မင်းပြားတွင် စစ်တပ်ဇက်ရေယာဉ်နှစ်စီးတိုက်ခိုက်ခံရပြီးနောက် စစ်ကောင်စီက လူနေကျေးရွာများကို အဓိကထားပစ်ခတ်နေ


နိရဉ္စရာ၊ စက်တင်ဘာ ၂၆/၂၀၂၂

ရခိုင်ပြည်နယ်၊ မင်းပြားမြို့နယ် ၊ ခေါင်းလောင်းချောင်း ကျေးရွာအနီးတွင် စစ်တပ်ဇက်ရေယာဉ်နှစ်စီးကို အေအေပစ်ခတ်ခဲ့ပြီး  စစ်ကောင်စီတပ်ကလည်း လူနေကျေးရွာများကို ရည်ရွယ်ပြီး လက်နက်ငယ် လက်နက်ကြီးများ ပစ်ခတ်နေကြောင်း သိရသည်။

ယနေ့ စက်တင်ဘာ ၂၆ ရက် နံနက် ၁၀ နာရီခွဲတွင် စစ်တွေဘက်မှလာသည့် စစ်တပ်ဇက်ရေယာဉ် နှစ်စီးကို အေအေက လက်နက်ကြီးနှင့်ပစ်ခတ်၍ တစ်စီးမှာထိခိုက်သွားကြောင်း အမည်မဖော်လိုသူ ဒေသခံတစ်ဦးက ပြောသည်။

"နေဗီနှစ်စီး စစ်တွေဘက်က လာတာကို မညင်းပြင်နဲ့ ခေါင်းလောင်းချောင်းကြားမှာ အေအေက ပစ်လိုက်လို့ နောက်ကအစီးမှာထိသွားပါတယ်"ဟု ပြောသည်။

ယခုကဲ့သို့ ပစ်ခတ်ခံရသည့်အတွက် စစ်ကောင်စီတပ်က အနီးအနားလူနေကျေးရွာများအား အဓိကပစ်မှတ်ထားကာ လေယာဉ်နှင့်ပစ်ခတ်ပြီး ဇက်ရေယာဉ်မှလည်း လက်နက်ကြီးများ ပစ်ခတ်နေကြောင်း ဒေသခံများက ပြောသည်။

"သူတို့မှာက အထက်က လေယာဉ်လည်းပါတော့ အခုနေဗီကရော၊ လေယာဉ်နဲ့ပါ ပစ်နေပါတယ်။ အဓိက လူနေရွာတွေကို ကြဲချနေတာပါ။ အခု ရွာသားတွေ ပုန်းနေကြရပါတယ်" ဟု ပြောသည်။

လက်ရှိမှာ ကျေးရွာသားများ ထွက်ပြေးတိမ်းရှောင်နေရပြီး ဘေးလွတ်ရာတွင်ပုန်းခိုနေရကြောင်း သိရသည်။

မြန်မာစစ်တပ်၏ ပစ်ခတ်မှုများကြောင့် ထိခိုက် ၊ ပျက်စီးမှုရှိမရှိကို မသိရသေးပေ။ (NN-7)

Share: