ကြာသပတေး၊ မတ်လ ၂၈ရက်၊ ၂၀၂၄

ကျောက်ဖြူတွင် စစ်သား ၁ဦး ဓားဖြင့်ထိုးသတ်ခံရ၍ ပွဲချင်းပြီးသေဆုံး


  • ရေးသူ: Web Master
  • | ရက်စွဲ: ၂၃ စက်တင်ဘာ ၂၀၂၂
  • | ကြည့်ရှုသူ: 3.5k

နိရဉ္စရာ၊ စက်တင်ဘာ ၂၃/၂၀၂၂

ရခိုင်ပြည်နယ်၊ ကျောက်ဖြူမြို့နယ်၊ ဂုံးချွိန်ကျေးရွာ၊ ကံကော်တောဘုရားအနီးတွင် အမည်မသိ လူတစ်စုက ဓားဖြင့်ထိုးသတ်၍ စစ်ကောင်စီတပ်သား ၁ဦး ပွဲချင်းပြီးသေဆုံးသွားကြောင်း ဒေသခံများက ပြောသည်။

ယနေ့ စက်တင်ဘာ ၂၃ ရက်နေ့ နံနက် ၉ နာရီခန့်က ဆိုင်ကယ်ဖြင့်ဈေးဝယ်ပြီးပြန်လာသည့် စစ်ကောင်စီတပ်သားကို လူတစ်စုက ဓားဖြင့်ထိုးသတ်၍ နေရာမှာပင် ပွဲချင်းပြီး သေဆုံးသွားခြင်း ဖြစ်ကြောင်းအမည်မဖော်လိုသူ တစ်ဦးကပြောသည်။

"ကံ့ကော်တောဘုရားနားက တာဝါတိုင်နားမှာ အသတ်ခံရတာပါ။ CNPC ရုံးအထက်က တောင်ကုန်းမှာတပ်စွဲနေတဲ့ တပ်သား ၂၀ လောက်ရှိမယ်။ အဲ့ဒီကနေ  ဈေးထွက်ဝယ်ပြီး အပြန်မှာ အသတ်ခံရတာ ပွဲချင်းပြီးပဲ။ လူတစ်စု သတ်သွားတာ ဘယ်သူသတ်သွားလဲ မပြောတတ်ဘူး"ဟု ပြောသည်။

စစ်ကောင်စီတပ်သား သတ်ဖြတ်ခံရပြီးနောက် စစ်တပ်က နေအိမ်များကိုဝင်ရောက် စစ်ဆေးမှုများလုပ်ခဲ့ပြီး ကျေးရွာသားတချို့မှာလည်း ဖမ်းဆီးစစ်ဆေးခံနေကြောင်း ဒေသခံများက ပြောဆိုသော်လည်း အရေအတွက်အတိအကျကို မသိရသေးပေ။

အဆိုပါ စစ်ကောင်စီတပ်သားအလောင်းကို စစ်တပ်က နေ့လယ်  ၂ နာရီခန့်တွင် ယူဆောင်သွားပြီဟု ဒေသခံတစ်ဦးက ပြောသည်။

"အလောင်းကို နေ့လယ်ကနေ တပ်ကသယ်သွားပါပြီ။ ရွာထဲမှာတော့ ဆူသွားတာပေါ့။ သူတို့က ဝင်စစ်တာတွေ ဖမ်းတာတွေမလုပ်ခင်ကနေ အခုလိုဖြစ်တော့မှာကိုသိနေတယ်။ ထင်တဲ့အတိုင်းပါပဲ။ စစ်သားတွေ ၅၀ ကျော်တယ်။ လာပြီး စစ်တာ၊ဖမ်းတာတွေရှိပါတယ်။ ဖမ်းခံရတဲ့ အရေအတွက်အတိအကျတော့ ကျနော်လည်းမသိပါဘူး"ဟု ပြောသည်။

ရခိုင်တွင်စစ်ရေးတင်းမာမှုများနှင့်အတူ မဆိုင်သည့် အရပ်သားများကို စစ်ကောင်စီတပ်က ဥပဒေကို လိုသလို အသုံးချကာ ဖမ်းဆီးပြီး နှိပ်စက်မှုများရှိနေသဖြင့် ဒေသခံပြည်သူများအကြားတွင် မကျေနပ်မှုများတိုးပွားနေပြီး ယခုဖြစ်စဉ်သည် ထိုအကျိုးဆက်ကြောင့် ဖြစ်ပွားခြင်းဖြစ်သည်ဟု နိုင်ငံရေးသမားတစ်ဦးက ပြောဆိုသည်။ (NN-7)

ဆက်စပ် သတင်းများ