မြောက်ဦးတွင်စစ်ကောင်စီတပ်သားများ အရက်သောက်စားမူးယစ်ပြီး လက်နက်ကြီးဖြင့်ဖြိုပစ်နေ

နိရဉ္စရာ၊ အောက်တိုဘာ ၁/ ၂၀၂၂

ရခိုင်တို့ရှေးဟောင်းမြို့တော်တစ်ခုဖြစ်သည့် မြောက်ဦးမြို့တွင် စစ်ကောင်စီတပ်သားများသည် သောက်စားမူးယစ်ပြီး လက်နက်ကြီးများဖြင့် အကြောင်းမဲ့ပစ်ခတ်နေသည်ဟု သတင်းရရှိသည်။

မြောက်ဦး ဒေသခံတစ်ဦးက " ဒီနေ့ည ၇ နာရီခွဲက စပစ်တာ ၈ နာရီခွဲအထိ အလုံး ၁၀ ကျော် ပစ်ပါတယ်။ မြောက်ဦးမှာ ဒီနေ့ တိုက်ပွဲလည်းမဖြစ်၊ ဘာဖြစ်တာမှလည်းမရှိဘဲ တမင် မြို့ထဲမှာ ပစ်နေတာပါ။ ဒီလောက် မိုးတွေရွာ၊ လျှပ်စီးတွေလတ်နေချိန်မှာမှ ပစ်တာပါ။ မိုးကလည်း အခုမှ နည်းနည်းစဲတယ်" ဟု ပြောသည်။

ယခုကဲ့သို့ ပစ်ခတ်နေခြင်းမှာ အရက်သေစာ သောက်စားမူးယစ်ပြီး ပစ်ခတ်နေခြင်းဖြစ်ကြောင်း ၎င်းက ပြောကြားသည်။

“ တပ်ထဲမှာ ရခိုင်စစ်သားတွေရှိတယ်။ ပြီးရင် အိမ်ထောင်ကျနေတဲ့ ရခိုင်အမျိုးသမီးတွေရှိတယ်။ သူတို့ပြောပြတာ။ ညကျရင် အရက်သေစာသောက်စားပြီး ရခိုင်တွေကို ဆဲဆိုကလော်တုတ်၊ သေနတ်တွေ ပစ်ဖောက်တာတွေ လုပ်တယ်။ မြို့ပေါ်က လူတွေကိုလည်း ညကျရင် သတိထားနေကြဖို့ တပ်ထဲက လူတွေပြောတာရှိတယ်” ဟု ပြောသည်။

သို့အတွက် မြောက်ဦးဒေသခံများအနေဖြင့် နေ့ခင်းထက် ညနေပိုင်းနှင့် ညဉ့်အချိန်တွင် ပိုမို သတိထားနေကြရသည်ဟု ဆိုသည်။

တစ်ခြားမြောက်ဦးဒေသခံတစ်ဦးကလည်း မြန်မာစစ်တပ်၏ လုပ်ရပ်မှာ အလွန်တရာ အောက်တန်းကျပြီး တမင်တကာ ယုတ်မာနေသည်ဟု ပြောကြားသည်။

 " ဒီနေ့ ထိခိုက် အပျက်အစီးတွေကတော့ မိုးရွာတာရော၊ လက်နက်ကြီးပစ်တာကြောင့်ရော မထွက်ရဲလို့မသိရသေးပါဘူး။ မြောက်ဦးထွက်ဝနားတွေမှာ ကျတယ်လို့တော့ကြားတယ်။ ကားဂိတ်ဘက်တွေရော ကျတယ်ကြားပါတယ်။ တိုက်ပွဲတွေ ဘာတွေဖြစ်လို့များ ပစ်တယ်ဆိုလည်း လက်ခံနိုင်ပါသေးတယ်။ အခုက တမင်တကာယုတ်မာတာပါ။ ဘာမှမဟုတ် အေးအေးဆေးဆေး အခြေအနေမှာ ပြည်သူတွေကိုဘဲခြိမ်းခြောက်ပြီး ကြောက်အောင်တမင် ပါဝါပြတာပါ" ဟု ပြောဆိုသည်။

ယနေ့ အကြောင်းမဲ့ လက်နက်ကြီးများပစ်ခတ်မှုကို မြောက်ဦးအခြေစိုက် စစ်ကောင်စီတပ်ရင်း ၃၇၇နှင့် ၅၄၀ တို့မှ ပြုလုပ်ခြင်းဖြစ်ပြီး လက်နက်ကြီးကျည်များမှာ မြောက်ဦးမြို့ကို ကျော်ပြီး ဝေသာလီရွာ အနီးတွင် ၃ လုံး ကျရောက်ပေါက်ကွဲခဲ့ပြီး တောင်ဖြူဆည်အနီးတွင်လည်း အနည်းဆုံး တစ်လုံးကျရောက်ပေါက်ကွဲခဲ့သည်ဟု ဒေသခံများက ပြောသည်။

(ဓာတ်ပုံ- ယခုနှစ် ဩဂုတ် ၂၈ရက်နေ့ကလည်း စစ်ကောင်စီတပ်က လက်နက်ကြီးဖြင့်ပစ်ခတ်၍ မြောက်ဦးမြို့သစ် ဓမ္မရာဇ် ရပ်ကွက်ရှိ ပညာရောင်ခြည် စာသင်ကျောင်းတိုက်နှင့် အောင်မြေသုခ ဘုန်းကြီးကျောင်းတိုက်တို့ကို ထိခိုက်ခဲ့သည့် ပုံဖြစ်သည်။)