နိရဥ္စရာ၊ အောက်တိုဘာ၁၁/၂၀၂၂

ရခိုင်ပြည်နယ်ဘူးသီးတောင်မြို့နယ်ရှိ အမှတ်(၈)နယ်ခြားစောင့်ရဲတပ်ဖွဲ့ခွဲ (နခခ-၈)တွင်ယနေ့နံနက်မှစတင်ကာ ၃ ရက်ကြာ လက်နက်ငယ်များ လေ့ကျင့်ပစ်ခတ်နေသဖြင့် အနီးအနားရှိ ကျေးရွာပေါင်း၃၀ ခန့်ကို သွားလာခွင့်တားမြစ်ထားကြောင်း သတင်းရရှိသည်။

၎င်းလက်နက်ငယ် လေ့ကျင့်ပစ်ခတ်မှုကို ယနေ့ အောက်တိုဘာလ ၁၁ရက်မှ ၁၃ ရက်အထိ နံနက် ၆ နာရီမှ ညနေ ၆ နာရီအတွင်း ပြုလုပ်သွားမည်ဟု သိ၇သည်။

ယင်းသို့ပစ်ခတ်နေစဉ်အတွင်း  နခခ(၈)နှင့် မီတာ ၈၀၀ ခန့်အကွာ အနီးပတ်ဝန်းကျင်တွင် တည်ရှိသည့်ကျေးရွာ ၃၀ ခန့်မှပြည်သူများကို အသွားအလာ ကန့်သတ်ပိတ်ပင်လိုက်သည်ဟု ဒေသခံများက ပြောကြားသည်။

ထိုကဲ့သို့ ကန့်သတ်ပိတ်ပင်ခြင်းကို ယမန်နေ့ အောက်တိုဘာ ၁၀ ရက်က နခခ(၈)တပ်ဖွဲ့ခွဲမှူးဒုတိယရဲမှူး ကျော်သူ၇က လက်မှတ်ရေးထိုးကာ ကျေးရွာအုပ်စုအုပ်ချုပ်ရေးမှူးများထံပေးပို့ ခဲ့သည်ဟုဆိုသည်။

ပေးပို့သည့် အကြောင်းကြားစာတွင် ဒေသခံ ပြည်သူများတောင်ပေါ်သို့ သစ်/ဝါး/ထင်း တက်ရောက်ခုတ်ယူခြင်း၊ ဖားရှာ၊ ငါးရှာ၊ဟင်းစားရှာခြင်း၊ ကျွဲ/နွား/ဆိတ်များအား စားကျက်သို့ ထိန်းကျောင်းခြင်း၊တောင်ယာ/လယ်လုပ်ငန်းများ လုပ်ကိုင်ရာတွင် ဖြတ်သန်းသွားလာခြင်းလုံး၀(လုံး၀)မပြုကြရန်ဟု ပါရှိကြောင်းသိ၇သည်။

နခခ (၈)အနီးရှိ ကျေးရွာပေါင်း၂၈ ရွာခန့်သည် အဓိကအားဖြင့် ချောင်းနှင့် တောတောင်များကိုမှီခိုလုပ်ကိုင်စားသောက်နေကြရသည်ဖြစ်ရာ ယခုကဲ့သို့ ၃ ရက်ကြာသွားလာခွင့်တားမြစ်ထား၍ ဝမ်းစာရှာဖွေ၇ခက်ခဲနေကြသလို စားသောက်ရေးအခက်ကြုံနေကြ၇သည်ဟုဒေသခံများက ပြောသည်။ 

နခခ(၈)အနီးမှ ကျေးရွာအုပ်ချုပ်ရေးမှူးတစ်ဦးက“အဲလိုတားမြစ်ထားတဲ့အတွက် ကျနော်တို့ဒေသခံတွေအတွက်သွားရေးလာရေးခက်ခဲပြီး စားဝတ်နေရေးအတွက်ပါ အခက်အခဲဖြစ်နေပါတယ်။ဘာလို့ဆို ကျနော်တို့အုပ်စုအတွင်းမှာရှိတဲ့ အဲဒီနခခ(၈)ပတ်ဝန်းကျင်မှာရှိတဲ့ကျနော်တို့မှာချောင်းနဲ့တောင်ကိုမှီခိုလို့စား၇တာပါ။ လယ်ယာမြေဧရိယာတွေလည်းနည်းပါးတယ်။ ရွာသားတွေကလည်း ဆင်းရဲမှုရှိကြတယ်။ နဂိုကနေ ရွာသားတွေမှာကျပ်တည်းကြတော့ အခုလိုတားမြစ်လိုက်လို့ အခက်အခဲတွေနဲ့ကြုံနေ၇ပါတယ်”ဟု ပြောသည်။

နခခ (၈)အနီးတွင်အလယ်ချောင်း၊ သဘောက်ချောင်း၊ ကင်းချောင်း၊ အာကာပျံ၊ လက်ပံကိုင်း၊သပိတ်တောင်စသည့်ကျေးရွာများအပါအဝင် ရွာပေါင်း ၂၈ ရွာခန့်ရှိသည်ဟု ဒေသခံများကပြောသည်။

နခခ (၈)တွင်ယခုကဲ့သို့ လက်နက်ငယ်များပစ်ခတ်လေ့ကျင့်မှုသည် ယခင်က မရှိခဲ့ဖူးဟုလည်းဒေသခံများက ပြောသည်။