လက်နက်ကြီးကျည်ကျ၍ ကျောက်တော်တောင်းပိုင်းမှ ကျေးရွာအချို့တွင် နွားများသေဆုံး

နိရဉ္စရာ၊ အောက်တိုဘာ ၁/ ၂၀၂၂

ကျောက်တော်မြို့နယ် အခြေစိုက် စစ်ကောင်စီတပ်ရင်း အမှတ် (၅၃၉) မှ ပစ်ခတ်သည့် လက်နက်ကြီးကျည်များ လူနေကျေးရွာများနှင့် အနီးဝန်းကျင်သို့ကျရောက် ပေါက်ကွဲမှုများရှိ၍ နွားများသေဆုံးမှုရှိကြောင်း သိရသည်။

ယနေ့ နံနက်က ပစ်ခတ်မှုအတွင်း ကျောက်တော်မြို့နယ် ရွက်ညိုးတောင်ရွာမှ ဒေါ်ဝင်းလှစိန်တွင် နွားမတစ်ကောင်သေဆုံးပြီး ဒေဝန်းရွာက ဦးမောင်ကျန်အောင်တွင် နွားထီးတစ်ကောင် သေဆုံးသွားခဲ့သည်ဟု သိရသည်။

ဒေသခံ တစ်ဦးက“ ဦးမောင်ကျန်အောင် နွားက တစ်ခါတည်းလည်ပင်းပြတ်ပါသွားပါတယ်။  ပွဲချင်းပီးသေပါတယ်။ ချည်ထားတဲ့ နွားတွေပါ။ လူတွေက ရွာကနေ ထွက်ပြေးသွားခဲ့ကြပြီ ဖြစ်တဲ့ အတွက် အထိအခိုက်မရှိတာပါ။ နွားတွေက ချည်ထားတော့ လက်နက်ကြီးကျည်ထိပြီး သေဆုံးသွားတာပါ” ဟု ပြောသည်။

ယနေ့ နံနက် ၈ နာရီ ၃၅ မိနစ်ကစပြီး ၁၀ နာရီကျော်ထိ အတွဲလိုက် လက်နက်ကြီးကျည် ၃၀ ခန့်ပစ်ခတ်ခဲ့ပြီး အဓိက ရွက်ညိုးတောင်နှင့် ချောင်းတူရွာကို ဆက်သွယ်ထားသည့် လမ်းတစ်လျှောက်ကို ဦးတည်ပစ်ခတ်ခဲ့သည်ဟု ဆိုသည်။

“ ရွာညိုးတောင်ရွာထဲကို ၅၃၉ မှ ပစ်ခတ်တဲ့  လက်နက်ကြီးကျည် လေးလုံးကျပြီး တစ်လုံးက  ရွာထဲရှိ အုန်းပင်ပေါ် ကျပြီး အုန်းပင် ပြတ်ထွက်သွားပါတယ်။ စစ်တပ်ကပစ်တဲ့နေရာကို သိပါတယ်။ သူတို့ မြေပုံအညွှန်းနဲ့ အကွာအဝေး၊ ဒီဂရီတွေနဲ့ ချိန်ပြီးပစ်တာပါ။ ရမ်းသန်းပစ်ခတ်တာမဟုတ်ပါဘူး။ ရွာတွေထဲကို တမင်ရည်ရွယ်ပြီးပစ်နေတာပါ” ၎င်းက ပြောသည်။

ပြည်သူလူထုနှင့် တိုင်းပြည်ရန်စွယ်ကိုကာကွယ်နေသောတပ်မတော်ဟု ပြောဆိုပြီး အခြားတစ်ဖက်တွင် လူနေကျေးရွာများထဲ တမင်ချိန်ရွယ်၍ လက်နက်ကြီးများဖြင့် ပစ်ခတ်နေသည်မှာ အပြောတမျိုး၊ အလုပ်တမျိုးဖြစ်နေ၍ စစ်ကောင်စီတပ်ကို ပြည်သူများအနေဖြင့် လုံး၀ အယုံအကြည်မရှိဟု ၎င်းကဆက်လက်ပြောဆိုသည်။

ရခိုင်ပြည်နယ်မှ အင်အားကြီးနိုင်ငံရေးပါတီတစ်ခုဖြစ်သည့် ရခိုင်အမျိုးသားပါတီကလည်း စက်တင်ဘာ ၂၉ ရက်နေ့ သဘောထားကြေညာချက်တစ်စောင်ထုတ်ပြန်ပြီး ၎င်းထုတ်ပြန်ချက်အထဲတွင်  မြန်မာ့တပ်မတော်မှ လက်နက်ကြီးပစ်ခတ်မှုကြောင့် အရပ်သားထိခိုက်သေဆုံးမှု၊ ဒဏ်ရာရရှိမှုတို့နှင့် လူနေအိမ်များ ပျက်စီးဆုံးရှုံးဖြစ်ပေါ်မှုတို့အပေါ် ပြင်းပြင်းထန်ထန် ရှုတ်ချ ကန့်ကွက်သည်ဟု ဖော်ပြထားသည်။