နိရဥ္စရာ၊ စက်တင်ဘာ၂၀/ ၂၀၂၂

ရခိုင်ပြည်နယ်တွင်တကျော့ပြန်တိုက်ပွဲများပြင်းထန်လာနေချိန်တွင် ကျောက်တော်မြို့နယ်ရှိ IDPစခန်း ၃ ခုမှစစ်ဘေးရှောင်များကို ပြည်နယ်စစ်ကောင်စီကနေ၇ပ်ပြန်ခိုင်းနေသည်ဟုသတင်းရရှိသည်။

၇ခိုင်ပြည်နယ် စစ်ကောင်အဖွဲ့မှလုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးကျော်သူ၇၏ အမိန့်ဖြင့် ကျောက်တော် မြို့နယ်အုပ်ချုပ်ရေးမှူးက တောင်မင်းကုလားကျေးရွာ၊ ဝါးတောင်ကျေးရွာနှင့်ကန်စောက်ကျေးရွာတို့အတွင်းရှိ စစ်ရှောင်စခန်းများမှ စစ်ဘေးရှောင်များကို  လာမည့် နိုဝင်ဘာလအတွင်း နေရပ်ပြန်ကြရန် အမိန့်ပေးထားသည်ဟု သိ၇သည်။

တောင်မင်းကုလားစစ်ဘေးရှောင်စခန်းတာဝန်ခံဦးအောင်ကျော်ဝင်းက “အခုက တိုက်ပွဲတွေက၊အခြေအနေတွေက ပိုမိုဆိုးလာတဲ့အတွက် ပြန်ဖို့လုံး၀မဖြစ်နိုင်ဘူးလို့ ထင်ပါတယ်။ဒီတိုက်ပွဲမဖြစ်ခင် အရင် ပြီးခဲ့တဲ့လတွေက နှစ်ဘက်နားလည်မှုနဲ့ရပ်စဲတုန်း အဲလိုသေနတ်သံတွေ မကြားတဲ့ အခါဆိုရင်တော့ တစ်မျိုးပေါ့။ စဉ်းစားလို့၇တယ်ပေါ့။အခုက ဟိုမှာလည်း တိုက်ပွဲ၊ ဒီမှာလည်း တိုက်ပွဲဆိုတော့ လုံး၀ပြန်နိုင်မှာမဟုတ်ဘူး”ဟုပြောသည်။  

မြို့နယ်အုပ်ချုပ်ရေးမှူးက ကျေးရွာအုပ်စုစာရေးကိုပြောခိုင်းသည့်အတွက် အုပ်စုစာရေးက စစ်ဘေးရှောင်စခန်းများကို ယမန်နေ့စက်တင်ဘာလ ၁၉ ရက် ညနေ ၅ နာရီခန့်တွင် ဖုန်းဖြင့် ဆက်သွယ်အကြောင်းကြားလာသည်ဟုဆိုသည်။

 
တောင်မင်းကုလားစစ်ဘေးရှောင်စခန်းတွင်ကျောက်တော် ယိုးချောင်းအထက်ဘက်ကျေးရွာများမှ စစ်ဘေးရှောင်ဦးရေ ၄၀၀ ကျော်ရှိပြီး  ဝါးတောင်စစ်ဘေးရှောင်စခန်းတွင်လည်းကျောက်တော် ယိုးချောင်းအထက်ဘက် ကျေးရွာများမှ စစ်ဘေးရှောင်ဦးရေ၈၉၀ ကျော်ရှိသည်။

