နိရဉ္စရာ၊ အောက်တိုဘာ ၇/၂၀၂၂

ရခိုင်ပြည်နယ်၊ ဘူးသီးတောင်မြို့နယ်တောင်ပိုင်းမှ မူဆလင်ရာအိမ်မှူးတစ်ဦးသေနတ်ပစ်ခံ၇ကာ သေဆုံးသွားကြောင်း သတင်းရရှိသည်။

သေနတ်ပစ်ခံရ၍ သေဆုံးသွားသူမှာ ဘူးသီးတောင်မြို့နယ်တောင်ပိုင်း၊ဖိုးခေါင်ချောင်းကျေးရွာအုပ်စု၊ ကံပြင်မူဆလင်ကျေးရွာမှ ရာအိမ်မှူးဦးဆာလီဟာမောက်(၄၂)ဖြစ်သည်။

ဖြစ်စဉ်မှာ အောက်တိုဘာ ၆ ရက် ည ၈ နာရီခွဲအချိန်တွင် လူ  (၃)ဦးက နေအိမ်ထဲသို့ပီစတိုဖြင့် ဝင်ရောက် ပစ်ခတ်ခံ၇ပြီး သေဆုံးသွားခြင်းဖြစ်ကြောင်း ဖိုးခေါင်ချောင်းကျေးရွာအုပ်စုအုပ်ချုပ်ရေးမှူးက နိရဉ္စရာကို ပြောသည်။

"သူက ကံပြင်ရွာက ရာအိမ်မှူးပါ။ သူ့အမျိုးသမီးပြောတာက မျက်နှာအုပ်ပြီး မူဆလင်လူ ၃ ယောက်ကအိမ်ထဲကို ဝင်ပစ်သွားတာ ဘယ်ဘက်ရင်ဘက်ကို ပစ်သွားတယ်လို့ပြောပါတယ်။ ရန်ငြိုးရန်စ တွေလည်း မရှိဘူးလို့ ပြောပါတယ်။ လောလောဆယ် ဒီနေ့ ၁၁ နာရီခွဲမှာ သင်္ဂြိုလ်လိုက်ပါပြီ"ဟုပြောသည်။

သေဆုံးသူကို ယနေ့ အောက်တိုဘာ ရ ရက် နံနက် ၁၁ နာရီခွဲတွင်သင်္ဂြိုလ်ခဲ့ကြောင်း သိ၇သည်။

ယခုကဲ့သို့ အကြောင်းမဲ့ဝင်ရောက်ပစ်ခတ်သတ်ဖြတ်ခံရသည့်အတွက်ဒေသခံကျေးရွာသားများအကြား စိုးရိမ်မှုများရှိနေပြီး လူမျိုးရေးပဋိပက္ခကိုအသွင်ဆောင်ဖန်တီးကာသတင်းမှားများနှင့် ပြဿနာ ဖန်တီးနေမှုများလည်း ရှိနေ၍ စဉ်းစားချင့်ချိန်ပြီး ယုံကြည်ကြရန်ဘူးသီးတောင်မြို့နယ်မှ အမည်မဖော်လိုသူ မူဆလင်ကျေးရွာအုပ်ချုပ်ရေးမှူးတစ်ဦးက ပြောသည်။

"လာပစ်တဲ့မူဆလင် ၃ ယောက်အထဲမှာ ဘင်္ဂလာဘက်ကိုပြေးသွားတဲ့ ကံပြင်ရွာသား တစ်ယောက်ပါတယ် ပြောပါတယ်။ အာဆာ ဟုတ်မဟုတ်ကိုတော့မပြောတက်ပေမယ့် မြင်ဖူးသိဖူးတဲ့လူကတော့ မျက်နှာအုပ်ထားလည်း ပုံစံကိုသိရင်မှတ်မိနိုင်ပါတယ်။ ရန်ငြိုးလည်းမရှိဘဲ အိမ်ထဲမှာအသတ်ခံလိုက်ရတာကတော်တော်စိုးရိမ်ဖို့ကောင်းပါတယ်။ ဒီအပေါ်မှာ လူမျိုးရေး မီးမွှေးချင်နေသူတွေကလည်း အမျိုးမျိုးသတင်းအမှားတွေလွှင့်ကြတယ်။ ဒါတွေအပေါ်စဉ်းစားချင့်ချိန်ပြီး ယုံကြည်ဖို့လည်း လိုပါတယ်"ဟု ပြောသည်။