ရသေ့တောင်မြို့နယ်မြောက်ပိုင်း ဆောက်ခပ်ရွာရှိ တပ်စခန်းမှ ရေထွက်ခပ်သည့်စစ်သား၅ ဦးကို အေအေကစနိုက်ဘာဖြင့်ပစ်ခတ်၍ ၄ ဦးသေပြီး ၁ ဦးဒဏ်ရာရ

ရေးသူ: Web Master
| ရက်စွဲ: ၃၀ စက်တင်ဘာ ၂၀၂၂
| ကြည့်ရှုသူ: 3k

နိရဉ္စရာ၊ စက်တင်ဘာ ၃၀/၂၀၂၂

ရခိုင်ပြည်နယ်၊ ရသေ့တောင်မြို့နယ်၊ ဆောက်ခပ်ကျေးရွာတွင် တပ်စွဲထားသည့် စကစ စခန်းမှ ရေထွက်ခပ်သည့် စစ်ကောင်စီတပ်သား ၅ ဦးကို ရက္ခိုင့်တပ်တော်(AA) တပ်ဖွဲ့ဝင်များက ကင်းပုန်းဝပ်ကာ စနိုက်ဘာဖြင့် ပစ်ခတ်သဖြင့် စစ်သား ၄ ဦးသေဆုံးပြီး ၁ ဦးဒဏ်ရာ ရရှိသွားကြောင်းအေအေနှင့်နီးစပ်သည့် ခိုင်လုံသည့် သတင်းရင်းမြစ်အရ သိရသည်။

ဖြစ်စဉ်မှာ ယနေ့ စက်တင်ဘာ ၃၀ ရက်၊ နေ့လယ် ၃ နာရီကျော်တွင် ဖြစ်ပွားခဲ့ပြီး ဆောက်ခပ်ရွာ ဘုန်းကြီးကျောင်းအနီးရှိ ကန်ထဲ ရေဆင်းခပ်သည့် စစ်ကောင်စီတပ်သား ၅ ဦးကို အေအေက ကင်းပုန်းဝပ်ကာ စနိုက်ဘာနှင့် ပစ်ခတ်ခဲ့ခြင်း ဖြစ်သည်ဟု ၎င်းသတင်းရင်းမြစ်က ပြောသည်။

" စစ်သား ၅ ယောက်မှာ တစ်ယောက်ဘဲ ဒဏ်ရာနဲ့ ထွက်ပြေးသွားတယ်။ ၄ ယောက်က ပွဲချင်းပြီးသေတယ်။ သူတို့ဘက်က လက်နက်ကြီး၊ လက်နက်ငယ်တွေနဲ့ ပြန်ပစ်တယ်။ အဲဒီမှာ အခဲမကျေတဲ့ စကစဘက်က လက်နက်ကြီးတွေနဲ့ ဆက်တိုက်ပစ်တာ"ဟု ပြောသည်။

အဆိုပါ ပစ်ခတ်မှုဖြစ်ပြီးနောက် ဆောက်ခပ်စခန်း လက်နက်ကြီး၊ လက်နက်ငယ်များဖြင့် ပစ်ခတ်ခဲ့သလို ရသေ့တောင်မြို့ အခြေစိုက် တပ်ရင်း ၅၃၆ နှင့် ၅၃၇ တို့က ဆောက်ခပ်ရွာပတ်ဝန်းကျင်ကို တစ်နာရီ နီးပါး လက်နက်ကြီးဖြင့် ပစ်ခတ်ခဲ့ကြောင်း သိရသည်။

အိမ်ခြေ ၇၀ ကျော်ခန့်ရှိသည့် ဆောက်ခပ်ကျေးရွာ အနီးဝန်းကျင်တွင် ၂၀၁၉-၂၀၂၀ ၌ တိုက်ပွဲ ဖြစ်ပွားခဲ့ပြီး ယင်းနောက်ပိုင်း စစ်တပ်က ဝင်ရောက်တပ်စွဲထားသဖြင့် ရွာသားများမှာ ရွာကို စွန့်ခွာသွားခဲ့ကြပြီး ရသေ့တောင်မြို့ပေါ်စခန်းများနှင့် စေတီပြင် စစ်ဘေးရှောင်စခန်းများတွင် နေထိုင်နေကြသည်ဟု သိရသည်။

အမည်မဖော်လိုသူ ဒေသခံတစ်ဦးက "ဆောက်ခပ်ဘက်က လက်နက်ကြီးသံ၊ လက်နက်ငယ်သံ တွေကို ဒီနေ့ ညနေပိုင်းမှာ တော်တော်ကြားလိုက်ရတယ်။ လက်နက်ငယ်သံတွေ ကြားလိုက်ရပေမယ့် တစ်ဖက်သတ် ပစ်တာမျိုးဘဲထင်တယ်။ လက်နက်ကြီး ပစ်တာကလည်း အလုံး လေးငါးဆယ်လောက်တောင်ရှိမယ်ထင်တယ်။ တစ်နာရီနီးပါး ပစ်ခဲ့တာ။ အဲသလိုလက်နက်ကြီး အများကြီးပစ်ရင် စစ်တပ်ဘက်က အထိနာနေပြီဆိုကို ဒေသခံတွေက နားလည် သဘောပေါက် ထားကြတယ်လေ"ဟု ပြောသည်။

ယနေ့ ည ၈ နာရီအချိန်ထိ ရသေ့တောင် အခြေစိုက် စကစတပ်ရင်း ၅၃၆ နှင့် ၅၃၇ တို့မှ ဆောက်ခပ်ရွာ အနီးဝန်းကျင်ကို လက်နက်ကြီးများ ပစ်ခတ်ခဲ့သဖြင့် စစ်ကောင်စီဘက်က အကျအဆုံးရှိ၍ ဖြစ်သည်ဟု ၎င်းက ဆိုသည်။

အဆိုပါ စစ်ကောင်စီဘက်က တပ်ဖွဲ့ဝင် ၄ ဦးကျဆုံးသွားခြင်းနှင့် ပတ်သက်ပြီး ရက္ခိုင့်တပ်တော် ပြောခွင့်ရသူ ဦးခိုင်သုခနှင့် စစ်ကောင်စီ ရခိုင်ပြည်နယ် နယ်လုံဝန်ကြီး ဗိုလ်မှူးကြီးကျော်သူရတို့ကို ဆက်သွယ်သော်လည်း ဖုန်းလက်ခံဖြေဆိုခြင်းမရှိသေး၍ နိရဉ္စရာအနေဖြင့် သီးခြားအတည်ပြုနိုင်ခြင်းတော့မရှိသေးပါ။

ရက္ခိုင့်တပ်တော်(AA)သည် လက်ရှိ အချိန်တွင် စစ်ကောင်စီတပ်နှင့် ရခိုင်ပြည်နယ် မြို့နယ် အချို့နှင့် ချင်းပြည်နယ် ပလက်၀မြို့နယ်တို့တွင် တိုက်ပွဲ ပြင်းထန်စွာဖြစ်ပွားနေပြီး စစ်ကောင်စီတပ်စခန်းများသို့ ရိက္ခာများသယ်ယူမှုကိုလည်း ဖြတ်တောက်ပိတ်ဆို့မှုများ တင်းတင်းကျပ်ကျပ် ပြုလုပ်ထားသဖြင့် စကစ စခန်းအများစုတွင် ရိက္ခာပြတ်လပ်မှုနှင့် ကြုံနေရသည်ဟု သတင်းရရှိသည်။