၇ခိုင် ရှေးဟောင်းမြို့တော် မြောက်ဦးမြို့ထဲတွင် စစ်တပ်ကထောင်ထားသည့် မိုင်းကို လူငယ်တစ်ဦးနင်းမိရာက ခြေထောက်နှစ်ဖက် ပြတ်ထွက်သွားပြီး ၎င်းလူငယ်၏ အခြေအနေ စိုးရိမ်၇သည်ဟု မျက်မြင်များကဆိုသည်။

ဖြစ်စဉ်မှာယနေ့ စက်တင်ဘာ  ၂၉ ရက် ညနေ ၃ နာရီခွဲတွင် ကျောက်ရစ်ကေခွဆုံ၊မြင်ခုံတန်း ကန်ဘောင်နားရှေ့ မြို့တံတားအနီးတွင် ဖြစ်ပွားခဲ့ခြင်းဖြစ်သည်။

ဖြစ်စဉ်ကိုမျက်မြင်တစ်ဦးက " လမ်းဘေးတောင်စောင်းထက်က မိုင်းနင်းမိပြီး လမ်းပေါ်ကို သူဟာလွင့်စဉ်ကျလာတယ်။ ပြီးတော့ခြေထောက်အသားစတွေဟာ လမ်းမထက်မှာ ပြန့်ကြဲသွားတယ်။ အဲ့လောက်ထိဖြစ်သွားတာပါ"ဟု ပြောသည်။

လက်ရှိမှာထိခိုက်ဒဏ်ရာရရှိသူမှာ မြောက်ဦးမြို့သစ်ရပ်ကွက်က ဦးထွန်းရွှေ၏သား ကိုသန်းနိုင်ကျော်(၂၀) ဖြစ်ပြီး မြင်းခုံတန်းကန်ဘောင်နားရှိသာလီစွကားဝက်ရှော့ဆိုင်မှ တပည့်ဖြစ်ကြောင်း သိ၇သည်။

လက်ရှိတွင်၎င်းကို မြောက်ဦးဆေးရုံကို ပို့ဆောင်ကုသလျှက်ရှိပြီး အခြေအနေကို သွားရောက် ကြည့်ရှုခွင့်မရ၍ လက်ရှိအခြေအနေကို မသိနိုင်သေးကြောင်းဒေသခံတစ်ဦးက ပြောသည်။

"လက်ရှိအချိန်မှာဆေးရုံကို ဘယ်သူမှသွားလို့မရပါဘူး။ ရဲ့နဲ့စစ်သားတွေဝိုင်းအုံနေပါတယ်။ ဆေးရုံ၀မှာလည်းစစ်ဆေးနေပါတယ်။ သူတို့ စစ်တပ်က ထောင်တဲ့ မိုင်းပါ"ဟု ၎င်းက ပြောသည်။

စက်တင်ဘာ၁၁ ရက်နေ့က  မင်းပြားမြို့နယ်၊ သမင်ခြေရာကျေးရွာမှဒေသခံတစ်ဦး မိုင်းနင်းမိကာ ခြေထောက် နှစ်ဘက်လုံးတွင် ဒဏ်ရာပြင်းထန်စွာ ရရှိသွားခဲ့သည်။

သြဂုတ်လနှင့် စက်တင်ဘာလအတွင်း မိုင်းပေါက်ကွဲမှု ထိခိုက်ဒဏ်ရာရရှိသူများ ဆက်တိုက်ရှိခဲ့ပြီး၇ခိုင်မှာ ယခုနှစ်၂၀၂၂ ခုနှစ် ဇန်နဝါရီလမှ ဇူလိုင်လအထိ ရ လအတွင်း မိုင်းပေါက်ကွဲမှုကြောင့်လူ ၇ ဦးသေဆုံးပြီး ၂၀ ဦးထိခိုက်ဒဏ်ရာရရှိခဲ့ကြောင်း  ရခိုင်တိုင်းရင်းသားမျိုးနွယ်များအစည်းအရုံး(REC)၏  စာရင်းတွေအရ သိ၇သည်။

ရခိုင်တွင်မိုင်းပေါက်ကွဲမှုများမကြာခဏရှိနေပြီး ထိခိုက်သေဆုံးမှုများရှိနေ၍ စစ်တပ်တပ်စွဲထားသည့်နေရာအနီးဝန်းကျင်နှင့် ယခင်တိုက်ပွဲဖြစ်ပွားခဲ့သည့် နေရာများကို သွားလာခြင်းမပြုလုပ်ကြရန်ရက္ခိုင်အမျိုးသားအဖွဲ့ချုပ်/ ရက္ခိုင့်တပ်တော် (ULA/AA) က သတိပေး ပြောဆိုထားသည်။ (NN-7)