- Web Master
- ၂၀ ဧပြီ ၂၀၂၄
နိရဉ္စရာ၊ စက်တင်ဘာ ၂၆/၂၀၂၂
ကျောက်တော်မြို့ အခြေစိုက် စစ်ကောင်စီ စကခ(၉) မှ ပစ်ခတ်သော လက်နက်ကြီးကျည် နာဂရာကျေးရွာထဲက အိမ်တစ်အိမ်ကို ထိမှန်ခဲ့သဖြင့် အသက် (၇) နှစ်အရွယ် ကလေးငယ် တစ်ဦးသေဆုံးသွားကြောင်း သတင်းရရှိသည်။
ယမန်နေ့ ည စက်တင်ဘာ ၂၅ ရက် ည ၁၁ နာရီကျော်အချိန်တွင် စစ်ကောင်စီ စကခ (၉)က ပစ်ခတ်သောလက်နက်ကြီးကျည်သည် နာဂရာရွာထဲရှိ ဦးရွှေသန်းမောင်၏ အိမ် ကို ကျရောက်ပေါက်ကွဲပြီး ဦကျော်မောင်၏ သားဖြစ်သူ မောင်ကိုနိုင်(ခ) မောင်ကြီး(၇ နှစ်)သည် သေဆုံးသွားခဲ့သည်ဟု နာဂရာကျေးရွာသားတစ်ဦးက ပြောသည်။
" ဦးကျော်မောင်တို့ မိသားစု ဘေးနားကအိမ်မှာသွားပြီးဗုံးခိုနေကြတာကို လက်နက်ကြီးအိမ်ထဲကို လာကျတာပါ။ အိမ်ခေါင်ကကျလာပြီးပေါက်တာပါ။ သူတို့က အမွှာတွေပါ။ အခုက မောင်ကြီးဆုံးတာပါ။ ညဉ့် ၁ နာရီကျော်မှာ ဆုံးသွားပါတယ်"ဟု ပြောသည်။
လက်နက်ကြီးများပစ်ခတ်မှုကြောင့် ဦးရွှေသန်းမောင်၏ နေအိမ်တွင် အိမ်နားဝန်းကျင်မှ မိသားစုဝင်များ လာရောက်ခိုလှုံနေချိန် ယခုကဲ့သို့ လက်နက်ကြီးကျည် ကျရောက်ခဲ့ကာ ကလေးငယ် ထိမှန် သေဆုံးသွားခဲ့ရခြင်းဖြစ်ပြီး တခြားသူများ ထိခိုက် ဒဏ်ရာရရှိမှုမရှိဟု ၎င်းကျေးရွာသားများကဆိုသည်။
သေဆုံးသွားသည့် ကလေးငယ်ကို ညနေ့ စက်တင်ဘာ ၂၆ နံနက် ၁၁ နာရီအချိန်တွင် သင်္ဂြိုလ်မည်ဟု ၎င်းက ပြောသည်။
" စကခ ၉ က လက်နက်ကြီးပစ်တာက ရေတွက်လို့မရပါဘူး။ အဲ့ဒီတစ်အိမ်ပဲကျတာပါ။ ဒါပေမယ့် တခြား အိမ်နားတွေမှာအများကြီးကျပါတယ်။ အခုကျည်က ပေါက်ကွဲပြီး ကလေးဆီကိုပဲ ထိတာပါ။ ည ၁ နာရီလောက်မှာ ဆုံးသွားပါပြီ။ ဒါကြောင့် ဒီနေ့ သင်္ဂြိုလ်မှာပါ။ မနက် ၁၁ နာရီ ကို စီစဉ်ထားကြပါတယ်"ဟု ပြောသည်။
ယမန်နေ့ကလည်း နာဂရာကျေးရွာတွင် လက်နက်ကြီးထိမှန်ကာ နေအိမ်တစ်လုံးပျက်စီးသွားပြီး စက်တင်ဘာ ၂၄ ရက်ကလည်း ရွာဘောလုံးကွင်းတွင် လက်နက်ကြီးတစ်လုံး ကျရောက်ပေါက်ကွဲပြီး ကျောင်းအနီးမှနေအိမ်တစ်လုံးလည်း ထိခိုက်ပျက်စီးသွားခဲ့သည်။
စက်တင်ဘာ ၂၁ ရက်နေ့က အိမ်အနီးသို့ လက်နက်ကြီး ကျရောက်ပေါက်ကွဲ၍ မိသားစု ၄ ဦးထိခိုက် ဒဏ်ရာရရှိခဲ့သည်။
စစ်ကောင်စီတပ် စကခ(၉) မှ နေ့စဉ်ဆိုသလို လူနေကျေးရွာများကို တမင်ရည်ရွယ် ပစ်ခတ်နေခြင်းဖြစ်ပြီး ယခုကဲ့သို့ ထိခိုက်ပျက်စီးမှုနှင့် သေဆုံးမှုများ ဆက်တိုက်ရှိလာခြင်းဖြစ်သည်။
ဘူးသီးတောင်မြို့နယ် သိမ်တောင်ကျေးရွာတွင်လည်း စက်တင်ဘာ ၂၃ ရက်နေ့က လက်နက်ကြီးထိမှန်ကာ ၇ နှစ်အရွယ် ကလေးငယ်တစ်ဦး သေဆုံးခဲ့ရပြီး အရပ်သား နှစ်ဦး ထိခိုက်ဒဏ်ရာ ရရှိခဲ့သည်။ (NN-7)