပြောပြီး ခေါ်သွားကြာတာ။ အခုထိ ဘယ်ရောက်နေမှန်း မသိဘူး ''ဟု နိရဉ္စရာ သို့ပြောသည်။

 ရခိုင်ပြည်နယ် ကျောက်ဖြူမြို့ပေါ်ရပ်ကွက်များမှ ဖမ်းဆီးခံရသူ ၇ ဦးထက် မနည်းရှိနေပြီး နောက်ထပ်လည်း သတင်းမရဘဲ ဖမ်းဆီးခံရသူများရှိနိုင်သည်ဟု လူမှုရေးလှုပ်ရှား ဆောင်ရွက်နေသူများက ပြောသည်။

စက်တင်ဘာ ၇ ရက်နေ့က ဖမ်းဆီးခံရသူ (၃) ဦးရှိပြီး ၎င်းတို့မှာ   ကျောက်ဖြူမြို့ အစိုးရရပ်ကွက်မှ ဆလိုင်းကိုအေး(၄၃နှစ်)၊ စေတီတောင်ရပ်ကွက်မှ ကိုဝင်းနိုင်(၂၉နှစ်)၊ ရခိုင်ပိုက်ဆိပ်ရပ်ကွက်မှ ဦးဦးဘသန်း (၄၂နှစ်)တို့ ဖြစ်သည်။

လက်ရှိရရှိသော သတင်းများအရ စက်တင်ဘာ ၇ ရက်နေ့ ညက  ၃ ဦး၊ ၉ ရက်နေ့ ညက ၁ ဦး၊စက်တင်ဘာ ၁၁ ရက်နေ့ညက ၃ ဦး၊ စုစုပေါင်း ၇  ဦးခန့် ဖမ်းဆီးခံရထားရသည်ဟု သိရသည်။

မြန်မာစစ်တပ်သည် ရက္ခိုင့်တပ်တော်(အေအေ)နှင့် ပတ်သက်သူများဟု သံသယရှိသည့် အရပ်သားများကို လိုက်ဖမ်းနေရာလက်ရှိတွင် မြို့နယ်တိုင်းတွင် ဖမ်းဆီးခံရသူ ရာဂဏန်းထိရှိနေသည်ဟု သတင်းရရှိသည်။

ဖမ်းဆီးခံရသူများကို စစ်ကြောရေးတွင် လူမဆံစွာညှဉ်းပမ်းနှိပ်စက်မှုများ ရှိနေသည်ဟုလည်း သတင်းများ ထွက်ပေါ်နေသည်ဟု ဒေသခံများက ပြောသည်။