မြောက်ဦးတွင် ညမထွက်ရအမိန့်ကို ည ၈ နာရီမှစတင်ကြောင်းထုတ်ပြန်၊ လုံခြုံရေးကိုလည်းပိုမိုတင်းကျပ်လာ

နိရဥ္စရာ၊ စက်တင်ဘာ ၁၇ / ၂ဝ၂၂

ရခိုင့်ရှေးဟောင်းယဉ်ကျေးမှုမြို့တော် မြောက်ဦးတွင် ညမထွက်ရအမိန့်ကို ည ၈ နာရီမှ စတင်  တိုးမြှင့်ထုတ်ပြန်ပြီး လုံခြုံရေးကို ပိုမိုတင်းကျပ်လိုက်သည်ဟု သတင်းရရှိသည်။

ညမထွက်ရ ပုဒ်မ ၁၄၄ အမိန့်ကို ယမန်နေ့ စက်တင်ဘာလ ၁၆ ရက်တွင် မြို့နယ်အထွေထွေ အုပ်ချုပ်ရေးမှူးက လက်မှတ်ထိုးထုတ်ပြန်ပြီး ည ၈ နာရီမှ  နံနက် ၅ နာရီအတွင်း ညမထွက်ရန် ထုတ်ပြန်လိုက်ခြင်းဖြစ်သည်ဟု မြို့ခံများက ပြောသည်။

မြောက်ဦးမြို့ခံတစ်ဦးက “ ည ၈ နာရီဆိုတာက လူတွေ သွားလာတဲ့ အချိန်။ ကျနော်တို့ ညတွင်း သွားရတဲ့လူနာတွေ အခက်အခဲဖြစ်မယ်။ ဆေးရုံဘက်ကိုလည်း မကျန်းမာသူတွေသွားမယ်ဆိုရင်လည်း ဗြုန်းစားကြီး ဘယ်သူသွားရဲတော့မလဲ။ ၈ နာရီဆိုတာက အချိန်က မလောက်ဘူး”ဟု ပြောသည်။

ယခင် ၂ဝ၁၈ ခုမှ ၂ဝ၂ဝ အထိ ရက္ခိုင့်တပ်တော်(AA)နှင့် စစ်တပ်တို့ဖြစ်ပွားခဲ့သည့်တိုက်ပွဲများကြောင့် မြောက်ဦးမြို့နယ်အတွင်း ည ၉ နာရီမှ နံနက် ၅ နာရီအတွင်းညမထွက်ရအမိန့်ကို ပုံမှန်ထုတ်ပြန်လျက်ရှိသော်လည်း ယခုအခါ ည ၉ နာရီအစား ည ၈ နာရီမှစတင်ကာ တစ်နာရီထပ်တိုး ထုတ်ပြန်လိုက်ခြင်းလည်းဖြစ်သည်။

ယခုကဲ့သို့ထုတ်ပြန်လိုက်သည့်အတွက် ဒေသတွင်း လက်လုပ်လက်စားများနှင့် ဒေသခံပြည်သူများ အခက်အခဲများဖြစ်လာနိုင်သည်ဟုလည်း ဒေသခံများက ပြောကြသည်။

ရခိုင်တွင် ယခင်က AA နှင့်စစ်တပ်တို့ တိုက်ပွဲများပြင်းထန်ခဲ့သည့်မြို့နယ်များတွင် ည ၉ နာရီမှ နံနက် ၅ နာရီအထိ ညမထွက်ရအမိန့်ကိုထုတ်ပြန်ထားခဲ့သော်လည်း ယခုအခါ အဆိုပါမြို့နယ်များအတွင်း တကျော့ပြန်တိုက်ပွဲများဖြစ်ပွားလာနေသည့်အတွက် ညမထွက်ရအမိန့်ကိုလည်း စစ်ကောင်စီက ည ၈ နာရီမှ နံနက် ၅ နာရီအထိ တစ်နာရီထပ်တိုးထုတ်ပြန်လျက်ရှိသည်ဟု ဒေသခံများက ပြောသည်။