- Web Master
- ၀၆ အောက်တိုဘာ ၂၀၂၃
နိရဉ္စရာ၊ စက်တင်ဘာ ၁၆/ ၂၀၂၂
မြန်မာနိုင်ငံ အစားအသောက်နှင့် ဆေးဝါးကွပ်ကဲမှုဦးစီးဌာန(FDA)မှ အများပြည်သူ စားသုံးရန်မသင့်သည့် စားသုံးကုန်စာရင်းများထုတ်ပြန်ရာတွင် ရခိုင်ပြည်ထုတ် စားသုံးကုန် (၅)မျိုးမှာ ကျန်းမာရေး ထိခိုက်စေနိုင်သည့် ဓါတုဆေးဝါးများ သတ်မှတ်ပမာဏာထက် ပါဝင်နေသည်ကို တွေ့ရှိရသည်ဟု ဖော်ပြထားသည်။
အဆိုပါ စားသုံးကုန်များမှာ Reserved Red peach.New Choice Palastic Pakc၊ စတော်ဘယ်ရီ အရသာ အချိုရည် ABC (rainbow)၊ ခြင်္သေ့မင်းတံဆိပ် ငရုပ်ဆီ၊ Lucky Tiger ငရုပ်ဆီ၊ ကိုကာကိုလာ အချိုရည် Sunlight တံဆိပ်တို့ဖြစ်သည်ဟုဆိုသည်။
ယင်း စားသောက်ကုန်ပစ္စည်းများမှာ Sodium Cyclamate နှင့် Benzoic acid ဓါတုဆေးများကို သတ်မှတ် ပမာဏထက် ပိုမိုသုံးစွဲထားကြောင်း တွေ့ရှိရသည်ဟု စက်တင်ဘာလ ၁၆ ရက်နေ့ထုတ် စစ်ကောင်စီပိုင် မြန်မာ့အလင်း သတင်းစာတွင် ရေးသားထားသည်။
ယခုနှစ် ဇန်နဝါရီလမှ ဇူလိုင်လအထိ ဓါတ်ခွဲစစ်ဆေးခဲ့သည့် အစားအသောက်နမူနာများမှ စားသောက်ရန် မသင့်ဟု စစ်ဆေးတွေ့ရှိသည့် အစားအသောက်များစာရင်း ဖော်ပြရာတွင် ယခုကဲ့သို့ ရခိုင်ပြည် စစ်တွေမြို့မှ စားသောက်ကုန်စ(၅) မျိုး ပါဝင်လာခြင်းဖြစ်သည်။
ယခု ထုတ်ပြန်ထားသည့် စားသောက်ကုန်များကို တာရှည်စားသုံးပါက အစာအိမ်၊ အသဲ၊ ကျောက်ကပ်နှင့် ကင်ဆာရောဂါများကို ဖြစ်ပွားစေနိုင်ကြောင်း ကျန်းမာရေး အစားအသောက်နှင့် ဆေးဝါးကွပ်ကဲမှု ဦးစီးဌာန (FDA)က ထုတ်ပြန်ထားသည်။
ထုတ်လုပ်သူ၊ ရောင်းချသူများအနေဖြင့် ခွင့်ပြုမထားသည့် ဆိုးဆေးများ၊ တာရှည်ခံဓါတုပစ္စည်းများကို အသုံး မပြုရန်နှင့် ဓါတုပစ္စည်းများကို သတ်မှတ်ပမာဏအတွင်းသာ အသုံးပြုကြရန် ညွန်ကြားထားပြီး လိုက်နာမှုမရှိ ပါက အမျိုးသားအစားအသောက် ဥပဒေများနှင့် အရေးမည်ဟု အသိပေး ထုတ်ပြန်ထားကြောင်း သိရှိရသည်။