ပြည်နယ်စစ်ကောင်စီက ရခိုင်စစ်ဘေးရှောင်များကိုအတင်းနေရပ်ပြန်ခိုင်းနေချိန်တွင် စစ်တပ်ကဘူးသီးတောင်မြို့ရှိစစ်ဘေးရှောင်စခန်းတစ်ခုထဲကို ညဉ့်အချိန်ဝင်ရောက်၍သေနတ်ပစ်ဖောက်

နိရဉ္စရာ၊ အောက်တိုဘာ ၄/၂၀၂၂

ရခိုင်ပြည်နယ် စစ်ကောင်စီက ရခိုင်စစ်ဘေးရှောင်များကို ယခုလကုန်တွင် နေရပ်ပြန်ခိုင်းနေချိန်တွင်  ဘူးသီးတောင်မြို့ပေါ်ရှိ စစ်ဘေးရှောင်စခန်းတစ်ခုကို စစ်ကောင်စီတပ်က ညသန်းခေါင်အချိန်တွင် ဝင်ရောက်လာပြီး အကြောင်းမဲ့ သေနတ်ပစ်ဖောက်မှုများ ပြုလုပ်ခဲ့သဖြင့် စခန်းနေ ပြည်သူများ အထိတ်တလန့်ဖြစ်နေကြရသည်ဟု သတင်းရရှိသည်။

ရခိုင်ပြည်နယ်အတွင်းရှိ စစ်ဘေးရှောင်များကို အောက်တိုဘာလ နောက်ဆုံးထားပြီး နေရပ်ပြန်ရန် ပြည်နယ်စစ်ကောင်စီက ဖိအားပေးမှုများ ထွက်ပေါ်နေချိန်တွင် ယခု ပစ်ခတ်မှု ဖြစ်ပေါ်လာသဖြင့် အထူးစိုးရိမ်မိကြောင်း စစ်ဘေးရှောင်များက ပြောသည်။  

"မနေ့က ညဉ့် ၁၂ နာရီလောက်မှာဝင်လာကြတယ်။ သေနတ်တွေကို မိုးပေါ်ကို ထောင်ပြီး ဖောက်ခဲ့ကြပါတယ်။ စခန်းအဝင်ဝနားကအိမ်တချို့ကိုတော့ နည်းနည်း ဝင်စစ်ခဲ့ကြတယ်။ ကျနော်တို့က အိမ်ကြမ်းခင်းအောက်ထဲမှာ ဝပ်နေကြရတယ်။ အထိတ်တလန့်နဲ့ ကြောက်သွားခဲ့တယ်၊ အပေါ်က ကျည်တွေ သွားနေဆိုပေမယ့် သေနတ်သံကြားတော့ လူတိုင်း ကြောက်ကြတာပေါ့။ ဆယ့်ငါးမိနစ် လောက်တော့ ပစ်ခဲ့ကြတယ်။ မနေ့ကတော့ အခြားနေရာတွေကလည်း လက်နက်တွေ ပစ်ကြတာရှိတယ်၊ အဲဒါတွေပါပေါင်းမယ်ဆိုရင် တစ်နာရီနီးပါးလောက်ပစ်ခဲ့ကြတယ်။ လူတွေကိုတော့ ဘာတစ်ခုမှမလုပ်ခဲ့ဘူး "ဟုပြောသည်။

ယမန်နေ့က ဘူးသီးတောင်မြို့ပေါ်တွင် နေ့လယ်မှစတင်ပြီး ဘူးသီးတောင်အခြေစိုက်တပ်ရင်းများမှ လက်နက်ကြီးများ ပစ်ခတ်မှုရှိခဲ့ကြောင်း၊  ယမန်နေ့ ညဉ့်အချိန် ရန်အောင်မြေစစ်ရှောင် စခန်းထဲသို့ သေနတ် ဝင်ရာက်ပစ်ခတ်မှုများမှာ မည်သည့်အကြောင်းအရင်းကြောင့် ပစ်ခတ်ရသည်ကို မသိရှိရကြောင်း နောက်ထပ် စစ်ဘေးရှောင်တစ်ဦးကပြောသည်။

"ဘာအကြောင်းကြောင့်ပစ်တာလဲတော့မသိဘူး။ စခန်းပတ်ပတ်လည် အနီးအနားတွေကလည်း ပစ်တယ်။ ပစ်တာက အများကြီးပစ်ခဲ့တယ်။ ကြောက်လို့ ပုန်းတဲ့သူပုန်းကြတယ်၊ ကျနော်တို့လည်း အိမ်ကြမ်းခင်းအောက်မှာ ဆင်းထိုင်နေကြခဲ့ရတယ်။ စခန်းထဲမှာတော့ ကျည်တွေကျတာ၊ ထိတာမရှိဘူး။ ကျန်တဲ့နေတွေမှာတော့ ကျတယ်လို့ ထင်တယ်" ဟုပြောသည်။

အဆိုပါဘူးသီးတောင်မြို့ရှိ ရန်အောင်မြေစစ်ဘေးရှောင်စခန်းကို ပြီးခဲ့သည့် စက်တင်ဘာလက ပြည်နယ်စစ်ကောင်စီမှ နေရပ်ပြန်ခိုင်းထားပြီး ယခုသေနတ်ပစ်ခတ်မှုသည် စစ်ဘေးရှောင်များကို နေရပ်ပြန်ရန် ခြောက်လှန့် ပစ်ခတ်ခြင်းဖြစ်နိုင်သည်ဟု ၎င်းက ပြောဆိုသည်။

၎င်းပြင် ၎င်းစစ်ဘေးရှောင်စခန်းကို  လူကယ်ပြန်ကဆန်ရိက္ခာဖြတ်တောက်ထားသည်မှာလည်း ၃ လကျော်နီးပါး ကြာမြင့်နေပြီဟု စစ်ဘေးရှောင်များကပြောသည်။

စစ်ဘေးရှောင်အများစုသည် လက်ရှိတိုက်ပွဲများ တကျော့ပြန် ဖြစ်နေသဖြင့် မိမိနေရပ်များသို့ မပြန်လိုကြဟု သိရသည်။ ၎င်းပြင် စစ်ကျန်လက်နက်ခဲယမ်းများ၊ မိုင်းများကိုလည်း သက်ဆိုင်ရာ အဖွဲ့အစည်းများက ရှင်းလင်းမှု မပြုလုပ်ရသေးသဖြင့် နေရပ်ပြန်ရန် စိုးရိမ်နေကြသည်ဟု ၎င်းတို့က ပြောသည်။

စစ်ကောင်စီတပ်သည် လက်ရှိတွင် ရက္ခိုင့်တပ်တော်  (AA) နှင့် မြို့နယ်အချို့တွင် တိုက်ပွဲများ ဖြစ်ပွားလျက်ရှိနေပြီး  လက်နက်ကြီးများကိုလည် ညစဉ်လိုလို နေရာအများအပြားသို့ ပစ်ခတ်နေ၍   မင်းပြား၊ကျောက်တော်၊ မြောက်ဦး၊ ဘူးသီးတောင်၊ မောင်တောမြို့နယ်တို့တွင် သေဆုံးမှုများ၊ ထိခိုက်ဒဏ်ရာရရှိမှုများနှင့် လူနေအိမ်များ ထိခိုက်ပျက်စီးမှုတို့ရှိနေသည်ဟု သိရသည်။ (NN-8)