စစ်ကောင်စီတပ်ကဖမ်းဆီးသွားခဲ့သည့် တောင်ကုတ်မှ သွားဆရာဝန် ပုဒ်မ ၁၇(၁)ဖြင့် တရားစွဲထားခံထားရပြီး ကိုဗစ်ကူးစက်လည်းခံနေရဟုဆို

နိရဉ္စရာ ၊ စက်တင်ဘာ ၂၆/၂၀၂၂

စစ်ကောင်စီတပ်က ဂိုဏ်းစတားဆန်ဆန် အရပ်ဝတ်များဝတ်ဆင်ကာ ဆိုင်ကယ်များ၊ ကားများဖြင့် တောင်ကုတ်မြို့ထဲကနေ ဖမ်းဆီးခေါ်ဆောင်သွားခဲ့သည့်  သွားဆရာဝန် ဒေါက်တာကျော်သူရထွန်းကို မတရားအသင်းဆက်သွယ်ရေးပုဒ်မ ၁၇(၁) ဖြင့်တရားစွဲထားသည်ဟု သိရသည်။

လက်ရှိ  သွားဆရာဝန်မှာ ကိုဗစ်ရောဂါလည်း ကူးစက်ခံထားရကြောင်း မိသားစုနှင့်နီးစပ်သူ တစ်ဦးကပြောသည်။

အဆိုပါ ဒေါက်တာကျော်သူရထွန်းကို စက်တင်ဘာ ၅ ရက်နေ့က အမှုဖွင့်ကာ လက်ရှိ တောင်ကုတ်မြို့မရဲစခန်းသို့ ပြောင်းရွေ့ထားပြီး မိသားစုနှင့်လည်း တွေ့ခွင့်ပေးထားကြောင်း ၎င်းက နိရဉ္စရာသို့ပြောသည်။

၄င်းက ''ဒေါက်တာကိုတော့ တောင်ကုတ်မြို့မ ရဲစခန်းကို ပြောင်းထားပါပြီ။ပြီးတော့ ဆေးစစ်ချက်ယူတာမှာ ကိုဗစ် positive တွေ့ထားပါတယ်ဗျ။ခုကတော့ မိသားစုနဲ့တွေ့ခွင့်ရပါပြီ။ ဒဏ်ရာဒဏ်ချက်တွေတော့မပါဘူးဗျ။ စွဲချက်ကတော့ ၁၇(၁) နဲ့အမှု ဖွင့်ထားတယ်လို့ဘဲ သိထားရပါတယ်'' ဟု နိရဉ္စရာ သို့ပြောသည်။

ဒေါက်တာကျော်သူရထွန်းကို စက်တင်ဘာလ( ၆) ရက်နေ့က စစ်တပ်က တောင်ကုတ်မြို့ ဆေးရုံကွက်သစ် (၁)လမ်းထဲမှ ဖမ်းဆီးသွားခဲ့ခြင်းဖြစ်သည်။

ဒေါက်တာကျော်သူရထွန်းဖမ်းဆီးခံရပြီးနောက် ဇနီးဖြစ်သူ ဒေါ်မို့မို့ဝါက တောင်ကုတ်မြို့မရဲစခန်းတွင် စက်တင်ဘာလ ၇ရက်နေ့၌ လူပျောက်တိုင်ချက်ဖွင့်ခဲ့သည်။

ယခု မတရားအသင်းဆက်သွယ်မှု ပုဒ်မ ၁၇ (၁) ဖြင့် အမှုဖွင့်ခြင်းသည် ရက္ခိုင့်တပ်တော် (အေအေ)နှင့် ဆက်စပ်သည့် စွပ်စွဲချက်ဖြင့် ဖြစ်နိုင်သည်ဟု ၎င်းက ပြောဆိုသည်။

ဒေါက်တာကျော်သူရထွန်းသည် စစ်တွေမြို့ မင်းဂံရပ်ကွက် ဇာတိဖြစ်ပြီး တောင်ကုတ်မြို့တွင် အိမ်ထောင်ကျနေ၍ ၂ နှစ်အရွယ်သမီးငယ်တစ်ဦးရှိကြောင်းသိရသည်။

ရခိုင်ပြည်နယ်တွင် စက်တင်ဘာလ ၄ ရက်နေ့မှ စက်တင်ဘာလ ၂၅ ရက်နေ့အထိ စစ်ကောင်စီက ဖမ်းဆီးထားသူ ဦးရေမှာ (၄၀) ဦးနှင့်အထက်ရှိပြီး အများအပြားမှာ တိမ်းရှောင်နေကြရသည်ဟု သိရသည်။