နိရဥ္စရာ၊ စက်တင်ဘာ ၂၂/၂၀၂၂

ရခိုင်ပြည်နယ်ကျောက်တော်မြို့ရှိ စကခ(၉)အတွင်းစိုက်ပျိုးထားသည့်စပါးဧက ၂၀၀ခန့်ကို တိုက်ပွဲများကြောင့် ရိတ်သိမ်းပေးမည့်သူ မရှိဖြစ်နေသဖြင့်   ဝိုင်းကူရိတ်သိမ်းပေးရန်တပ်အနီးရှိ မူဆလင်အုပ်ချုပ်ရေးမှူးအချို့အား စစ်တပ်ကခေါ်ယူ ပြောကြားခဲ့သည်ဟုသိ၇သည်။

အဆိုပါတပ်အနီးရှိ မူဆလင်ကျေးရွာများဖြစ်သည့်၇တနာပုံ၊ ခေါင်းတုတ်၊ ပလောင်၊ အလယ်ကျွန်းနှင့် စံကားတောင်စသည့်ကျေးရွာများမှ အုပ်ချုပ်ရေးမှူးများကို စက်တင်ဘာလ ၂၀ ရက် နံနက် ၈နာရီခွဲတွင် စကခ(၉)သို့ဝင်သည့်ဂိတ်၀သို့ ခေါ်ယူကာ ဗိုလ်ကြီးတစ်ဦးကပြောကြားခဲ့ခြင်းဖြစ်သည်ဟု အမည်မဖော်လိုသည့် မူဆလင်ရွာသားတစ်ဦးကနိရဥ္စရာကို ပြောသည်။“၁၁ လပိုင်းမှာကျနော်တို့ကို အကူအညီပေး၇မယ်လို့ ပြောပါတယ်။သူတို့ရဲ့ စပါးတွေကိုရိတ်သိမ်းဖို့လေ။ အဲဒါတော့ ကျနော်လည်း လုပ်အားပေးနိုင်မယ်လို့ကျနော်မပြောနိုင်သေးဘူးလို့။ အဲဒါက ရပ်မိရပ်ဖနဲ့ ဆိုင်ပါတယ်လို့။အဲဒီအချိန်မှာ ရပ်မိရပ်ဖက သဘောတူမယ်ဆိုရင်တော့ လုပ်အားပေးနိုင်မယ်၊မဟုတ်ရင် ကျနော် မပေးနိုင်ဘူးလို့ ပြောခဲ့ပါတယ်”ဟု ပြောသည်။

ယခုနှစ်တွင် စကခ (၉) ဧရိယာအတွင်း ဧက ၂၀၀ ခန့် စပါးစိုက်ပျိုးထားခြင်းဖြစ်ပြီးယင်းစပါးများကို လာမည့် နိုဝင်ဘာလအတွင်း ရိတ်သိမ်း၇မည် ဖြစ်နေရာ တိုက်ပွဲများကြောင့်ရိတ်သိမ်းရန် အခက်အခဲဖြစ်နေသည်ဟု သိရှိ၇သည်။

“  တိုက်ပွဲတွေဖြစ်နေတယ်။လက်နက်ကြီးကျည်တွေကျနေတယ်။ မိုင်းတွေပေါက်ပြီး လူတွေသေနေတယ်။ ဘယ်သူသွားလုပ်ရဲမလဲ။ အခုကျနော်တို့လည်းကူညီနိုင်မှာ မဟုတ်ဘူး” ဟု ၎င်းက ပြောသည်။

၎င်းခေါ်ယူသည့် စစ်ကောင်စီ ဗိုလ်ကြီးဖြစ်သူမှာ သူတို့ စပါးအားကူညီရိတ်သိမ်းပေးလျှင် စစ်တပ်ကလည်း မူဆလင်ကျေးရွာများအား ပြန်ကူညီပေးမည်ဖြစ်ကြောင်း၊၎င်းအကူအညီများအထဲတွင်  ကျန်းမာရေးနှင့် ပတ်သက်ပြီး အသွားအလာများခွင့်ပြုပေးမည်ဖြစ်သလို  ရွာတွင် စားဝတ်နေရေးအခက်ခဲ၊ကျန်းမာရေးအခက်အခဲတစ်ခုခုဖြစ်လျှင် သူတို့ အနေဖြင့် နည်းနည်းပါးပါး ကူညီပေးမည်ဟု ပြောကြားခဲ့ကြောင်း၊ လက်တွေ့တွင်ကူညီပေးမည် မဟုတ်ကြောင်း ၎င်းက ပြောသည်။

 ၁၀မိနစ်ခန့် ကျေးရွာအုပ်ချုပ်ရေးမှူးများသည် ၎င်းဗိုလ်ကြီးဖြစ်သူနှင့်အပြန်အလှန် ပြောဆိုခဲ့ကြပြီးနောက် ကျေးရွာအုပ်ချုပ်ရေးမှူးများသည်လည်း နေရပ်ရွာသို့  အသီးသီး ပြန်လာခဲ့ကြသည်ဟုသိ၇သည်။

 လက်ရှိတွင် စကခ(၉)တပ်အနီးတွင် စစ်ဇက်ရေယာဉ် ၂စီးသည် စက်တင်ဘာလ ၁၉ ရက် ညနေပိုင်း၌ ရက္ခိုင့်တပ်တော်(AA)၏တိုက်ခိုက်ခြင်းကိုခံခဲ့၇ပြီးနောက် လက်နက်ငယ်၊လက်နက်ကြီး ပစ်ခတ်သံများကို ဆက်တိုက်ကြားနေရသဖြင့် လူထုအတွင်း စိုးရိမ်မှုမြင့်တက်နေချိန်တွင်၎င်းနေရာများသို့ သွားရောက် စပါးရိတ်သိမ်းရန် မဖြစ်နိုင်ဟု ၎င်းတို့က ပြောကြားသည်။