ကျောက်တော် ခေါင်းတုတ်ကျေးရွာက ကိုယ်ဝန်နေ့စေ့လစေ့အမျိုးသမီးတစ်ဦး လက်နက်ကြီးသံကြောင့်နှလုံးရပ်သေဆုံး

နိရဥ္စရာ၊ စက်တင်ဘာ ၂၀/၂၀၂၂

ရခိုင်ပြည်နယ် ကျောက်တော်မြို့ ခေါင်းတုတ်ကျေးရွာမှ ကိုယ်ဝန်နေ့စေ့လစေ့အမျိုးသမီး ၁ ဦးသည် လက်နက်ကြီးပစ်ခတ်သံများကြောင့်  နှလုံးရပ် သေဆုံးသွားခဲ့သည်ဟု သိရသည်။

သေဆုံးသွားသူမှာ ခေါင်းတုတ်ကျေးရွာမှ အသက် ၃၁ နှစ်အရွယ် ဒေါ်မယောင်းဖြစ်ပြီး ယနေ့ စက်တင်ဘာလ ၂ဝ ရက် ညဉ့် ၁ နာရီခန့်တွင် စကခ(၉) စစ်ဆင်ရေးကွပ်ကဲမှုဌာနချုပ်မှ လက်နက်ကြီး ပစ်သံများကိုကြားရပြီးနောက် လန့်ဖြတ်ကာ နှလုံးရပ် သေဆုံးသွားခြင်းဖြစ်သည်ဟု ရွာသားတစ်ဦးက ပြောသည်။

“လက်နက်ကြီးကျည်ထိတာမဟုတ်ဘူး။ သူက ကိုယ်ဝန်နေ့စေ့လစေ့ဆိုတော့ လက်နက်တွေ ပစ်ခတ်သံတွေကြားပြီး လန့်ဖြတ်ပြီးတော့ သေသွားတာပါ”ဟု ပြောသည်။

လက်ရှိတွင် သေဆုံးသွား၏ရုပ်အလောင်းကို ယနေ့နေ့လယ်တွင် ရွာရှိ သုသာန်တွင် မြေမြှုပ်သင်္ဂြိုလ်လိုက်ပြီဟု သိရသည်။

ပလက်ဝသို့စစ်ကူပို့မည့်စစ်သားအများအပြားတင်ဆောင်လာသည့် စစ်ဇက်ရေယာဉ် ၂ စီးသည် ကျောက်တော်မြို့နယ် နာဂရာကျေးရွာအနီး စကခ(၉) တပ်ထိန်းစခန်းအနီး၊ ကင်းစခန်းရှေ့  ကုလားတန်မြစ်ကမ်းအနီးတွင် ရပ်နားနေချိန် ယမန်နေ့ စက်တင်ဘာ ၁၉ ရက် ည ၆ နာရီခန့်က ရက္ခိုင့်တပ်တော်( AA)၏ လက်နက်ကြီးဖြင့် ပစ်ခတ်တိုက်ခိုက်ခြင်းကိုခံခဲ့ရပြီး စကခ (၉) လက်နက်ကြီးများဖြင့် တစ်ညဉ့်လုံးလိုလို လက်နက်ကြီးများ ပစ်ခတ်နေခဲ့သည်ဟု  ဒေသခံများက ပြောသည်။

 “ ပစ်တာက ဇက်ရေယာဉ်တွေကရော၊ စကခ (၉)ကရော လက်နက်ကြီး၊ လက်နက်ငယ်တွေနဲ့  အနီးဝန်းကျင်တွေကို အချိန်တော်တော်များ ပစ်ခတ်ခဲ့ပါတယ်။ စကခ(၉) ဆိုရင် ဒီနေ့ မနက် ညဉ့် ၁ နာရီခန့်အထိ လက်နက်ကြီးတွေ ပစ်ခတ်ခဲ့ပါတယ်။ အဲဒီမှာ လန့်ဖြတ်ပြီးသေတာပါ”ဟု ဒေသခံတစ်ဦးက ပြောသည်။

ယင်းသို့ ပစ်ခတ်ခဲ့မှုကြောင့် နဂရာကျေးရွာပြင်ဘက် ကမ်းနားဘက်ရှိ ဦးထွန်းအေး၏နေအိမ်သို့ မပေါက်ကွဲသေးသည့် လက်နက်ကြီးကျည်တစ်လုံး ကျရောက်ခဲ့သည်ဟု ရွာခံအမျိုးသမီးတစ်ဦးက ပြောသည်။

ယနေ့ ညနေ ၄ နာရီခွဲခန့်ကလည်း နဂရာကျေးရွာထဲသို့ စကခ(၉)မှပစ်လိုက်သည့် လက်နက်ကြီးသည် နေအိမ်တစ်လုံးသို့ကျရောက်ပေါက်ကွဲ၍ မိသားစုဝင် ၄ ဦး ဒဏ်ရာအပြင်းအထန်ရရှိသွားခဲ့သည်ဟု ဒေသခံများက ပြောသည်။

ဒဏ်ရာရရှိသွားသူများမှာ အဆိုပါကျေးရွာမှ ဒေါ်မယဉ်ဦး (၆၅ နှစ်)၊ သူမ၏သမီး ဒေါ်ဦးယဉ်သန်း (၄၂ နှစ်)၊ ဒေါ်ဦးယဉ်သန်း၏သားများဖြစ်သော ၁ဝ တန်းကျောင်းသား မောင်မျိုးနိုင်ဝင်း (၁၇ နှစ်)နှင့် ၆ တန်းကျောင်းသား မောင်မင်းဟိန်းစိုး (၁၃ နှစ်)တို့ဖြစ်ကြသည်။