ဘူးသီးတောင်တွင် လက်နက်ကြီးထိမှန် ဒဏ်ရာရရှိခဲ့သည့် ကလေးငယ်ကို မောင်တောဆေးရုံသို့ ပို့ဆောင်ရ

နိရဉ္စရာ၊ စက်တင်ဘာ ၂၄/၂၀၂၂

ဘူးသီးတောင်မြို့နယ်၊ သိမ်တောင်(မူဆလင်)ရွာကို စက်တင်ဘာ ၂၃ ရက် ညနေ ၆ နာရီခွဲအချိန်တွင် လက်နက်ကြီးကျရောက်ခဲ့သဖြင့် အသက် (၇) နှစ်အရွယ် မောင်အာမာန်ဖာရူစ်မှာ ပြင်းပြင်းထန်ထန် ဒဏ်ရာရရှိခဲ့သည်ဟု သိရသည်။

အဆိုပါ ကလေးငယ်ကို ယနေ့တွင် ဘူးသီးတောင်မြို့နယ်ဆေးရုံက မောင်တောခရိုင်ဆေးရုံးသို့  ပို့ဆောင်လိုက်ရသည်ဟု သိမ်တောင်ရွာမှာ ဒေသခံတစ်ဦးက ပြောသည်။

"မနေ့က ညနေ ၆ ခွဲလောက်ရှိမယ် လက်နက်ကြီးကျလို့ အဲ့ဒီကလေးမှာ ဒဏ်ရာရသွားတယ်။  ပေါင်နားကို ထိသွားတယ်လို့ သိရပါတယ်" ဟု ပြောသည်။

၎င်းကလေးငယ်၏ ဒဏ်ရာမှာ အရိုးထိသွားခဲ့သဖြင့် ဘူးသီးတောင်ဆေးရုံတွင် အရိုးအထူးကုမရှိ၍ ယနေ့စက်တင်ဘာလ  ၂၄ ရက်နေ့ မောင်တောဆေးရုံသို့ ထပ်မံပို့ဆောင်လိုက်ရကြောင်း ဘူးသီးတောင်မြို့ခံ တစ်ဦးက နိရဉ္စရာ ပြောသည်။

၄င်းက ''မနေ့က ဘူးသီးတောင်ဆေးရုံမှာပါ ။ ဘူးသီးတောင်ဆေးရုံမှာ အရိုးအထူးအကုမရှိလို့ ဒီနေ့ မောင်တောက ခရိုင်ဆေးရုံကို ပို့လိုက်ပါတယ်''ဟု ပြောသည်။

ရခိုင်ပြည်နယ်တွင် စစ်ကောင်စီတပ်က ပစ်ခတ်သည့် လက်နက်ကြီးကျည်များ လူနေရပ်ကွက်၊ ကျေးရွာများကို ကျရောက်ပေါက်ကွဲ၍ သြဂုတ်လ ၂၈ နေ့မှ ယနေ့အထိ သေဆုံးသူ ၃ ဦးအထိရှိခဲ့ပြီး ဒဏ်ရာရသူ ၁၅ဦးခန့် ရှိကြောင်း သိရသည်။

သြဂုတ်လ (၂၈)ရက်နေ့တွင် ကျေးရွာပတ်ဝန်းကျင်တွင် မည်သည့်တိုက်ပွဲမှ ဖြစ်ပွားမှုမရှိပဲ ပြည်သူများကို ပစ်မှတ်ထားကာ လက်နက်ကြီးဖြင့်ပစ်ခတ်မူကြောင့် မြောက်ဦးမြို့နယ်၊ကင်းဆိပ်ရွာမှ ကလေးငယ်အပါအဝင် အရပ်သား ၃ ဦး သေဆုံးပြီး (၉) ဦးဒဏ်ရာရခဲ့သည်။

ယမန်နေ့ စက်တင်ဘာလ ၂၄ ရက်နေ့ညကလည်း စစ်ကောင်စီကလက်နက်ကြီးဖြင့်ပစ်ခတ်သဖြင့် ကျောက်တော်မြို့ သိန်းဆန်းတည်ခိုခန်းတွင် တည်းခိုနေသူ တစ်ဦးကို ထိမှန်ဒဏ်ရာ ရရှိခဲ့သည်။