ဘင်္ဂလားဒေ့ရှ်တွင်လက်နက်ကြီးကျရောက်မှု AA ကို စစ်ကောင်စီစွပ်စွဲ၊ ဘင်္ဂလားဒေ့ရှ်မီဒီယာများတွင် ဒေသခံများကို ကိုးကားပြီး မြန်မာစစ်တပ်ပစ်ခတ်သည်ဟုဖော်ပြ

နိရဉ္စရာ၊ စက်တင်ဘာ ၁၈/၂၀၂၂

ဘင်္ဂလားဒေ့ရှ်တွင် လက်နက်ကြီးကျရောက်၍ လူငယ်တစ်ဦးသေဆုံးပြီး ၅ ဦး ဒဏ်ရာရရှိသွားခြင်းနှင့် ပတ်သက်ပြီး ရက္ခိုင်တပ်တော် (AA) ပစ်ခတ်ခြင်းဖြစ်သည်ဟု စစ်ကောင်စီက စွပ်စွဲလိုက်သည်။ သို့သော်လည်း ဘင်္ဂလားဒေ့ရှ် မီဒီယာများတွင် ဒေသခံများကို ကိုးကားပြီး ၎င်းလက်နက်ကြီးကို မြန်မာစစ်တပ်က ပစ်ခတ်သည်ဟု ဖော်ပြကြသည်။  

ယနေ့ထုတ် မြန်မာ့စစ်ကောင်စီပိုင် သတင်းစာများတွင်  AA အဖွဲ့နှင့် ARSA အစွန်းရောက် ဘင်္ဂါလီအကြမ်းဖက်အဖွဲ့ ပူးပေါင်း၍ မြန်မာ-ဘင်္ဂလားဒေ့ရှ် နှစ်နိုင်ငံနယ်နိမိတ် နယ်စပ်ခြံစည်းရိုး အနီးမှနေ၍ လုံခြုံရေးရဲကင်းစခန်းများအား လက်နက်ကြီးများဖြင့် ပစ်ခတ်တိုက်ခိုက်မှုကြောင့် လက်နက်ကြီးကျည်များ ဘင်္ဂလားဒေ့ရှ်နိုင်ငံအတွင်းသို့ ကျရောက်ပေါက်ကွဲခဲ့သည်ဟု ဖော်ပြသည်။

၎င်းပြင် နိုင်ငံတော်စီမံအုပ်ချုပ်ရေးကောင်စီသည် နိုင်ငံတော်ဖွံ့ဖြိုးတိုးတက်စေရေး စဉ်ဆက်မပြတ် ဆောင်ရွက်လျက်ရှိသည့်အပြင် ထာဝရငြိမ်းချမ်းရေး ရရှိစေရန်ရည်ရွယ်၍ လက်နက်ကိုင် တိုင်းရင်းသားအဖွဲ့အစည်း အားလုံးကို လွတ်လပ်ပွင့်လင်းစွာဆွေးနွေးနိုင်ရေး ဖိတ်ခေါ်၍ တွေ့ဆုံ ဆွေးနွေးခဲ့ပြီး ထာဝရငြိမ်းချမ်းရေးရရှိအောင် ကြိုးပမ်းဆောင်ရွက် လျက်ရှိစဉ် AA အဖွဲ့အနေဖြင့် နိုင်ငံတော်၏ငြိမ်းချမ်းရေးဖိတ်ခေါ်မှုကို လျစ်လျူရှု၍ မြန်မာ-ဘင်္ဂလားဒေ့ရှ် နှစ်နိုင်ငံနယ်ခြား မှတ်တိုင်များအနီးရှိ နယ်ခြားစောင့် ရဲတပ်ဖွဲ့စခန်းအား သာလွန်အင်အားဖြင့် ဝင်ရောက် တိုက်ခိုက်ခြင်းများ လုပ်ဆောင်လျက်ရှိကြောင်း ဖော်ပြသည်။