“အခုကနိုင်ငံရေးအခြေအနေလည်း မကောင်းတော့ တကယ်လို့ သူတို့ပြန်ခိုင်းရင်လည်း ကျနော်တို့က မပြန်နိုင်ကြောင်းကို တင်ပြမယ်လို့ကျနော်တို့က စီစဉ်ထားပါတယ်။ စစ်ရေးတင်းမာမှုတွေလည်း ရှိနေတယ်လေ။အဲဒါကြောင့် မပြန်နိုင်တဲ့အကြောင်းကို ပြောမယ်လို့ ကျနော်တို့ကြားမှာဆွေးနွေးထားပါတယ်။ မြို့နယ်က ဖြစ်ဖြစ် ခေါ်ရင် အဲလိုပြောမယ်လို့စဉ်းစားထားကြပါတယ်”ဟုပြောသည်။

ကန်စောက်ကျေးရွာဘုန်းတော်ကြီးကျောင်းရှိ စစ်ဘေးရှောင်စခန်းတွင်မူကျောက်တော်မြို့နယ် ပြိုင်းတိုင်း၊ တင်းမ၊ မီး၀နှင့်ချင်းပြည်နယ် ပလက်၀မြို့နယ် စိမ့်စင်းကျေးရွာဘက်တို့မှ စစ်ဘေးရှောင်ဦးရေ ၂၀၀ကျော်ရှိသည်ဟု သိ၇သည်။

သူတို့သည်ကျောက်တော်အထက်ဘက်မှဖြစ်ကြပြီး ယင်းဒေသများတွင် လက်ရှိ တကျော့ပြန် တိုက်ပွဲများပြင်းထန်နေသလို ကုန်းလမ်းနှင့်ရေလမ်းတို့ကိုပါ စစ်ကောင်စီက ပိတ်ထား၍နေရပ်ပြန်ရန် လုံး၀မဖြစ်နိုင်သေးဟုစခန်းတာဝန်ခံ ဦးထွန်းထွန်းနိုင်က နိရဥ္စရာကို ပြောသည်။

“ကျနော်တို့ပလက်၀မြို့နယ်ဘက်မှာ တိုက်ပွဲလည်း ရှိသလို ကျနော်တို့ရွာနီးပတ်ဝန်းကျင်မှာကန့်သတ်ထားတဲ့နေရာတွေလည်း ရှိတယ်လေ။ အဲဒါကြောင့် အခုပြန်မယ်ဆိုရင်ကျနော်တို့ဟာ တကယ့်တကယ် မလုံခြုံသလိုတော့ တွေ့မှာပဲ။ပြန်ဖို့အစီအစဉ်လည်း အခုလက်ရှိတော့ မရှိသေးဘူး”ဟု ပြောသည်။

ကျောက်တော်မြို့ပေါ်ရှိစစ်ဘေးရှောင်စခန်း ၁၁ ခုကိုမူ နေရပ်ပြန်မည့်ကိစ္စနှင့်ပတ်သက်ပြီးမည်သည့်အကြောင်းကြားမှုမျိုးမျှ မရှိသေးဟု စခန်းတာဝန်ခံတစ်ဦးဖြစ်သူ ဦးမောင်အေးစောကပြောသည်။

“မြို့ပေါ်မှာတော့ကျနော်တို့ကွပ်ကဲမှုအောက်မှာရှိတဲ့ စခန်း ၁၁ ခုကိုတော့ ပြန်လို့ မပြောသေးဘူး”ဟု ပြောသည်။

ယခုနေရပ်ပြန်ခိုင်းသည့်စစ်ဘေးရှောင်စခန်း ၃ခုအပါအဝင် ကျောက်တော်မြို့နယ်တွင်းရှိ စစ်ဘေးရှောင်စခန်းများမှ စစ်ဘေးရှောင်များသည်ပြီးခဲ့သည့် ၂၀၁၈ ခုနှစ်မှ ၂၀၂၀ ပြည့်နှစ်အတွင်း ရက္ခိုင့်တပ်တော်(AA)နှင့် စစ်တပ်တို့တိုက်ပွဲများပြင်းထန်ခဲ့မှုကြောင့် နေရပ်စွန့်ခွာထွက်ပြေးတိမ်းရှောင်လာခဲ့ကြခြင်းဖြစ်သည်။