ဆိုင်ကယ်လိုင်စင်ကြေးကြီးနေ၍ စစ်တွေတွင် လိုင်စင်လျှောက်ထားသူများအခက်တွေ့

နိရဥ္စရာ၊ အောက်တိုဘာ ၂ /၂၀၂၂

ရခိုင်ပြည်နယ်၊ စစ်တွေမြို့တွင် ဆိုင်ကယ်လိုင်စင်ပြုလုပ်ရာ၌ ကောက်ခံသည့်နှုန်းထားများမှာ မတန်တဆမြင့်မားနေ၍ လိုင်စင်လျှောက်ထားသူများအနေဖြင့် အခက်တွေ့နေရသည်ဟု သိရသည်။

စစ်တွေမြို့ရှိ ရခိုင်ပြည်နယ်ကုန်းလမ်းပို့ဆောင်ရေးညွှန်ကြားရေးမှုဦးစီးဌာန(ကညန)ရုံးတွင် ယခုနောက်ပိုင်း လိုင်စင်လျှောက်ထားသည့် ဆိုင်ကယ်များကို တစ်စီးချင်းအလိုက် လိုင်စင်များ ပြုလုပ်ပေးလျက်ရှိသည်ဟု  သိရသည်။

လိုင်စင်မဲ့မော်တော်ဆိုင်ကယ်များကို မှတ်ပုံတင်လျှောက်ထားရာတွင် အိမ်ထောင်စုစာရင်း၊ နိုင်ငံရေးစိစစ်ရေးကတ်ပြား၊ ရပ်ကွက်ထောက်ခံစာ၊ ရဲစခန်းထောက်ခံစာနှင့် ယာဉ်ထိန်းရဲရုံး ထောက်ခံများလိုအပ်ပြီး မှတ်ပုံတင်နိုင်ရန် စာရွက်စာတမ်းဖိုး၊ အခွန်အခများအပါအဝင် ဆိုင်ကယ်အမျိုးအစားအလိုက် သတ်မှတ်ထားသည်ဟု သိရသည်။

ယိုးဒယားနိုင်ငံထုတ်များဖြစ်ကြသည့် DREAM 125(ဝမ်းတူးဖိုက်)တစ်စီးကို စုစုပေါင်းကုန်ကျငွေ ၃ သိန်းခွဲကျော်ခန့်၊ WAVE 100 အမျိုးအစားဆိုင်ကယ်တစ်စီးကို ၁ သိန်းခွဲခန့်နှင့် Click 150 တစ်စီး၏ မှတ်ပုံတင်စရိတ်ကုန်ကျငွေမှာ ၄ သိန်းခန့်အထိ ကုန်ကျနိုင်သည်ဟု ပြည်နယ်ကညနရုံးက ထုတ်ပြန်ထားသည်။

အဆိုပါနှုန်းထားများမှာ အခြေခံလူတန်းစားများအတွက် အလွန်တရာများပြားလွန်းသည့်အတွက် တတ်နိုင်သလောက် စျေးနှုန်းများ ထပ်မံလျှော့ပေးစေလိုသည်ဟု စစ်တွေတွင် ဆိုင်ကယ်အရောင်းအဝယ်လုပ်ငန်းလုပ်ကိုင်နေသည့် ကိုဦးသန်းက ပြောသည်။

