ရခိုင်တွင် အမျိုးသမီးဦးရေကအမျိုးသားဦးရေထက် ၂ သိန်းပိုများပြီး တစ်ပြည်နယ်လုံးတွင် လူဦး ၃ ဒဿမ ၄ သန်းရှိ

နိရဉ္စရာ၊ အောက်တိုဘာ ၁/၂၀၂၂

ရခိုင်ပြည်နယ်တွင် အမျိုးသမီးဦးရေက အမျိုးသားဦးရေထက် ၂ သိန်းပိုများပြီး ပြည်နယ်တစ်ခုလုံးတွင် လူဦးရေ ၃ ဒဿမ ၄ သန်းရှိကြောင်း စစ်ကောင်စီ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၏ အောက်တိုဘာ (၁) ရက်နေ့ ထုတ်ပြန်ချက်အရ သိရသည်။

ရခိုင်ပြည်နယ်တွင် အမျိုးသားဦးရေ ၁ ဒဿမ ၆ သန်းရှိပြီး အမျိုးသမီးဦးရေမှာ ၁ ဿမ ၈ သန်း၊ စုစုပေါင်း ၃ ဒဿမ ၄ သန်းရှိသည်ဟု ထုတ်ပြန်ရာတွင် ဖော်ပြသည်။

 ယခုထုတ်ပြန်ချက်မှာ ၂၀၁၄ ခုနှစ်၊ လူဦးရေနှင့် အိမ်အကြောင်းအရာ သန်းခေါင်စာရင်းကိုအခြေခံ၍ ၂၀၂၂ ခုနှစ်၊ အောက်တိုဘာလ(၁)ရက်နေ့တွင်ရှိသော မြန်မာနိုင်ငံ၏ ခန့်မှန်း လူဦးရေစာရင်း ထုတ်ပြန်ခြင်းဟု သိရသည်။

ယခု ထုတ်ပြန်ချက်သည် နိုင်ငံတော်၏ မူဝါဒများ စီမံကိန်းများ ရေးဆွဲချမှတ် ရာတွင် အခြေခံအသုံးပြုနိုင်ရေးအတွက် နှစ်အလိုက် ခန့်မှန်းလူဦးရေစာရင်းဖြစ်သည်ဟု ဆိုသည်။

ယင်းစာရင်းများထုတ်ပြန်ရာတွင် ၂၀၁၄ခုနှစ်၊ လူဦးရေနှင့်အိမ်အကြောင်းအရာသန်းခေါင် စာရင်းမှ ကောက်ယူရရှိသော လူဦးရေကိုအခြေခံ၍ ခန့်မှန်းတွက်ချက်ထားရာ ၂၀၂၂-၂၀၂၃ ဘဏ္ဍာရေးနှစ်၏ နှစ်လယ်ဖြစ်သော ၂၀၂၂ ခုနှစ်၊ အောက်တိုဘာ(၁)ရက်တွင်ရှိသည့် မြန်မာနိုင်ငံ၏ခန့်မှန်းလူဦးရေမှာ (၅၅ ဒသမ ၈) သန်းဖြစ်ပြီဟု ဖော်ပြသည်။

၂၀၂၂ အောက်တိုဘာ (၁) ရက်နေ့ တိုင်းဒေသကြီး/ ပြည်နယ်အလိုက် ခန့်မှန်းလူဦးရေစာရင်းမှာ အောက်ပါအတိုင်းဖြစ်ကြောင်း ထုတ်ပြန်ထားပါသည်။

ကချင်ပြည်နယ် (ကျား ၁ သန်း ၊ မ ၁ သန်း) ၂ သန်း၊ ကယားပြည်နယ် (ကျား ဝ.၂ သန်း၊ မ ဝ.၁ သန်း) ဝ.၃ သန်း၊ ကရင်ပြည်နယ် (ကျား ဝ.၈ သန်း၊ မ ဝ.၈ သန်း) ၁.၆ သန်း၊ ချင်းပြည်နယ် ( ကျား ဝ.၃ သန်း၊ မ ဝ.၂ သန်း) ဝ.၅ သန်း၊ စစ်ကိုင်းတိုင်းဒေသကြီး (ကျား ၂.၇ သန်း၊ မ ၃ သန်း) ၅.၇ သန်း၊ တနင်္သာရီတိုင်းဒေသကြီး (ကျား ဝ.၈ သန်း၊ မ ဝ.၇ သန်း) ၁.၅ သန်း၊ ပဲခူးတိုင်းဒေသကြီး ( ကျား ၂.၃ သန်း၊ မ ၂.၇ သန်း) ၅ သန်း၊ မကွေးတိုင်းဒေသကြီး (ကျား ၁.၈ သန်း၊ မ ၂.၁ သန်း) ၃.၉ သန်း၊ မန္တလေးတိုင်းဒေသကြီး ( ကျား ၃.၂ သန်း၊ မ ၃.၅ သန်း) ၆.၇ သန်း၊ မွန်ပြည်နယ် (ကျား ဝ.၉ သန်း၊ မ ၁.၁ သန်း) ၂ သန်း၊ ရခိုင်ပြည်နယ် ( ကျား ၁.၆ သန်း၊ မ ၁.၈ သန်း) ၃.၄ သန်း၊ ရန်ကုန်တိုင်းဒေသကြီး (ကျား ၄.၂ သန်း၊ မ ၄.၇ သန်း) ၈.၉ သန်း၊ ရှမ်းပြည်နယ် (ကျား ၃.၃ သန်း၊ မ ၃.၄ သန်း) ၆.၇ သန်း၊ ဧရာဝတီတိုင်းဒေသကြီး (ကျား ၃ သန်း၊ မ ၃.၃ သန်း) ၆.၃ သန်း၊ နေပြည်တော်ကောင်စီ( ကျား ဝ.၆ သန်း၊ မ ဝ.၇ သန်း) ၁.၃ သန်းတို့ဖြစ်သည်

စုစုပေါင်း တစ်နိုင်ငံလုံး ခန့်မှန်းလူဦးရေ (ကျား ၂၆.၇ သန်း၊ မ ၂၉.၁ သန်း) ၅၅.၈ သန်းဖြစ်ကြောင်း ထုတ်ပြန်ချက်တွင် ဖော်ပြထားသည်။