တောင်ကုတ် ကိုင်းရှည်လူမှုကူညီရေးအသင်းဥက္ကဋ္ဌနှင့်ဒုဥက္ကဋ္ဌကို စစ်ကောင်စီက စစ်ဆေးမေးမြန်းစရာရှိသည်ဟုဆိုကာ ခေါ်ယူပြီး ပြန်လွှတ်ပေးခြင်းမရှိသေး

ရေးသူ: Web Master
| ရက်စွဲ: ၂၁ စက်တင်ဘာ ၂၀၂၂
| ကြည့်ရှုသူ: 8.7k

နိရဉ္စရာ၊ စက်တင်ဘာ ၂၁/၂၀၂၂

ရခိုင်ပြည်နယ်၊ တောင်ကုတ်မြို့ကိုင်းရှည်လူမှုကူညီရေးအသင်းဥက္ကဋ္ဌနှင့် ဒုဥက္ကဋ္ဌ တို့ ၂ ဦးကို စက်တင်ဘာ ၁၉ ရက်နေ့က စစ်ကောင်စီတပ်က စစ်ဆေးမေးမြန်းရန်ခေါ်ယူပြီး ယနေ့ထိ ပြန်လွှတ်ပေးခြင်းမရှိသေးကြောင်း ကိုင်းရှည်ကျေးရွာဥက္ကဋ္ဌက ပြောသည်။

၎င်းတို့ ၂ ဦးမှာ ကိုင်းရှည်လူမှုကူညီရေးအသင်း ဥက္ကဋ္ဌ ဦးမြင့်လှိုင် (၅၃) ၊ ဒုဥက္ကဋ္ဌ ဦးဇော်မင်းထွန်း( ၄၆) တို့ဖြစ်သည်။

၎င်းတို့နှစ်ဦးကို မေးမြန်းစစ်ဆေးစရာရှိသည်ဟုဆိုကာ စက်တင်ဘာ ၁၉ ရက်နေ့က စကခ(၅) တပ်မကို ခေါ်.ယူသွားခဲ့ကြောင်း ကိုင်းရှည်ကျေးရွာဥက္ကဋ္ဌလည်းဖြစ် ထိန်းသိမ်းခံထားရသူ ဦးဇော်မင်းထွန်း၏ အစ်ကိုဖြစ်သူက ပြောသည်။

"လူမှုကူညီရေးက နှစ်ယောက်ကိုတော့ မေးမြန်းစစ်ဆေးစရာရှိတယ်ဆိုပြီး လူမှုကူညီရေး ဥက္ကဋ္ဌနဲ့ ဒုဥက္ကဋ္ဌတို့ကို ခေါ်ထားတာရှိပါတယ်။ နှစ်ညအိပ်ရှိပါပြီ။ မနက် ၈ နာရီလောက်မှာ သူတို့ သွားတွေ့တာပါ စစ်ဆေးစရာရှိတယ်ဆိုပြီး ခေါ်လို့ ၊ မစစ်ဆေးရသေးလို့ မလွတ်သေးဘူးလို့ သိရပါတယ်" ဟု ပြောသည်။

ဖမ်းဆီးခံရသူနှစ်ဦးအနေနှင့် အပြစ်တစ်စုံတစ်ရာလုပ်ထားခြင်း ရှိမရှိနှင့် ခေါ်ယူသွားသည့် အကြောင်းအရင်းကို သူ့အနေနှင့် မသိရှိကြောင်း ကိုင်းရှည်ကျေးရွာဥက္ကဋ္ဌက ပြောသည်။

လက်ရှိမှာ ၎င်းတို့နှစ်ဦးအား စစ်ဆေးမှုမပြုလုပ်ရသေး၍ စကခ(၅) တွင်ထိန်းသိမ်းထားဆဲဖြစ်ကြောင်း သူက ဆက်ပြောသည်။

"ရဲစခန်းမှာမဟုတ်ပါဘူး။ တပ်မှာ ထိန်းသိမ်းထားတယ်လို့ပြောပါတယ်။ တပ်မမှာလို့ သိရပါတယ်။ လက်ရှိ မစစ်ဆေးရသေးလို့ စောင့်ဆိုင်းနေရတယ်လို့ ပြောပါတယ် ။ သူတို့ကောင်းကောင်းမွန်မွန် ရှိတယ်လို့လည်း သိရပါတယ်"ဟု ပြောသည်။

စက်တင်ဘာလ (၁၇) ရက်နေ့က တောင်ကုတ်ဒေသခံ ၂ ဦး၊ (၁၈) ရက်နေ့က နောက်ထပ် ၃ ဦးတို့ကိုဖမ်းဆီးခဲ့ပြီး ၎င်းတို့အထဲမှ နှစ်ဦးကို ပြန်လွှတ်ပေးခဲ့ကြောင်း သိရသည်။

တောင်ကုတ်မြို့အနီး စစ်ကောင်စီရေတပ်ဇက်ရေယာဉ်ကို အေအေက လက်နက်ကြီးနှင့် ပစ်ခတ်ခဲ့ပြီးနောက် တောင်ကုတ်မြို့တွင် ဒေသခံများအား စစ်ဆေးမှုများပြားနေပြီး နေအိမ်များကိုလည်း ဝင်ရောက်စစ်ဆေးမှုများဆက်တိုက်ရှိနေကြောင်း သိရသည်။ (NN-7)