“မတတ်နိုင်တဲ့သူတွေကျတော့ ဆိုင်ကယ်ကတော့ရှိပေမယ့် ဘယ်မှသွားမရဘူးလေ။ လိုင်စင်ဝင်ရမယ်ဆိုရင်လည်း ပမာဏအဲလောက်အများကြီးနဲ့ ဆိုင်ကယ်တစ်စီးက ပျမ်းမျှအားဖြင့် တစ်ပတ်ရစ်တစ်စီးတွက်ကြည့်မယ်ဆိုရင် တရုပ်ကဆိုရင် ဥပမာ ၄ သိန်းခွဲ ၅သိန်းလောက်ပေါ့။ လိုင်စင်ဝင်ဖို့ ၁ သိန်းခွဲ ၂ သိန်းကုန်မယ်ဆိုရင် သူတိုတွေအနေနဲ့ အဆင်မပြေနိုင်ဘူး။ အဆင်မပြေလို့လည်း အဲဒီလိုအနေအထားတစ်ခုဖြစ်နေတယ်လေအခုက။ တတ်နိုင်သလောက် ဈေးလျော့ပေးစေချင်ပါတယ်။ ဈေးလျော့ပေးတာကမှ ပိုအဆင်ပြေပါလိမ့်မယ်”ဟု ပြောသည်။

ယခုကဲ့သို့ အစိုးရက ဆိုင်ကယ်လိုင်စင်များထုတ်ပေးနေခြင်းမှာ လိုင်စင်မဲ့ဆိုင်ကယ်ပိုင်ရှင်များအတွက် အဆင်ပြေနိုင်သော်လည်း ဆိုင်ကယ်အဟောင်းစီးနေသူများအတွက် အဆင်မပြေနိုင်ဟု ဆိုသည်။
သို့အတွက် ငွေကြေးမတတ်နိုင်သည့် ပြည်သူများကိုလည်း လိုင်စင်လျှောက်ထားနှုန်းများကို အစိုးရအနေဖြင့် သက်ညှာပေးစေလိုကြောင်း စစ်တွေမြို့မှ ကမန်အမျိုးသားတစ်ဦးဖြစ်သူ ဦးလှမြင့်က တောင်းဆိုလိုက်သည်။

“အခုက ကညနကို သွားလို့ရှိရင် ဆိုင်ကယ်တစ်စီးကို ပိုက်ဆံ ၂ သိန်း၊ ၂ သိန်းခွဲနှုန်းတောင်းတော့ အဲဒါကို ဘယ်လိုလုပ်တတ်နိုင်ကြတော့မှာလဲ။ ပိုက်ဆံမရှိတဲ့ တစ်ချို့လူတွေမှာ မတတ်နိုင်ဘူး။ မတတ်နိုင်တော့ လိုင်စင်လုပ်မရဘူးပေါ့။ အဲဒီတော့ ယာဉ်ထိန်းရဲဆီ အဖမ်းခံရတာပဲ။ အဲဒီလိုမတတ်နိုင်တဲ့ လူတွေအတွက် ဌာနဆိုင်ရာတွေက နည်းနည်း သက်ညှာပေးစေချင်ပါတယ်။ အဲဒါက ကျနော်တို့ရဲ့မျှော်လင့်ချက်ပါ”ဟု ပြောသည်။

ရခိုင်တစ်ပြည်လုံး သြဂုတ်လနောက်ပိုင်းမှစတင်ကာ မြို့တိုင်းတွင် ဆိုင်ကယ်လိုင်စင်များကို စစ်ကောင်စီတပ်ဖွဲ့ဝင်များ၊ ရဲတပ်ဖွဲ့ဝင်များနှင့် ယာဉ်ထိန်းရဲတို့က တင်းတင်းကျပ်ကျပ် စစ်ဆေးလျက်ရှိပြီး မောင်းလိုင်စင်နှင့် ယာဉ်လိုင်စင်များမပါရှိလျှင် ဖမ်းဆီးအရေးယူမှုများလည်း ပိုများလာနေသည်ဟု ဒေသခံများက ပြောကြသည်။

ယင်းသို့စစ်ဆေးရာတွင် လိုင်စင်သက်တမ်းကုန်ဆုံးပြီး ထပ်မံသက်တမ်း တိုးရမည့်သူများကို စိစစ်တွေ့ရှိပါကလည်း ဒဏ်ကြေးများကို သိန်းနှင့်ချီ ပေးဆောင်ခိုင်းနေကြောင်း သိရသည်။