နိရဥ္စရာ၊စက်တင်ဘာ ၂၈/၂၀၂၂

ရခိုင်ပြည်နယ်၊မြောက်ဦးမြို့မှ ဖမ်းဆီးခံထားရသည့် ကိုရင်ဆို့ (ခေါ်)ကိုကျော်ဇံဝေ(ခ)ကိုဖိုးလပြည့်ကိုယမန်နေ့က ဒုတိယအကြိမ်ရုံးထုတ်ခဲ့သော်လည်း တရားလိုဖြစ်သူရောက်မလာ၍ အမှုကိုစစ်ဆေးနိုင်ခြင်းမရှိခဲ့ဟု သိ၇သည်။

သူ့ကို ယမန်နေ့စတင်ဘာလ ၂၇ ရက်တွင် မြောက်ဦးမြို့နယ်တရားရုံး၌ ရုံးထုတ်ခဲ့ခြင်းဖြစ်ပြီး ကိုရင်ဆို့အား တရားစွဲသူ တရားလို စစ်ကောင်စီအရာရှိမှာ တရားရုံးသို့ရောက်ရှိလာမှုမရှိခြင်းကြောင့် အမှုကိုစစ်ဆေးခြင်းမရှိခဲ့ဟု မိသားဝင်များက ပြောသည်။
တရားလိုမရောက်၍အမှုတစ်စုံတစ်ရာစစ်ဆေးနိုင်ခြင်းမရှိခဲ့သည့်အတွက် ကိုရင်ဆို့အမှုအတွက်အချိန်ကြန့်ကြာကာ နစ်နာမှုရှိသည်ဟုလည်း မိသားစုဝင်များက ပြောသည်။

သူ၏အစ်မဖြစ်သူ မအိမ်စည်က"သူက ကျန်းမာရေးလည်း ကောင်းပါတယ်။ နေရထိုင်၇တာတွေလည်း အဆင်ပြေပါတယ်လို့ပြောတယ်။ သူ့ဇနီးဖြစ်သူနဲ့လည်း အေးဆေးစကားပြောခွင့်၇ခဲ့တယ်"ဟုပြောသည်။

သူ့အမှုကို လာမည့် အောက်တိုဘာ၄ ရက်သို့ ရုံးချိန်းလိုက်သည်ဟုလည်း သိ၇သည်။

လူမှုကွန်ရက်စာမျက်နှာတွင် ဟာသဗီဒီယိုများနှင့်စစ်ရေး၊ နိုင်ငံရေး အခြေအနေများကိုမျှဝေရင်း လူသိများလာနေသည့်သူ့ကို စစ်သားနှင့်ရဲအင်အား ၂၀ ခန့်က စက်တင်ဘာလ ၄ ရက် နံနက် ၈ နာရီခန့်တွင်မြောက်ဦးမြို့၊ တောင်ရပ်ရပ်ကွက်ရှိ သူ၏နေအိမ်မှ ဝင်ရောက်ဖမ်းဆီးခေါ်ဆောင်သွားခြင်းဖြစ်သည်။

လက်ရှိတွင် ရဲလက်ကိုမအပ်ဘဲ မြောက်ဦးအခြေစိုက်တပ်ရင်း (၃ရရ)တွင် ဖမ်းဆီးချုပ်နှောင်ထားသည်ဟု သိ၇သည်။

ယင်းနောက် သူ့ကိုနိုင်ငံတော်အေးချမ်းသာယာရေးကို ပျက်ပြားစေရန် ရည်ရွယ်လျက် လှုံ့ဆော်ခြင်း၊ဝါဒဖြန့်ခြင်းများ ပြုမှုလုပ်ဆောင်ခဲ့သည့်အတွက်ဟုဆိုကာဖမ်းဆီး၇ခြင်းဖြစ်သည်ဟု စစ်ကောင်စီက စက်တင်ဘာ ၆ ရက်ထုတ် မြန်မာ့အလင်းသတင်းစာတွင်ထုတ်ပြန်ခဲ့သည်။

  သူ့ကိုနိုင်ငံတော်ဆူပူလှုံ့ဆော်မှုဆိုင်ရာဥပဒေပုဒ်မ ၅၀၅(က)အပါအဝင် ပုဒ်မ ၃ ခုဖြင့်အမှုဖွင့်ထားသည်ဟုလည်း သူ၏နီးစပ်သူများက ပြောသည်။ (NN-13)