ထိုသို့လုပ်ဆောင်လျက်ရှိရာ AA အဖွဲ့အနေဖြင့် ARSA အစွန်းရောက် ဘင်္ဂါလီအကြမ်းဖက်အဖွဲ့နှင့် ပူးပေါင်း၍ စက်တင်ဘာ ၁၆ ရက် ည ၇ နာရီခွဲတွင် မြန်မာ-ဘင်္ဂလားဒေ့ရှ်နှစ်နိုင်ငံ နယ်နိမိတ်မှတ်တိုင်၊ BP-၃၁ … အနီး လုံခြုံရေးဆောင်ရွက်လျက်ရှိသည့် တောင်ပြိုဝဲ ရဲကင်းစခန်းအား စခန်း၏ မြောက်လတ္တီတွဒ် ၂၁ ဒီဂရီ ၁၀ မိနစ် ၅၉ ဒသမ ၃၁ စက္ကန့်အရှေ့လောင်ဂျီတွဒ် ၉၂ ဒီဂရီ ၁၂ မိနစ် ၁၆ ဒသမ ၀၆ စက္ကန့်နေရာမှ လက်နက်ကြီး၊ လက်နက်ငယ်များဖြင့် ပစ်ခတ်တိုက်ခိုက်ခဲ့ရာ အဆိုပါ လက်နက်ကြီး ကျည်များသည် ရဲကင်းစခန်းနှင့် နယ်စပ်ခြံစည်းရိုးအားကျော်လွန်၍ ဘင်္ဂလားဒေ့ရှ် နိုင်ငံဘက်ခြမ်းသို့ သုံးလုံး ကျရောက်ပေါက်ကွဲခဲ့ကြောင်း ဖော်ပြသည်။  

နိုင်ငံတော်အစိုးရ စစ်ကောင်စီအနေဖြင့် ထာဝရငြိမ်းချမ်းရေး ရရှိရန် အဘက်ဘက်မှ ကြိုးပမ်းနေစဉ် ကာလအတွင်း AA အဖွဲ့သည် ARSA အစွန်းရောက် ဘင်္ဂါလီအကြမ်း ဖက်အဖွဲ့နှင့် ပူးပေါင်း၍ နယ်စပ်ဒေသတည်ငြိမ် အေးချမ်းရေး၊ တရားဥပဒေစိုးမိုးရေးတို့အတွက် လုံခြုံရေးတာဝန် ထမ်းဆောင်နေသော နယ်ခြားစောင့် ရဲတပ်ဖွဲ့ဝင်များအား မြန်မာ-ဘင်္ဂလားဒေ့ရှ် နှစ်နိုင်ငံ နယ်နိမိတ် နယ်စပ်ခြံစည်းရိုး အနီးမှနေ၍ ယခုကဲ့သို့ ပစ်ခတ်တိုက်ခိုက်ခြင်းသည် အိမ်နီးချင်း နှစ်နိုင်ငံအကြား ချစ်ကြည်ရေးပျက်ပြားစေရန် ရည်ရွယ် ချက်ရှိရှိ လုပ်ဆောင်ခဲ့ခြင်းဖြစ်သည်။

ထိုကဲ့သို့ လက်နက်ကြီးကျည် ကျော်ကျပေါက်ကွဲမှုကြောင့် ဘင်္ဂလားဒေ့ရှ်နိုင်ငံနယ်စပ်အနီးရှိ ပြည်သူအချို့ ထိခိုက်ဒဏ်ရာရရှိခဲ့ကြောင်း သိရသည်ဟု ဖော်ပြသည်။

