စစ်ကောင်စီကအာဏာသိမ်းပြီးနောက်ပိုင်း နေအိမ်နှင့် အဆောက်အအုံ ၃၆၀၀၀ ကျော် မီးရှို့ဖျက်ဆီးခံခဲ့ရကြောင်း ISP အဖွဲ့ထုတ်ပြန်

နိရဉ္စရာ ၊ စက်တင်ဘာ ၃၀ /၂၀၂၂

စစ်အာဏာသိမ်းပြီးနောက် ဖြစ်ပွားခဲ့သည့် လက်နက်ကိုင် ပဋိပက္ခကြောင့်   ၂၀၂၁ခု နှစ် ဖေဖော်ဝါရီလ ၁ ရက်နေ့ ယခုလ စက်တင်ဘာ( ၁၅) ရက်နေ့ အထိ နိုင်ငံအဝန်းရှိ နေအိမ်၊ အဆောက်အအုံ (ဘာသာရေးအဆောက်အအုံများအပါအဝင်)  ၃၆,၂၀၉  လုံး ကို မီးရှို့ဖျက်ဆီးခံခဲ့ရသည်ဟု Institute for Strategy and Policy -Myanmar အဖွဲ့က စက်တင်ဘာလ (၂၉) ရက်နေ့က ထုတ်ပြန်ထားသည်။

အဆိုပါထုတ်ပြန်ချက်တွင် ပြည်နယ်နှင့်တိုင်း (၁၁)ခု မှ နေအိမ်နှင့်အဆောက်အအုံ့ (၃၆,၂၀၉ ) လုံး ဖျက်ဆီးခံရပြီး စစ်ကိုင်းတိုင်းတွင် (၂၅,၃၇၇)လုံး အထိဖျက်ဆီးခံရပြီး တစ်နိုင်ငံလုံး အရေအတွက်၏ (၇၀)ရာခိုင်နှုန်းအထိရှိကြောင်းဖော်ပြထားသည်။

ISP-Myanmar ၏ စာရင်းများအရ စစ်ကိုင်းတိုင်းတွင် (၂၅၃၇၇)လုံး၊ မကွေးတိုင်းတွင် (၈၁၁၉)လုံး၊ ချင်းပြည်နယ်တွင် (၁၁၇၅) လုံး၊ ကယားပြည်နယ်တွင် (၄၃၈) လုံး ၊ ကချင်ပြည်နယ်တွင် (၄၀၅)လုံး၊ရှမ်းပြည်နယ်တွင် (၂၆၂)လုံး ၊မွန်ပြည်နယ်တွင် (၁၅၉)လုံး၊ မန္တလေးတိုင်းတွင် (၁၁၁)လုံး၊ တနင်္သါရီတိုင်းတွင် ၁၀၁လုံး၊ ကရင်ပြည်နယ်တွင်( ၃၃)လုံး၊ ပဲခူးတိုင်းတွင်( ၂၉)လုံး စုစုပေါင်း (၃၆၂၀၉) လုံးအထိရှိကြောင်း သိရသည်။

ထိုနေအိမ်၊ အဆောက်အအုံများသည် တိုက်ပွဲဖြစ်ပွားနေစဉ် မီးရှို့ခံရခြင်း၊ တိုက်ပွဲများအကြား လက်နက်ကြီးကျည်များ ကျရောက်ခြင်းနှင့်  စစ်ကောင်စီတပ်က တိုက်ပွဲမဖြစ်ပွားဘဲ ဝင်ရောက်စီးနင်းပြီး မီးရှို့ခဲ့မှုများကြောင့် ပျက်စီးဆုံးရှုံးခဲ့ရခြင်းများ ဖြစ်ကြောင်း၊ နေအိမ်နှင့် အဆောက်အအုံမီးရှို့ခံရမှုသည် ၂၀၂၂ ခုနှစ် မေလတွင် အဆင့်မြင့်ဆုံးရောက်ရှိခဲ့ကြောင်း၊ စစ်အာဏာသိမ်းမှုအပြီး မီးရှို့ခံရသော နေအိမ်၊ အဆောက်အအုံစုစုပေါင်း၏ ၂၃ ရာခိုင်နှုန်း နီးပါးသည် မေလတွင် ဖြစ်ပွားခဲ့ခြင်းဖြစ်ကြောင်း ဖော်ပြသည်။

၎င်းအချက်အလက်များသည် လွတ်လပ်သောမီဒီယာများ၊ အရပ်ဘက်အဖွဲ့အစည်းများ၏ ထုတ်ပြန်ချက်များအပေါ် အခြေပြု၍  IPS  Myanmar မှ လက်လှမ်းမီသလောက် စုစည်းထားခြင်းဖြစ်ကြောင်း၊ မြေပြင်တွင် ယခုထက် ပိုမိုများပြားနိုင်ကြောင်းဖြင့်လည်း ဖော်ပြထားသည်။

 Institute for Strategy and Policy -Myanmar သည် ပဋိပက္ခ၊ ငြိမ်းချမ်းရေးနဲ့ လုံခြုံရေးဆိုင်ရာကိစ္စရပ်တွေ၊ တရုတ်အရေးလေ့လာမှုနဲ့ နိုင်ငံရေး ဘောဂဗေဒ ဆိုင်ရာများကို လေ့လာသုတေသနပြုနေသည့် အဖွဲ့အစည်းတစ်ခုဖြစ်သည်။

 Institute for Strategy and Policy -Myanmar က ဦးဆောင်ပြုလုပ်သည့် ''ယောမင်းကြီးဇရပ်'' ဆွေးနွေးပွဲများတွင် စီးပွားရေး၊နိုင်ငံရေး၊လူမှုရေးနယ်ပယ်မှ ထူးချွန်ထင်ရှားသူများစွာ ပါဝင် ဆွေးနွေးခဲ့ပြီး လူအများ စောင့်ကြည့်ရသည် အစီအစဥ်တစ်ခုဖြစ်ခဲ့သည်။