အိန္ဒိယနိုင်ငံသို့ထွက်ပြေးရောက်ရှိနေသည့် ပလက်ဝမှစစ်ဘေးရှောင်များအတွက်မလေးရှားရောက်ရခိုင်များကကျပ်သိန်း ၁ဝဝကျော်ထောက်ပံ့

နိရဥ္စရာ၊ စက်တင်ဘာ ၁၄/၂၀၂၂

အိန္ဒိယနိုင်ငံ မီဇူရမ်ပြည်နယ်ထဲသို့ထွက်ပြေးရောက်ရှိနေကြသည့် ပလက်ဝမြို့နယ်မှ စစ်ဘေးရှောင်များ အတွက် မလေးရှားရောက် ရခိုင်လူမျိုးများကလည်း စုပေါင်း၍ ကျပ်သိန်း ၁ဝဝ ကျော်ကို ထောက်ပံ့ကူညီခဲ့ကြောင်း သိရသည်။

အဆိုပါထောက်ပံ့ငွေများကို ပြီးခဲ့သည့် စက်တင်ဘာလ ၁ဝ ရက်က အိန္ဒိယနိုင်ငံ မီဇူရမ်ပြည်နယ်၊ လောင်လန်မြို့နယ်၊ ရွာသစ်ကျေးရွာဘုန်းတော်ကြီးကျောင်း ကျောင်းထိုင်ဆရာတော် ဦးပညာဇောတထံသို့ ဆက်ကပ်လှူဒါန်းလိုက်ခြင်းဖြစ်သည်။

ဦးပညာဇောတက “မလေးရှားက အခုလိုထောက်ပံ့ပေးတာကို စစ်ဘေးရှောင်တွေကိုယ်စား ဦးဇင်းအနေနဲ့ အထူးကျေးဇူးတင်တယ်။ ထပ်မံပြီးတော့ အခက်အခဲတွေ့လာတဲ့အချိန်မှာလည်း ကူညီဆောင်ရွက်ပေးစေချင်တယ်။ ဒီလူတွေက ဘယ်နေ့၊ ဘယ်အချိန်၊ ဘယ်ကာလမှာ ပြန်ရမယ်မှန်းလည်း မသိနိုင်ဘူး။ ဒါကြောင့် မလေးရှားပဲဖြစ်ဖြစ်၊ ထိုင်းပဲဖြစ်ဖြစ် နိုင်ငံ အသီးသီးမှာရောက်နေကြတဲ့ လူပုဂ္ဂိုလ်၊ ရဟန်းပုဂ္ဂိုလ်အသီးသီးလည်းပဲ ဒီအိန္ဒိယထဲမှာရောက်နေကြတဲ့ စစ်ဘေးရှောင်တွေကို ကူညီပေးစေချင်တယ်။ ထောက်ပံ့ပေးစေချင်တယ်”ဟု မိန့်သည်။

အဆိုပါငွေများကို ရက္ခိုင့်လူမှုကယ်ဆယ်ရေးကော်မတီ(ARRC Malaysia)ကဦးဆောင်၍ မလေးရှားရောက်ရခိုင်လူမျိုးများ စုပေါင်းလှူဒါန်းခြင်းဖြစ်ပြီး စစ်ဘေးရှောင်များအတွက် အညီအမျှခွဲဝေပေးသွားမည်ဟုလည်း ဆရာတော်က မိန့်သည်။

အိန္ဒိယနယ်စပ်အနီး ချင်းပြည်နယ် မြိတ်ဝစစ်တပ်အခြေစိုက်စခန်းကို AA က ပြီးခဲ့သည့် စက်တင်ဘာလ ၁ ရက် ညနေပိုင်းက တိုက်ခိုက်ခဲ့ပြီးနောက် နောက်တစ်နေ့တွင် စစ်တပ်တပ်စခန်း အနီးဝန်းကျင်ကို စစ်တပ်ဘက်ကလည်း တိုက်လေယာဉ်များဖြင့် လာရောက်ပစ်ခတ်မှုများ ရှိခဲ့သည့်အတွက် မြိတ်ဝကျေးရွာဘက်မှ ဒေသခံများသည် လုံခြုံရေးစိုးရိမ်၍ အိန္ဒိယနိုင်ငံ မီဇူရမ်ပြည်နယ်ထဲသို့ ယခုကဲ့သို့ ထွက်ပြေးတိမ်းရှောင်လာကြခြင်းဖြစ်သည်။

ထွက်ပြေးလာကြသူများသည် မီဇူရမ်ပြည်နယ်အတွင်းမှ ရွာသစ်ကျေးရွာ၊ တပ်ပေါင်းချေကျေးရွာ၊ လိုင်တလန်ကျေးရွာနှင့် ရွာသာယာကျေးရွာတို့တွင် ခိုလှုံနေကြပြီး လက်ရှိ စစ်ဘေးရှောင် ၆ဝဝ ခန့် ရှိသည်ဟု သိရသည်။

လက်ရှိတွင် စစ်ဘေးရှောင် လူဦးရေ အရေအတွက်မှာ ရွာသစ်ကျေးရွာတွင် အိမ်ထောင်စု ၅၁ စု (လူဦးရေ ၂ဝရ ဦး)၊ တပ်ပေါင်းချေကျေးရွာတွင် အိမ်ထောင်စု ၂၇ စု (လူဦးရေ ၁၁၅ ဦး) ၊ လိုင်တလန်ကျေးရွာတွင် အိမ်ထောင်စု ၃၉ စု (လူဦးရေ ၁၆၃ ဦး) နှင့် ရွာသာယာကျေးရွာတွင် အိမ်ထောင်စု ၂၁ စု (လူဦးရေ ၁ဝ၅ ဦး) တို့ရှိပြီး ဘုန်းကြီးကျောင်းများနှင့် နေအိမ်များတွင် ဖြန့်ခွဲနေထိုင်လျက်ရှိသည်ဟုလည်း သိရသည်။

သူတို့ကို အိန္ဒိယနိုင်ငံ ဘာဇီကိုင်းရွာဘက်ရှိ ရခိုင်မိသားစုများကလည်း စက်တင်ဘာလ ၉ ရက်တွင် ဆန်အပါအဝင် စားနပ်ရိက္ခာများ ထောက်ပံ့ပေးခဲ့ကြသည်ဟု သိရသည်။
Photos - ACM