အလားတူ AA အဖွဲ့အနေဖြင့် နယ်စပ်ဒေသ တည်ငြိမ်အေးချမ်းမှုပျက်ပြားစေရန် ရည်ရွယ်ပြီး နယ်ခြားစောင့်ရဲတပ်ဖွဲ့ဝင်များအား ချောင်းမြောင်း တိုက်ခိုက်ခြင်း၊ ဆက်သွယ်ရေးလမ်းကြောင်းများကို ပိတ်ဆို့ဖြတ်တောက်ခြင်းများ ဆောင်ရွက်၍ သြဂုတ် ၃၁ ရက် နံနက်ပိုင်းတွင် မြန်မာ-ဘင်္ဂလားဒေ့ရှ် နှစ်နိုင်ငံနယ်နိမိတ် နယ်ခြားမှတ်တိုင်အမှတ် ဘီပီ ၄၀ ရှိ နယ်ခြားစောင့်ရဲတပ်ဖွဲ့စခန်းအား သာလွန် အင်အားဖြင့် အလစ်အငိုက်ဝင်ရောက်တိုက်ခိုက်ခဲ့ သဖြင့် စခန်းအား လက်လွတ်ဆုံးရှုံးခဲ့ရပြီး နယ်ခြား စောင့်ရဲတပ်ဖွဲ့ဝင်တချို့ ထိခိုက်ကျဆုံးခဲ့သည့် ဖြစ်စဉ်ဖြစ်ပွားခဲ့သည်။

အထက်ပါဖြစ်စဉ်နှင့်ပတ်သက်၍ ဘင်္ဂလားဒေ့ရှ် နိုင်ငံ ကော့စ်ဘဇား အမှတ်(၃၄) ဘင်္ဂလားဒေ့ရှ် နယ်ခြားစောင့်တပ်သို့ မြန်မာနိုင်ငံနယ်ခြားစောင့် ရဲတပ်ဖွဲ့ခွဲမှတစ်ဆင့် အကြောင်းကြားစာပေးပို့ထားရှိ ကြောင်းနှင့် နိုင်ငံခြားရေးဝန်ကြီးဌာနအနေဖြင့် လည်း လုပ်ထုံးလုပ်နည်းများနှင့်အညီ သက်ဆိုင်ရာ သို့ အသိပေးအကြောင်းကြားစာများ ပေးပို့ထားကြောင်း ဖော်ပြထားသည်။

ထိုသို့  မြန်မာစစ်ကောင်စီဘက်က အေအေကို စွပ်စွဲရေးသားသော်လည်း ဘင်္ဂလားဒေ့ရှ်မီဒီယာများတွင် ၎င်းပစ်ခတ်မှုမှာ မြန်မာစစ်တပ်က ပစ်ခတ်ခြင်းဖြစ်ကြောင်း ဒေသခံများ၊ မျက်မြင်များကို ကိုးကားပြီးဖော်ပြကြသည်။

ဒေသခံသတင်းရင်းမြစ်များကို ကိုးကားပြီး Dhaka Tribune ကလည်း မြန်မာစစ်တပ်၏ နယ်စပ်ဖြတ်ကျော် ပစ်ခတ်မှုကြောင့် သေဆုံးခြင်း သို့မဟုတ် ဒဏ်ရာရရှိမည်ကို နယ်စပ်နေပြည်သူများ အဆက်မပြတ်ကြောက်ရွံ့နေကြသည်ဟု သိရကြောင်း ယနေ့ထုတ် သတင်းတစ်ပုဒ်တွင် ရေးသားဖော်ပြထားသည်။

အလားတူ ရက္ခိုင်အမျိုးသားအဖွဲ့ချုပ် (ULA) ကလည်း ယမန်နေ့ စက်တင်ဘာ ၁၇ ရက်နေ့ ထုတ်ပြန်ကြေညာချက် တစ်စောင်ထုတ်ပြန်ခဲ့ပြီး ၎င်းပစ်ခတ်မှုမှာ မြန်မာစစ်ကောင်စီတပ်က မဆင်မခြင် ရမ်းသန်းပစ်ခတ်မှုဖြစ်ကြောင်း၊ ထိုသို့ ပစ်ခတ်မှုကြောင့် သေဆုံးသူ၊ ဒဏ်ရာရသူများအတွက် အထူးဝမ်းနည်း စိတ်မကောင်းဖြစ်ရကြောင်း ဖော်ပြသည်။