ရခိုင်ပြည်နယ်ကျောက်တော်မြို့နယ် ခေါင်းတုတ်(ရခိုင်)ကျေးရွာသား ၁ ဦးကို စစ်ကောင်စီတပ်ကနေအိမ်သို့ လာရောက်ဖမ်းဆီးခေါ်ဆောင် သွားသည်ဟု သိ၇သည်။

ဖမ်းဆီးခံရသူမှာခေါင်းတုတ်(ရခိုင်)ကျေးရွာမှ ဦးစိုးမောင် (၃၄ နှစ်)ဖြစ်သည်။

သူ့ကို ယမန်နေ့စက်တင်ဘာလ ၂၉ ရက် ညနေ ၄ နာရီခန့်တွင် ကျောက်တော်ရှိ အမှတ်(၉)စစ်ဆင်ရေးကွပ်ကဲမှုဌာနချုပ်မှစစ်ကောင်စီတပ်ဖွဲ့ဝင်အင်အား ၃၀ ခန့်က နေအိမ်သို့လာရောက်ကာဖမ်းဆီးသွားခြင်းဖြစ်သည်ဟု ဒေသခံတစ်ဦးက နိရဥ္စရာကိုပြောသည်။

“အိမ်ထဲကိုခြံတံခါးပေါက်ကို ခြေနဲ့ကန်ပြီးဝင်လာပြီး ဖမ်းသွားတာ”ဟု ပြောသည်။

စတင်ဖမ်းဆီးစဉ်ကဦးစိုးမောင်အပါအဝင် ၃ ဦးကို ဖမ်းဆီးခြင်းဖြစ်သော်လည်း နောက်ထပ် ၂ ဦးကိုပြန်လွှတ်ပေးခဲ့သည်ဟု ရွာသားများက ပြောသည်။

ဦးစိုးမောင်ကိုမူမည်သည့်အတွက်ဖမ်းဆီးသွားသည်ကို မသိ၇သေးဟုလည်း နောက်ထပ် ဒေသခံတစ်ဦးက ပြောသည်။

“ခေါင်းတုတ်(ရခိုင်)ရွာကို မနေ့ကစစ်သားတွေဝင်စစ်ဆေးပါတယ်။ အဲဒီမှာ သူက နေမကောင်းတော့ အိမ်ပေါ်မှာ စောင်ချုံပြီးအိပ်နေတာကို ဖမ်းသွားတာပါ”ဟုပြောသည်။

ဖမ်းဆီးခံရသည့်ဦးစိုးမောင်သည် ခေါင်းတုတ်ကျေးရွာတွင် မိသားစုနှင့်အတူကျပန်းအလုပ်လုပ်ကိုင်သူဖြစ်သည်ဟု သိ၇သည်။

ယမန်နေ့တွင် ခေါင်းတုတ်(မူဆလင်)ကျေးရွာမှမူဆလင် ၃ ဦးကိုလည်း စကခ(၉)က ဖမ်းဆီးသွားသည်ဟု သတင်းများထွက်ပေါ်နေသော်လည်းယင်းသတင်းမှာ မဟုတ်မှန်ဟု ခေါင်းတုတ်(ရခိုင်)ကျေးရွာသားများကပြောသည်။