ကျောက်တော်ရှိ သိန်းဆန်းတည်းခိုခန်းသို့ လက်နက်ကြီးကျည်ကျရောက်ပေါက်ကွဲမှုကြောင့် တည်းခိုခန်းပျက်စီးပြီး တည်းခိုနေသူတစ်ဦး ဒဏ်ရာရ

နိရဥ္စရာ၊ စက်တင်ဘာ ၂၄ /၂ဝ၂၂

ရခိုင်ပြည်နယ် ကျောက်တော်မြို့ရှိ သိန်းဆန်းတည်းခိုခန်းသို့ လက်နက်ကြီးကျည်ကျရောက် ပေါက်ကွဲမှုကြောင့် တည်းခိုခန်းပျက်စီးသွားပြီး တည်းခိုနေသူတစ်ဦးလည်း ထိခိုက်ဒဏ်ရာ ရရှိသွားသည်ဟု သိရသည်။

ကျောက်တော်မြို့ ကမ်းနားလမ်းတွင်တည်ရှိသော သိန်းဆန်းတည်းခိုခန်းသို့ ယနေ့ စက်တင်ဘာလ ၂၄ ရက် ညဥ့် ၁ နာရီခွဲဲခန့်က လက်နက်ကြီးကျည်ကျရောက်ပေါက်ကွဲခဲ့မှုကြောင့် အပေါ်ဆုံးအထပ်၏ ကြမ်းပြင် ပေါက်ထွက်သွားခဲ့ပြီး အလယ်ထပ်၏ပြတင်းမှန်များလည်း ကွဲအက်ပျက်စီးသွားခဲ့သည်ဟု သွားရောက်ကြည့်ရှုခဲ့သူများက ပြောသည်။

သွားရောက်ကြည့်ရှုခဲ့သည့် မြို့ခံတစ်ဦးက “အပေါ်ထပ်ရဲ့ကြမ်းပြင်က ထုတ်ချင်းပေါက်သွားတယ်။ ပြီးတော့ အလယ်ထပ်က ပြတင်းမှန်တွေလည်း ကွဲပြီး ပျက်သွားတယ်။ တော်တော်ကြောက်ဖို့ ကောင်းတယ်”ဟု ပြောသည်။

တည်းခိုခန်းအတွင်း တည်းခိုနေသူတစ်ဦးလည်း လက်နက်ကြီးကျည်စထိမှန်ခဲ့မှုကြောင့် ထိခိုက်ဒဏ်ရာများရရှိခဲ့ပြီး လက်ရှိတွင် ကျောက်တော်ဆေးရုံသို့ပို့ဆောင်ထားရသည်ဟု မြို့ခံများက ပြောသည်။

အလားတူ သိန်းဆန်းတည်းခိုခန်းအနီး နေအိမ်များတွင်လည်း လက်နက်ကြီးကျည်စများ ထိမှန်ပျက်စီးမှုများရှိခဲ့သည်ဟု ဆိုကြသည်။

ယမန်နေ့ စက်တင်ဘာလ ၂၃ ရက် ည ၁၁ နာရီကျော်မှစတင်ကာ ကျောက်တော်တပ်မဘက်က လက်နက်ကြီးများတောက်လျှောက်ပစ်နေခဲ့သလို အပေါက်ဝရွာအနီး ၅၃၉ တပ်ကကလည်း လက်နက်ကြီးများ ပစ်ခတ်နေခဲ့သည်ဟု ဒေသခံများက ပြောသည်။

၅၃၉ တပ် အနီးအနားမှ ဒေသခံတစ်ဦးက “မနေ့ကညက ၅၃၉ က တော်တော်လေးပစ်ခဲ့တယ်။ ဘယ်ကိုပစ်လို့ပစ်မှန်းလဲမသိဘူး”ဟု ပြောသည်။

ကျောက်တော်တွင် ယမန်နေ့က တိုက်ပွဲဖြစ်ပွားမှုလည်းမရှိခဲ့ဘဲ ယခုကဲ့သို့ လက်နက်ကြီးများ တောက်လျှောက်ပစ်နေခဲ့သည့်အတွက် ဒေသခံများ စိုးရိမ်ကြောက်လန့်ခဲ့ရသည်ဟု သိရသည်။

Photos - CJ