ပလက်ဝမြို့နယ်မှသဲမဝတပ်စခန်းနှင့် ကလက်ချောင်းထဲမှပွိုင့်ကုန်းတစ်ခုကို AA သိမ်းပိုက်

နိရဉ္စရာ၊ စက်တင်ဘာ ၁၅/၂၀၂၂

ချင်းပြည်နယ်၊ ပလက်ဝမြို့နယ်ရှိ သဲမ၀စခန်းကုန်းနှင့် ကလက်ချောင်းထဲရှိ ပွိုင့်ကုန်းတစ်ခုတို့ကို ရက္ခိုင့်တပ်တော် (AA) ယနေ့တွင် ထပ်မံသိမ်းပိုက်လိုက်သည်ဟု သတင်းရရှိသည်။

ယနေ့ စက်တင်ဘာ ၁၅ ရက် နံနက်အစောပိုင်းမှ စတင်ကာ အေအေက သဲမ၀စခန်းကုန်းကို တိုက်ခိုက်ခဲ့ပြီး  နေ့လယ် ၁ နာရီ ၄၅ မိနစ်တွင် ၎င်းစခန်းကို အောင်မြင်စွာ သိမ်းပိုက်နိုင်ခဲ့သည်ဟု အေအေနှင့် နီးစပ်သော ခိုင်လုံသည့် သတင်းရင်းမြစ်တစ်ခု ပြောဆိုသည်။

၎င်းပြင် ကလက်ချောင်းထဲမှ ပွိုင့်ကုန်းကိုလည်း သိမ်းပိုက်နိုင်ခဲ့ကြောင်း ၎င်းသတင်းရင်းမြစ်က ပြောသည်။

"သဲမဝတပ်စခန်းကို ဒီနေ့ ၁ နာရီ ၄၅ မိနစ်လောက်မှာ သိမ်းနိုင်ခဲ့တယ်လို့ သိရပါတယ်။ နောက်ပြီး (ကလက်ချောင်း)ထဲက စံသိန်းတိုင် ဗျူဟာကုန်းရဲ့ မြောက်ဘက်ပွိုင့်ကုန်းကိုလည်း သိမ်းနိုင်ခဲ့ပါတယ်။ မြန်မာစစ်တပ်အလောင်း ၃၀ ကျော်လောက်ရတယ်လို့ သိရပါတယ်"ဟု ပြောသည်။

အဆိုပါ စခန်းသိမ်းတိုက်ပွဲတွင် လက်နက်ခဲယမ်းများသိမ်းဆည်းရမိခဲ့ပြီး စစ်ကောင်စီဘက်က ၃၀ ထက်မနည်း ကျဆုံးခဲ့ကြောင်း ၎င်းက ဆက်ပြောသည်။

ယခု သိမ်းပိုက်ရရှိခဲ့သော စခန်းကုန်းများနှင့် ဆိုလျှင် ပလက်၀မြို့နယ်တွင် အေအေသိမ်းပိုက်နိုင်ခဲ့သည့် စခန်းမှာ အနည်းဆုံး (၈) ခု အထိရှိသွားပြီဟု သိရသည်။

ယခင်သိမ်းပိုက်ထားသည့် တပ်စခန်းများမှာ မြိတ်ဝကျေးရွာတပ်စခန်း၊ အဘောင်သားကျေးရွာအနီးမှ တပ်စခန်းကုန်း(၂)ခု၊ နှမဒါချောင်းထဲရှိ သူဌေးကုန်း၊ လယ်လှကျေးရွာများအနီးရှိ တပ်စခန်း(၃) ခုဖြစ်ပြီး ယနေ့သိမ်းပိုက်ခဲ့သည့် သဲမဝတပ်စခန်းနှင့်  စံသိန်းတိုင်ဗျူဟာ မြောက်ဘက်ပွိုင့်ကုန်းအပါအဝင် စုစုပေါင်း စစ်ကောင်စီတပ်စခန်း (၈) ခုအထိ လက်ရှိမှာ အေအေသိမ်းပိုက်ထားကြောင်း ၎င်းက ဆိုသည်။

"အရင်က သိမ်းထားတဲ့ စခန်း (၆) ခုရယ်။ ဒီနေ့ သိမ်းတဲ့ စခန်း နှစ်ခုရယ်ဆိုရင်တော့ စုစုပေါင်း စခန်း(၈)ခု ရှိပါပြီ။ တခြားတပ်စခန်းတွေတော့ ကျန်ရှိပါသေးတယ်။ သူတို့ဘက်ကလည်း ညဆိုရင် ဂျက်ဖိုက်တာတွေနဲ့ ကျချင်နေရာကျဆိုတာမျိုးလာပစ်တာတွေရှိတယ်။ သူတို့စခန်းတွေမှာ ပြန်ထိတာမျိုးလည်း ရှိပါတယ်" ဟု ပြောသည်။

ယနေ့တစ်ရက်တည်းတွင် ပလက်ဝမြို့နယ်၌ နေရာသုံးခုမှာ တိုက်ပွဲဖြစ်ပွားခဲ့ပြီး တပ်စခန်းတစ်ခုကိုသိမ်းပိုက်နိုင်ခဲ့ခြင်းဖြစ်ကာ ကျီးဝတပ်စခန်းမှ စစ်ကောင်စီတပ်သားများသည်လည်း ယနေ့နံနက်က စခန်းစွန့်ခွာကာ တပ်ဆုတ်သွားကြောင်း မျက်မြင်ဒေသခံများက ပြောသည်။

ယနေ့ ညနေပိုင်းတွင် မောင်တောမြို့နယ်မှ စစ်ရေးအရအရေးပါသည့် မီးတိုက်နယ်ခြားစောင့် အထိုင်စခန်းကိုလည်း အေအေက တစ်နာရီကျော်အတွင်း တိုက်ခိုက်သိမ်းပိုက်ခဲ့ကြောင်းသိရသည်။

ရက္ခိုင့်တပ်တော် (AA)က စက်တင်ဘာလ (၁၀) ရက်မှာ  မောင်တော မြို့နယ်မြောက်ပိုင်း  စစ်ကောင်စီတပ် ခမရ (၃၅၂) တပ်ရင်း စခန်းကုန်း ကိုသိမ်းပိုက်နိုင်ခဲ့ပြီး  သြဂုတ်လ ၃၁ ရက်နေ့ကလည်း မောင်တောမြို့နယ်က မိုင်တိုင်(၄၀) နယ်ခြား စောင့်တပ်စခန်းကို AA က အပြီးသတ်တိုက်ခိုက်သိမ်းပိုက်နိုင်ခဲ့ကြောင်း ထုတ်ပြန်ထားသည်။ (NN-7)