AA သိမ်းပိုက်ထားသော စခန်းများအနီးဝန်းကျင်နေရာများကို စစ်ကောင်စီက လေယာဉ်ဖြင့် ထပ်မံဗုံးကြဲတိုက်ခိုက်

နိရဉ္စရာ၊ စက်တင်ဘာ ၁၇/၂၀၂၂

ရက္ခိုင့်တပ်တော် (AA)က  သိမ်းပိုက်ထားသော မီးတိုက်စခန်း အနီးဝန်းကျင်ကို  ယမန်နေ့ ညကလည်း စစ်ကောင်စီက ဂျက်တိုက်လေယာဉ်ဖြင့်ဗုံးကြဲတိုက်ခိုက်ခဲ့ကြောင်း သိရသည်။

ယမန်နေ့ စက်တင်ဘာ ၁၆ ရက် ည ၇ နာရီတွင်တစ်ကြိမ်၊ ည ၁၀ နာရီကျော်တွင်တစ်ကြိမ် ဂျက်တိုက်လေယာဉ်နှစ်စီးဖြင့် မီးတိုက်ကျေးရွာအနီးကို ဗုံးကြဲတိုက်ခိုက်ခဲ့ကြောင်း မီးတိုက် ကျေးရွာသားများက ပြောသည်။

"၇ နာရီလောက်မှာ တစ်ကြိမ်လာပါတယ်။ ၁၀ နာရီကျော်လောက်မှာ တစ်ကြိမ်လာပစ်ပါတယ်။ လေယာဉ်နှစ်စီးနဲ့ပါ။ ရွာနားက တောင်တွေကို ပစ်ပါတယ်။ ပစ်နေချိန်တွေမှာ ရွာသားတွေ အကုန်တောထဲဝင်ပြေးနေရပါတယ်။ သူတို့က ရွာထဲကိုမပစ်ဘူးလို့လည်း ပြောမရဘူးလေ"ဟု မီးတိုက်ကျေးရွာသားတစ်ဦးက ပြောသည်။

စက်တင်ဘာ ၁၅ ရက် ညနေပိုင်းမှာ မီးတိုက်တပ်စခန်းကို အေအေက ဝင်ရောက်တိုက်ခိုက် သိမ်းပိုက်ခဲ့ပြီးနောက် ညနေတိုင်းလိုလို မီးတိုက်ကျေးရွာအနီးကို စစ်ကောင်စီက ယခုကဲ့သို့ လာရောက်ပစ်ခတ်ခြင်းဖြစ်သည်ဟုဆိုသည်။

တိုက်ပွဲပြင်းထန်နေသည့် မောင်တောမြောက်ပိုင်းတွင် စစ်ကောင်စီက လေယာဉ်နှင့် ဗုံးကြဲ တိုက်ခိုက်မှုများပြုလုပ်သလို လက်နက်ကြီး ပစ်ခတ်မှုများလည်း ဆက်တိုက်လုပ်ဆောင်လျှက် ရှိနေသဖြင့် ဒေသခံအများအပြားမှာ ကျေးရွာများကို စွန့်ခွာထွက်ပြေးနေကြရသည်ဟု သိရသည်။

ယခုကဲ့သို့ ကျေးရွာအနီးကို ဗုံကြဲမှုများကြောင့်  မီးတိုက်ကျေးရွာသားများ ဘူးသီးတောင် နှင့် မောင်တောရှိ ဆွေမျိုးအိမ်များနှင့် စစ်ဘေးရှောင်စခန်းများတွင် တိမ်းရှောင်နေရကြောင်း နောက်ထပ်မီးတိုက်ကျေးရွာသားတစ်ဦးက ပြောသည်။

"ဒီဘက်ရွာတွေမှာ လေယာဉ်နဲ့ ဗုံးကြဲတာက ဆက်တိုက်ရှိလာတယ်။ အခု ကိုယ့်ရွာနားပါ ရောက်လာပြီ။ ဒီနေ့မနက်က ရွာသားတွေအကုန် ထွက်ပြေးလာကြပါပြီ။ မောင်တော၊ ဘူးသီးတောင်မြို့တွေမှာ အဆင်ပြေသလိုနေကြပါတယ်"ဟု ပြောသည်။

ယမန်နေ့ညက မြန်မာဘက်မှပစ်ခတ်သည့် မော်တာကျည်ဆန်များ နယ်စပ်အနီး ဘင်္ဂလားဒေ့ရှ်နိုင်ငံ၊ ဘင်ဒရိုဘင်ခရိုင်၊ ခေါင်းတုံးဒေသကိုကျရောက်ပြီး တစ်ဦးသေဆုံးကာ ငါးဦးထက်မနည်း ဒဏ်ရာရရှိခဲ့ကြောင်း Dhaka Tribune က သတင်းဖော်ပြသည်။

စက်တင်ဘာလ ၁၂ ရက်နေ့ကလည်း တိုက်ပွဲဖြစ်ပွားခြင်းမရှိ၊ စခန်းသိမ်းခံရသည့်နေရာများနှင့်လည်း နီးစပ်မှုမရှိဘဲ ဖားဝပ်ချောင်းကျေးရွာအနီးကို စစ်ကောင်စီက လာရောက်ဗုံးကြဲမှုများရှိခဲ့သည်။ (NN-7)

(ဓာတ်ပုံ- ကျရောက်လာသည့် ဗုံးသီး၏ အခွံတစ်ခုကိုတွေ့ရစဉ်)