မင်းပြားမှဒေသခံနှစ်ဦးကို စစ်ကောင်စီတပ်က ညဉ့်အချိန် ဝင်ရောက်ဖမ်းဆီး

ရေးသူ: Web Master
| ရက်စွဲ: ၂၀ စက်တင်ဘာ ၂၀၂၂
| ကြည့်ရှုသူ: 2.2k

နိရဉ္စရာ၊ စက်တင်ဘာ ၂၀/၂၀၂၂

ရခိုင်ပြည်နယ်၊ မင်းပြားမြို့မှ ဒေသခံနှစ်ဦးကို စစ်ကောင်စီက ညဉ့်အချိန် အိမ်ထဲသို့ဝင်ရောက်ကာ ဖမ်းဆီးသွားကြောင်း သိရသည်။

ဖမ်းဆီးခံရသူများမှာ မင်းပြားမြို့ ၊ သပြေညိုရပ်ကွက်နေ ဦးညီညီ (၄၆) နှစ်နှင့် ပြည်တော်သာရပ်ကွက်၊ အောင်သာယာအစုမှ ဦးမောင်မောင်(၃၀) တို့ဖြစ်ကြသည်။

၎င်းတို့ကို ယနေ့ စက်တင်ဘာ (၂၀) နံနက်အစောပိုင်း ညဉ့် နာရီအချိန်တွင် ဖမ်းဆီးသွားခြင်း ဖြစ်ကြောင်း ဆွေမျိုးများက ပြောသည်။

ဦးညီညီကို ယနေ့ ညဉ့် (၂) နာရီအချိန်တွင် ခမရ(၃၇၉) မှ စစ်သား (၃၀) ခန့် အိမ်ကိုဝိုင်းကာ လာရောက်ဖမ်းဆီးသွားခြင်းဖြစ်ပြီး ယောက်ဖဖြစ်သူ ဦးငြိမ်းချမ်းအောင်က ပြောသည်။

"အိမ်မှာအိပ်နေတုန်း အိမ်ကိုလာဖမ်းတာပါ။ လူမှားပြီးဖမ်းတာလည်း ဖြစ်နိုင်ပါတယ်။ လူကလည်း ကြောက်ကြောက်နဲ့ဆင်းပြေးတော့ ဝိုင်းဖမ်းသွားကြတာပါ။ သူတို့ကိုတော့ ဘာမှလုပ်ထားတာ မရှိကြောင်း ပြောပြလိုက်ပါတယ်။ အိမ်မှာတောင်သိပ်နေရတာမဟုတ်။ ပိုက်ချဖို့ ရေထဲ ဆင်းနေရတာပါ။ စုံစမ်းမေးမြန်းပြီး ပြန်လွှတ်ပေးမယ်လို့တော့ ပြောပါတယ်"ဟု ပြောသည်။

ဦးမောင်မောင်ကိုလည်း ယနေ့ ညဉ့် (၁) နာရီအချိန်တွင် ဖမ်းဆီးသွားကြောင်း ၎င်းနှင့်နီးစပ်သူတစ်ဦးက ပြောသည်။

"မနေ့က ၇ နာရီလောက်မှာ မြို့ထဲကို စစ်ကြောင်းလှည့်ကြပါတယ်။ မြို့ထဲတွေမှာလည်း စစ်တယ်။ တစ်မြို့လုံးပတ်ပြီး အပြန်မှာ အခုလို ဖမ်းသွားတာပါ။ သူ့အမေနဲ့ အမျိုးသမီးတို့က စစ်တပ်ကို သွားတွေ့တယ် ကြားပါတယ်"ဟု ပြောသည်။

မင်းပြားမြို့ထဲကို ညအချိန် စစ်ကြောင်းလှည့်လည်မှုများရှိပြီး နေအိမ်များကိုအကြောင်းမဲ့ ဝင်ရောက်ဖမ်းဆီးမှုများ လုပ်ဆောင်နေသည့်အတွက် အပြစ်တစ်စုံတစ်ရာမရှိဘဲ မိမိအိမ်တွင်နေပြီး လုံခြုံမှုမရှိကြောင်း ဒေသခံများကပြောသည်။

စက်တင်ဘာ ၁၈ ရက်နေ့တွင် ကျောက်ဖြူမှ ဒေသခံ (၆) ဦးကို စစ်ကောင်စီက ဖမ်းဆီးခဲ့ပြီး နှစ်ဦးကို ပြန်လွှတ်ပေးခဲ့ကြောင်းသိရသည်။

စက်တင်ဘာ ၁၆ ရက်နေ့ကလည်း မောင်တောမြို့နယ် အောင်မင်္ဂလာရွာတွင် ဒေသခံ ၂ ဦးကို ဖမ်းဆီးခဲ့ပြီး စက်တင်ဘာ ၁၃ ရက်နေ့ကလည်း ဧရာဝတီတိုင်း ၊ ဟိုင်းကြီးကျွန်းမှ အမျိုးသမီး ၃ ဦးအပါအဝင် ရခိုင်လူမျိုး ၆ ဦးကို စစ်ကောင်စီက ဖမ်းဆီးခဲ့သည်။

ဒါ့အပြင် ဇူလိုင်လနှင့် သြဂုတ်လတို့မှာလည်း ရခိုင်ပြည်နယ် စစ်တွေ၊ မြောက်ဦး၊ ကျောက်ဖြူ၊ ကျောက်တော်၊ မင်းပြား၊ မောင်တောစသည့်မြို့နယ်တွေက ဒေသခံအများအပြားကို ဖမ်းဆီးခဲ့ပြီး တချို့ကို ပုဒ်မတပ်ကာ တရားစွဲဆိုမှုများရှိသလို တချို့မှာ စစ်ကြောရေးတွင် နှိပ်စက်ခံရပြီး ဆေးကုသမှုခံယူနေရသူလည်း ရှိသည်။ (NN-7)