ရခိုင်နိုင်ငံရေးသမားဦးဖေသန်းကို စစ်ကောင်စီကပုဒ်မနှစ်ခုဖြင့်အမှုဖွင့်ခြင်းသည် ရခိုင်ပြည်တွင် စစ်တပ်ကကျူးလွန်မှုများကို မဖော်ပြစေချင်၍ ပါးစပ်ပိတ်ရန်ကြိုးပမ်းခြင်းဟုဆို

နိရဉ္စရာ ၊ စက်တင်ဘာ ၁၈/၂၀၂၂

ရခိုင်ဝါရင့်နိုင်ငံရေးသမားလည်းဖြစ်၊ မြေပုံမြို့နယ်ပြည်သူ့လွှတ်တော် ကိုယ်စားလှယ်ဟောင်းလည်း ဖြစ်သည့် ဦးဖေသန်းကို ပုဒ်မနှစ်ခုဖြင့်အမှုဖွင့်ခြင်းသည် ရခိုင်ပြည်တွင် စစ်ကောင်စီက ကျူးလွန်နေသည့် ကိစ္စရပ်များကို မပြောနိုင်အောင် ပါးစပ်ပိတ်ရန် ကြိုးပမ်းခြင်းဟု ကာယကံရှင်ကပြောဆိုသည်။

ဦးဖေသန်းက "ကျနော့်ဘဝမှာ အသက် ၂၀ လောက်ကနေ စနိုင်ငံရေးလုပ်လာတယ်။ လက်နက်ကိုင် တော်လှန်ရေးလည်း လုပ်ဖူးတယ်။ ပါတီနိုင်ငံရေး၊ လွှတ်တော်နိုင်ငံရေးလည်းလုပ်ဖူးတယ်။ အသက် ၆၀ ကျော်မှာ နှစ်ပေါင်း ၄၀ ကျော်လုပ်ခဲ့တဲ့ သက်တမ်းတစ်လျှောက် နိုင်ငံရေးသမားတစ်ယောက်ရဲ့ ပါးစပ်ကို ပိတ်ချင်လို့ မပြောရဲအောင် အခုလိုအမှုဖွင့်တာဖြစ်တယ်။ နိုင်ငံရေးသမားလို့ ကိုယ့်ကိုကိုယ် ခံယူထားသူက ဒီနေ့ဖြစ်ပျက်နေတဲ့ ကိုယ့်တိုင်းပြည်၊ ကိုယ့်ရခိုင်ပြည်နဲ့ဆိုင်တဲ့ ကိစ္စတွေမှာ မပြောနဲ့လို့  ကျနော့်ပါးစပ်ကို ပိတ်ထားလို့တော့ ရမှာမဟုတ်ဘူး။ လက်ဖက်ရည်ဆိုင်မှာပြောတာနဲ့ မီဒီယာမှာ ပြောတာပဲကွာမယ်"ဟု ပြောသည်။

ဦးဖေသန်းအား  DMG သတင်းဌာန၏ ဆောင်းပါးတစ်ခုဖြစ်သည့် "အခု ရှုံးထွက်တိုက်ပွဲဖြစ်တယ်၊ ဘယ်သူနိုင်ပြီး ဘယ်သူရှုံးမလဲ ပြတ်ပြတ်သားသားတိုက်ပွဲ" နှင့်ပက်သတ်ပြီး အင်တာဗျူး ဖြေဆိုမှုကြောင့် စစ်ကောင်စီက စက်တင်ဘာ ၁၇ ရက်နေ့တွင် တပ်မတော်အကြည်အညိုပျက် စေမှုပုဒ်မ ၅၀၅(က)နှင့် ဆက်သွယ်ရေးဥပဒေပုဒ်မ ၆၆(ဃ) တိုဖြင့် မြေပုံမြို့ရဲစခန်းတွင် အမှုဖွင့်ထားသည်ဟု သိရသည်။

"အဆက်အသွယ်တွေရဲ့ သတင်းပေးပို့ချက်အရ မနေ့က ၁၇ ရက်နေ့မှာ မြေပုံမြို့ ရဲစခန်းက ကျနော့ကို DMG မှာ ပြောထားတဲ့ ဆောင်းပါးတစ်ပုဒ်နဲ့ ပတ်သက်လို့ အထက်ကညွှန်ကြားချက်အရ ပုဒ်မ ၅၀၅(က)၊ ၆၆(ဃ) ပုဒ်မနှစ်ခုနဲ့ အမှုဖွင့်ဖို့စီစဉ်နေတယ်လို့ ကြားရပါတယ်"ဟု ပြောသည်။

ဦးဖေသန်းသည် ရခိုင်နိုင်ငံရေး၊ စစ်ရေးအခြေအနေများအပေါ် သတင်းဌာန၊မီဒီယာများတွင် ၎င်း၏အမြင်သဘောထားများကို အစဉ်တစိုက်ပြောဆိုဖြေကြားနေသည့် နိုင်ငံရေးသမားတစ်ဦး ဖြစ်ပြီး ယခုကဲ့သို့အမှုဖွင့် တရားစွဲမှုအပေါ်  အရေးစိုက်စရာမရှိသလို စိုးရိမ်စရာလည်းမရှိကြောင်း ၎င်းက ပြောဆိုသည်။

"သူတို့မကြိုက်တဲ့စကားလုံးပါရင် သူတို့စွဲမယ်။ ဒါကအဆန်းမဟုတ်ဘူး။ သူတို့ကြိုက်အောင်လည်း မပြောနိုင်ဘူး။ ကျနော်တို့က ရခိုင်ပြည်မှာ ဖြစ်ပျက်နေတဲ့အမှန်ကိုပဲ ပြောမယ်။ သူတို့ကြိုက်အောင် မထိခိုက်အောင်တော့ မပြောနိုင်ပါ။ ဒီလိုပြောတာကို မကြိုက်လို့တရားစွဲတာကိုလည်း ကျနော့အနေနဲ့ မစိုးရိမ်ပါဘူး။ အခု ကျနော်က ကိုယ့်နေရပ်မှာမရှိဘူး။ ခရီးသွားနေပါတယ်။ ဒီလိုစွဲတဲ့အတွက်လည်း ကျနော်ကရင်ဆိုင်ဖို့အသင့်ပါ"ဟု ပြောသည်။

ဦးဖေသန်းကို အမူဖွင့်ထားမှုနှင့်ပတ်သက်ပြီး  မြေပုံမြို့နယ်ရဲစခန်းမှ တာဝန်ရှိသူများကို ဖုန်းဆက်ရာ တစ်စုံတစ်ရာ ပြန်ဖြေကြားခြင်း မရှိသေးပါ။

ဦးဖေသန်းသည် မြေပုံမြို့နယ်ပြည်သူ့လွှတ်တော်ကိုယ်စားလှယ်ဟောင်းတစ်ဦးဖြစ်သလို ရခိုင်အမျိုးသားပါတီ(ANP) ၏ မူဝါဒရေးရာ ဦးဆောင်ကော်မတီဝင်ဟောင်းတစ်ဦးလည်းဖြစ်သည်။ ၎င်းသည် (ANP)ပါတီမှ ၂၀၂၁ ခုနှစ် ဇွန်လတွင် နှုတ်ထွက်ခဲ့သည်။ (NN-7)