စစ်တွေတွင် လူငယ်တစ်ဦးကြိုးဆွဲချသေဆုံး၊ ၅ လကျော်အတွင်းစစ်တွေတွင် ကြိုးဆွဲချသေဆုံးသူ ၆ ဦးထိရှိလာ

နိရဥ္စရာ၊ အောက်တိုဘာ ၈/၂၀၂၂

ရခိုင်ပြည်နယ်၊ စစ်တွေမြို့တွင် ယမန်နေ့ ညနေက အသက် ၂၀ ကျော်အရွယ် လူငယ်တစ်ဦးကြိုးဆွဲချ သေဆုံးသွားခဲ့ပြီး စစ်တွေမြို့နယ်အတွင်း (၅) လအတွင်း ကြိုးဆွဲချသေဆုံးသူမှာ ၆ ဦးရှိသွားပြီဟု သတင်းရရှိသည်။

ယမန်နေ့ အောက်တိုဘာ ၇ ရက် ည ၈ နာရီခွဲခန့်က ကြိုးဆွဲချ သေဆုံးသူ လူငယ်မှာ စစ်တွေမြို့၊ ရွာကြီးမြောက်ရပ်ကွက်၊ ငါးဆောင်စုနေ အသက် (၂၄) အရွယ် ကိုမောင်ဝင်းလှိုင် ဖြစ်သည်။

သူ၏နေအိမ်တွင် ကြိုးဆွဲချသေဆုံးနေသည်ကို သူ့အမျိုးသမီးကတွေ့မြင်ခဲ့ခြင်းဖြစ်သည်ဟု ရွာကြီးမြောက်ရပ်ကွက် အုပ်ချုပ်ရေးမှူး ဦးစံသိန်းက နိရဥ္စရာသတင်းဌာနကို ပြောသည်။

“သူက ဘယ်အချိန်ကတည်းက တွဲချသေနေတယ်မသိဘူး။ သူတို့က မိန်းမနဲ့ နှစ်ယောက်တည်း နေကြတာဆိုတော့ မိန်းမရောက်မှသိတာ။ မိန်းမက သူ့အမေအိမ်ကိုသွားတာ။ တစ်ရပ်ကွက်တည်းပဲ” ဟုပြောသည်။

သူမသေဆုံးခင်ကလည်း စားရေး၊ သောက်ရေး၊ စီးပွားရေးမပြေလည်သည့်အတွက် ကြိုးဆွဲချသေမည်ဟု ပြောဆိုမှုများလည်း ရှိနေခဲ့သည်ဟု ရပ်ကွက်အုပ်ချုပ်ရေးမှူးက ဆက်ပြောသည်။

“သူတို့ စီးပွားရေးလည်း မချောင်လည်ဘူး။ သူများအိမ်မှာ ငှားနေရတယ်။ လကုန်ရင် ပိုက်ဆံပေးရမယ်။ လင်က အလုပ်မလုပ်။ ကြိုးဆွဲချဖို့လုပ်တယ်၊ ကြိုးကိုပြတယ်၊ ကြိုးဆွဲချဖို့လုပ်တယ်နဲ့ ဒီခေါက်တော့ ကပ်ပါသွားတယ်။ သူ့မှာက ကြိုးခေါ်နေတယ်နေမှာ” ဟုပြောသည်။

စစ်တွေမြို့နယ် ၅ လကျော်အတွင်း လူ ၆ ဦး ကြိုးဆွဲချသေဆုံးသွားခဲ့သူများမှာ ယမန်နေ့က စစ်တွေမြို့ ရွာကြီးမြောက်ရပ်ကွက်တွင် နေထိုင်သူ ကိုမောင်ဝင်းလှိုင် (၂၄ နှစ်)၊ မင်းဂံ ဝန်ထမ်းအကွက် (၃)မှ ဒေါ်ဥမ္မာခင်၊ စက်ရုံစုရပ်ကွက်မှ ဦးကျော်မြတ် (၃၀ နှစ်)၊ ဦးထွန်းသာစိန် (၅၈ နှစ်)၊ စစ်တွေမြို့နယ် ကန်ပြင်ကျေးရွာမှ ကိုထွန်းအေးကျော် (၂၁ နှစ်)နှင့် မယုယုလှိုင် (၁၈ နှစ်) တို့ဖြစ်ကြသည်။

သူတို့ ၆ ဦးသည် ယခုနှစ် မေလမှ ယမန်နေ့ အောက်တိုဘာ ၇ ရက်အထိ ၅ လကျော်အတွင်း ကြိုးဆွဲချသေဆုံးသွားခဲ့သူများဖြစ်သည်ဟု စစ်တွေရှိ မေတ္တာရောင်ခြည်ဖောင်ဒေးရှင်း၏ စာရင်းအရ သိရသည်။