ဖမ်းဆီးခံခဲ့ရသည့် မြေပုံ ငပသုန်တိုက်နယ်ဆရာဝန်ကို စစ်ကောင်စီကပြန်လွှတ်ပေး

နိရဥ္စရာ၊ အောက်တိုဘာ ၇ / ၂ဝ၂၂

ရခိုင်ပြည်နယ် မြေပုံမြို့နယ် ငပသုန်တိုက်နယ်ဆရာဝန် ဒေါက်တာဝင်းနိုင်စိုးကို စစ်ကောင်စီတပ်က ဖမ်းဆီးပြီး ၉ ရက်အကြာတွင် ပြန်လွှတ်ပေးလိုက်သည်ဟု သူနှင့်နီးစပ်သူတစ်ဦးက ပြောသည်။

သူသည် အောက်တိုဘာလ ၅ ရက်က ပြန်လွတ်လာခြင်းဖြစ်သော်လည်း တာဝန်ကျသည့် ငပသုန်တိုက်နယ်ဆေးရုံသို့ ယနေ့ အောက်တိုဘာ ၇ ရက်အထိ ရောက်ရှိလာခြင်းမရှိသေးဟု သူနှင့်နီးစပ်သူက ဆိုသည်။

“လွတ်တော့ လွတ်လာပြီ။ ဒါပေမဲ့ ဆေးရုံကိုတော့ မရောက်သေးဘူး။ လက်ရှိမှာ သူ ပေါက်တောမှာရောက်နေသလိုလို သိရပါတယ်”ဟု ပြောသည်။

ငပသုန်တိုက်နယ် ဆေးရုံတွင်အသုံးပြုရန် ဆေးဝါးများသယ်ဆောင်ကာ စစ်တွေမှ စက်တင်ဘာလ ၂၅ ရက်ကထွက်ခွာလာသည့် မော်တော်ဘုတ်ကို စစ်တပ်က ပေါက်တောမြို့နယ် တောင်းဖူးကျေးရွာအနီး ဖမ်းဆီးပြီးနောက် စက်တင်ဘာလ ၂၇ ရက်တွင် ဒေါက်တာဝင်နိုင်စိုးကို မေးမြန်းစရာရှိသည်ဟု ဆိုကာ စစ်တပ်က စစ်တွေသို့ခေါ်ယူသွားပြီး ဖမ်းဆီးခဲ့ခြင်းဖြစ်သည်ဟု သိရသည်။

ဆေးဝါးများသယ်ဆောင်ခဲ့သည့်မော်တော်တော်ဘုတ်ကို စက်တင်ဘာလ ၂၈ ရက်တွင် ပြန်လွှတ်ပေးခဲ့သော်လည်း ဒေါက်တာဝင်နိုင်စိုးဆက်လက်ဖမ်းဆီကာ စစ်ဆေးမှုများပြုလုပ်ခဲ့သည်ဟု သိရသည်။

ငပသုန်တိုက်နယ်ဆေးရုံကို ငပုသုန်ကျေးရွာအပြင် အနီးအနားရှိကျေးရွာပေါင်း ၁၀ ကျော်က အားထားနေရသည့်ဆေးရုံတစ်ခုဖြစ်သည်ဟုလည်း ဒေသခံများက ပြောသည်။

ပြီးခဲ့သည့် စက်တင်ဘာလ ၆ ရက်ကလည်း တောင်ကုတ်မြို့မှ သွားဆရာဝန် ဒေါက်တာကျော်သူရထွန်းကို စစ်ကောင်စီတပ်ကဖမ်းဆီးကာ မတရားအသင်းဆက်သွယ်ရေးပုဒ်မ ၁၇(၁) ဖြင့် စက်တင်ဘာ ၂၅ ရက်တွင် အမှုဖွင့်တရားစွဲထားသည်ဟု သိရသည်။