မင်းပြားမြို့မှ ရပ်ကွက်အုပ်ချုပ်ရေးမှူးအပါအဝင် ဒေသခံ၅ဦးကိုအာရုဏ်တက်ချိန်တွင်စစ်ကောင်စီတပ်ကဝင်ရောက်ဖမ်းဆီးသွား

ရေးသူ: Web Master
| ရက်စွဲ: ၀၈ အောက်တိုဘာ ၂၀၂၂
| ကြည့်ရှုသူ: 8.3k

နိရဉ္စရာ၊ အောက်တိုဘာ ၈/၂၀၂၂

ရခိုင်ပြည်နယ်၊ မင်းပြားမြို့တွင် ယနေ့အောက်တိုဘာလ ၈ ရက်၊ နံနက်အာရုဏ်တက် ၄ နာရီခန့် အချိန်တွင် ရပ်ကွက်အုပ်ချုပ်ရေးမှူး တစ်ဦး အပါအဝင် ဒေသခံ ၅ဦးကို စစ်ကောင်စီတပ်သားများက ဝင်ရောက်ဖမ်းဆီးသွားကြောင်း သိရသည်။

ဖမ်းဆီးခံရသူများမှာ မင်းပြားမြို့ ဥက္ကာပျံရပ်ကွက်အုပ်ချုပ်ရေးမှူး ဦးအောင်ကျော်လှ (ခ) ညီဒေါင်းချေနှင့် ဥက္ကာပျံရပ်ကွက်နေ ကိုမောင်ဆန်းနှင့် အခြားဒေသခံ ၃ ဦးတို့ဖြစ်ကြသည်။

၎င်းတို့ ၅ ဦးစလုံးအား မင်းပြားမြို့ ဥက္ကာပျံရပ်ကွက်မှ စစ်ကောင်စီတပ်သားများက ယနေ့ နံနက်အာရုဏ်တက်အချိန်တွင် ဖမ်းဆီးသွားခြင်းဖြစ်ကြောင်း အုပ်ချုပ်ရေးမှူးနှင့် နီးစပ်သူတစ်ဦးက ပြောသည်။

"ဥက္ကာပျံအုပ်ချုပ်ရေးမှူးနဲ့ နောက်ထပ် လေးယောက်ပါသွားတယ်လို့ သိရတယ်။ အခြားသူတွေကိုတော့ မသိရသေးဘူး။ မနေ့ကညည့်တုန်းက လက်နက်ကြီး လက်နက်ငယ်တွေလည်း ပစ်တယ်၊ ပြီးတော့ ဥက္ကာပျံရပ်ကွက်က လက်နက်ငယ်ပစ်သံတွေလည်း ကြားလိုက်ရတယ်၊ ဘာအကြောင်းကြောင့်နဲ့ ဖမ်းသွားလဲတော့ ကျနော်လည်းမသိရသေးဘူး" ဟုပြောသည်။

မင်းပြားမြို့တွင် ယမန်နေ့အောက်တိုဘာလ ၆ ရက် ညည့်အချိန်က ကြပ်စင်တံထား၊ ကျိန်းတောင်၊ မယ်တော်တောင်နှင့် အခြားစကစတပ်စွဲထားသည့်နေရာများမှ လက်နက်ကြီး၊ လက်နက်ငယ်များဖြင့် တစ်ညည့်လုံး ပစ်ခတ်မှုများပြုလုပ်ခဲ့ကြောင်း မင်းပြားမြို့ခံများကပြောသည်။

"ဖမ်းသွားတာက ငါးယောက်လို့သိရတယ် ဥက္ကာပျံအုပ်မှူးအပါအဝင်။ ဥက္ကာပျံရပ်ကွက်က ဈေးဟောင်းပိုင်းအုပ်စုဘက်ကျမယ် အဖမ်းခံတဲ့သူတွေက။ မနေ့ညညည့် ကိုးနာရီလောက်ကနေ စစ်သားတွေက မင်းပြားမြို့ထဲပတ်နေတယ်" ဟုပြောသည်။

ထိုသို့ ဖမ်းဆီးမှု၊ ပစ်ခတ်မှုများရှိနေသော်လည်း လက်ရှိတွင် မင်းပြားမြို့မှာ ဈေးဆိုင်အချို့မှာ သီတင်းကျွတ်မီးထွန်းပွဲတော်ရှိ၍ ပုံမှန်အတိုင်းဖွင့်လှစ်ရောင်းချနေကြောင်း သိရသည်။

ယမန်နေ့ အောက်တိုဘာလ ၇ ရက်ကမင်းပြားမြို့ ကြပ်စင်တံတားပေါ်တွင် စစ်ကောင်စီတပ်များကို ရက္ခိုင့်တပ်တော်(အေအေ)က ဝင်ရောက်တိုက်ခိုက်ခဲ့ပြီး စစ်ကောင်စီတပ်သား ၈ ဦးသေဆုံးခဲ့ပြီး နောက်ထပ်ဒဏ်ရာရသူအချို့လည်းရှိခဲ့ကြောင်း ရက္ခိုင့်တပ်တော်(အေအေ)၏ ယမန်နေ့က သတင်းထုတ်ပြန်ချက်အရသိရသည်။

(NN-8)