သောကြာ၊ မတ်လ ၂၉ရက်၊ ၂၀၂၄

ဇက်ရေယာဉ်ပစ်ခတ်ခံရပြီးနောက် တောင်ကုတ်ချောင်းအတွင်းသွားလာနေသည့် ရေယာဉ်များကို စစ်ကောင်စီစစ်ဆေး


  • ရေးသူ: Web Master
  • | ရက်စွဲ: ၁၇ စက်တင်ဘာ ၂၀၂၂
  • | ကြည့်ရှုသူ: 7.1k

နိရဉ္စရာ ၊ စက်တင်ဘာ ၁၇/၂၀၂၂

တောင်ကုတ်ချောင်းထဲတွင် ယမန်နေ့ က စစ်ကောင်စီတပ်သားများတင်လာသည့် ဇက်ရေယာဉ်တစ်စီးကို အေအေက ပစ်ခတ်ခဲ့ပြီးနောက် တောင်ကုတ်ချောင်းအတွင်း သွားလာနေသည့် ရေယာဉ်များ၊ စက်လှေများကို စစ်ကောင်စီတပ်ဖွဲ့ဝင်များက ယနေ့ စက်တင်ဘာ(၁၇) ရက်နံနက် (၁၁ )နာရီခန့်မှစတင် စစ်ဆေးနေကြောင်းသတင်းရရှိသည်။

စစ်ကောင်စီတပ်ဖွဲ့ဝင်များနှင့်ရဲများက တောင်ကုတ်ချောင်းအတွင်းသွားလာနေသည့်ယာဉ်များနှင့် ရွှေလင်းယုန် သင်္ဘောဆိပ်အနီးမှ ရေယာဥ်များကို စစ်ဆေးနေကြောင်း တောင်ကုတ်မြို့နယ်မှ ကိုကျော်ဝင်းက ပြောသည်။

''ဒီနေ့နေ့လယ် ၁၁နာရီလောက်က တောင်ကုတ်ချောင်းမှာ သွားနေတဲ့ လှေတွေက စစ်တပ်က စစ်နေပါတယ်။ နာမည်တွေ ၊နေရပ်လိပ်စာတွေ မေးတယ်။ပြီးတော့ လှေတွေပေါ်မှာလည်း ရှာကြတယ်''' ဟု နိရဉ္စ ရာ သို့ပြောသည်။

စစ်ကောင်စီက ငါးဖမ်းလှေများကို စစ်ဆေးနေပြီး ညနေပိုင်းတွင် ကျေးရွာများသို့ဝင်ရောက်လာပြီး ဧည့်စာရင်းစစ်နေကြောင်း အမည်မဖော်လိုသည့်တောက်ကုတ်ဒေသခံတစ်ဦး နိရဉ္စရာ သို့ ထပ်ပြောသည်။

''မနေ့ကသူတို့ ဇက်အပစ်ခံရပြီး တောင်ကုတ် ဝက်ကျိတ်အုပ်စုက ရွာသစ်ရွာကို ဝင်ပြီး ဧည့်စာရင်း စစ်တယ်။ အေအေကလူတစ်ယောက်ကို လာဖမ်းကြတာလို့လည်းပြောကြတယ်။ တခြားရွာတွေကိုလည်း ဝင်မွှေတာရှိတယ်''ဟု အဆိုပါဒေသခံ ကပြောသည်။

တောင်ကုတ်မြို့နယ်တွင်တိုက်ပွဲများဖြစ်ပွားလာမည်ကိုစိုးရိမ်ပြီးပြည်သူများ မြေဇာအဖြစ်ကျရောက်မည်ကို စိုးရိမ်ကြောင်း တောင်ကုတ်မြို့ခံတစ်ဦး ကပြောသည်။

'' တိုက်ပွဲ ဖြစ်လာမှာတော့စိုးရိမ်ပါတယ်။ နှစ်ဖက်စစ်ရေးအရ မဖြစ်မနေဖြစ်လာကြရင်လည်း ပြည်သူတွေကို မြေဇာပင်လို့ မမြင်ပါနဲ့လို့ တောင်ဆိုချင်ပါတယ်''ဟု ၄င်းကပြောသည်။

တောင်ကုတ်မြို့နယ်တွင် သြဂုတ်လ (၂၅) ရက်နေ့က စစ်ကောင်စီနှင့် အေအေတို့ကြား တိုက်ပွဲ ဖြစ်ပွားခဲ့ပြီး ယမန်နေ့ စက်တင် ဘာလ (၁၆) ရက်နေ့က စစ်ကောင်စီတပ်သားများတင်လာသည့် ဇက်ရေယာဥ်ကို အေအေကပစ်ခတ်ခဲ့ပြီးနောက် စစ်ကောင်စီက နေရာအနှံ့ စစ်ဆေးရေးများ လုပ်နေခြင်းဖြစ် သည်။

ဆက်စပ် သတင်းများ