စစ်ကောင်စီတို့ရခိုင်တွင်အဖမ်းအဆီးကြမ်း၊ ရမ်းဗြဲနှင့်ကျောက်ဖြူတို့တွင် ဒေသခံ ၇ ဦးကိုထပ်မံဖမ်းဆီး

နိရဥ္စရာ၊ အောက်တိုဘာ ၁၁/၂၀၂၂

ရခိုင်ပြည်နယ်တွင် စစ်ကောင်စီတပ်က အဖမ်းအဆီးကြမ်းနေပြီး ရမ်းဗြဲနှင့် ကျောက်ဖြူမြို့တို့တွင် နောက်ထပ် ဒေသခံ (၇) ဦးထပ်မံဖမ်းဆီးသွားကာ မိသားစုများထံသို့လည်း တစ်စုံတစ်ရာ ဆက်သွယ်အကြောင်းကြားခြင်းမရှိ၍ စိုးရိမ်နေကြရသည်ဟုဒေသခံများက ပြောသည်။

အောက်တိုဘာ ၉ ရက်နေ့က ဖမ်းဆီးခံရသူများမှာ ကျောက်ဖြူမြို့နယ်၊ စနဲမြို့ ကံပြင်စုရပ်ကွက်မှ ဦးခေါင်းချွန်း၊ ပန်းရံလုပ်သား ဦးဧပြီကျော်၊  ကံပြင်စုရပ်ကွက်မှ သံတိုသံစဝယ်သူ ဦးဟန်ထွန်းနှင့် ချင်းမင်းပြင်ကျေးရွာမှ ဦးအောင်ကျော်ဝင်းတို့ဖြစ်ကြသည်။

အောက်တိုဘာ ၇ ရက်နေ့က ဖမ်းဆီးခံခဲ့ရသူ ၃ ဦးမှာ ကျောက်ဖြူမြို့၊ အစိုးရရပ်ကွက်မှ အစိုးရဝန်ထမ်းများဖြစ်ကြသည့် ဦးသိန်းဝင်း၊ ဦးမျိုးမင်းနိုင်(ခ) ချထူးနှင့် ဦးညီညီမျိုးထွန်းတို့ ဖြစ်ကြသည်။

ဦးခေါင်းချွန်း၊ ဦးဧပြီကျော်၊ ဦးဟန်ထွန်းနှင့် ဦးအောင်ကျော်ဝင်းတို့ ၄ ဦးကို အောက်တိုဘာ (၉) ရက် ည ၁၀ နာရီခန့်တွင်  ရဗ်းဗြဲမြို့မှကားနှင့်ထွက်လာစဉ်တွင် ခမောင်းခြေတိုင်ကျေးရွာဘုန်းတော်ကြီး ကျောင်းတွင် တပ်စွဲနေသော စကစတပ်သားများက ဖမ်းဆီးခဲ့ခြင်းဖြစ်ပြီး သူတို့ကို မည်သည့်နေရာသို့ ခေါ်ဆောင်သွားသည်ကို မသိရသေးဘဲ စစ်ဆေးမေးမြန်းနေကြောင်းသာ သိရသည်ဟု အမည်မဖော်လိုသူ တစ်ဦးက ပြောသည်။

"ခမောင်းခြေတိုင်နားမှာ အဖမ်းခံရတာပါ သူတို့က။ အခု အဲ့ဒီဖမ်းထားတဲ့ ၄ ယောက်ကို စစ်ဆေးနေတယ်လို့တော့ သိရပါတယ်။ ဘယ်မှာဘယ်လိုစစ်နေလဲ သေချာလည်းမသိရပါဘူး"ဟု ပြောသည်။

ယင်းအပြင်  ကျောက်ဖြူမြို့မှ  ဆက်သွယ်ရေးနှင့်ဆေးဘက်ဆိုင်ရာတို့က ဝန်ထမ်းများဖြစ်ကြသည့်  ဦးသိန်းဝင်း၊ ဦးမျိုးမင်းနိုင်(ခ) ချထူးနှင့် ဦးညီညီမျိုးထွန်းတို့ကို  အောက်တိုဘာလ ၇ ရက်က စစ်တပ်က ဖမ်းဆီးသွားပြီး ယနေ့တိုင်အောင် အဆက်အသွယ်မရသေး၍ မိသားစုများ စိုးရိမ်နေကြသည်ဟု သိရသည်။

“ဖမ်းဆီးတာတော့မဟုတ်ဘူး။ မေးမြန်းစရာရှိတယ်ဆိုပြီးခေါ်သွားတာ။ ကြည်ကြည်ဖြူဖြူ လိုက်သွားတယ်။ ခုထိတော့ အဆက်အသွယ် မရသေးဘူး” ဟု ဦးသိန်းဝင်း၏ မိသားစုဝင် တစ်ဦးကပြောသည်။

၎င်းတို့ကို ပြီးခဲ့သည့် အောက်တိုဘာ ၇ ရက် နေ့လယ်ပိုင်းက သူတို့နေအိမ်မှ အရပ်ဝတ်နှင့် လူတစ်စုက မေးမြန်းစရာရှိသည်ဟု ဆိုပြီး ကျောက်ဖြူမြို့အခြေစိုက် ခလရ(၃၄) တပ်ရင်းကို ဖမ်းဆီးခေါ်ဆောင် သွားခဲ့ခြင်းဖြစ်သည်ဟု သူတို့နှင့် နီးစပ်သူတစ်ဦးက ပြောသည်။

လက်ရှိ ရခိုင်မှ ကျောက်ဖြူ၊ ရမ်းဗြဲ၊ မြောက်ဦး၊ ကျောက်တော်၊ ပုဏ္ဏားကျွန်း၊ ဘူးသီးတောင်၊ မောင်တော နှင့် မင်းပြားမှ ဒေသခံအရပ်သား ဖမ်းဆီးခံရသူများ ဆက်တိုက်ရှိနေပြီး အနည်းဆုံး (၇၀) အထိရှိနေကြောင်း သိရသည်။ ဖမ်းဆီးခံရမှုအထဲတွင် ကျောက်ဖြူမြို့မှအများဆုံးဖြစ်ကြောင်း သိရသည်။(NN-7/3)