တရားလို ၃ ကြိမ်ဆက်တိုက်ပျက်ကွက်၍ မြောက်ဦးမြို့မှ ကိုရင်ဆို့(ခေါ်)ကိုကျော်ဇံဝေ၏ ယနေ့ရုံးချိန်းတွင်လည်း အမှုမစစ်နိုင်

နိရဥ္စရာ၊ အောက်တိုဘာ ၁၁/၂၀၂၂

တရားလိုဘက်က ၃ကြိမ်တိုင်တိုင် ဆက်တိုက်ပျက်ကွက်၍  မြောက်ဦးမြို့မှဖမ်းဆီးခံထားရသည့် ကိုရင်ဆို့(ခေါ်)ကိုကျော်ဇံဝေ(ခေါ်)ကိုဖိုးလပြည့်၏ ယနေ့ ရုံးချိန်းတွင်လည်း အမှုကို မစစ်ရဖြင့် အမှုသည်ဘက်က နစ်နာမှုရှိနေသည်ဟု သိရသည်။

သူ့ကို ယနေ့ အောက်တိုဘာ ၁၁ ရက် နံနက် ၁၁ နာရီကျော်ခန့်တွင် မြောက်ဦးမြို့နယ်တရားရုံး၌ ယနေ့ ရုံးထုတ်ခဲ့သော်လည်း တရားလိုဖြစ်သည့် စစ်ကောင်စီဘက်က ရုံးချိန်းပျက်ကွက်ခဲ့သည်။

အချိန်ကြန့်ကြာနေ၍ တရားလိုဘက်က အမှုကိုရင်ဆိုင်ပြီး ရုံးချိန်းတက်စေချင်သည်ဟု အစ်မဖြစ်သူ မအိမ်စည်က နိရဥ္စရာကိုပြောသည်။

"အခြေအနေက မထူးပါဘူး။ တရားလိုဘက်က ရုံးချိန်းမရောက်လာပါဘူး။ တရားလိုဘက်ကလည်း ရုံးချိန်းလာစေချင်ပါတယ်။ အရင်ဆုံးအမှုကိုဆုံးဖြတ်စေချင်ပါတယ်။ အဲ့လောက်ပဲ ပြောချင်ပါတယ်"ဟုပြောသည်။

ကိုရင်ဆို့ကို စက်တင်ဘာ ၁၉ ရက်နေ့ ရုံးတင်ရာတွင် တရားလို စစ်ကောင်စီ အရာရှိ ရောက်ရှိခဲ့သော်လည်း  စက်တင်ဘာ ၂၇၊ အောက်တိုဘာ ၄၊ အောက်တိုဘာ ၁၁ တို့တွင် တစ်ကြိမ်မှ ရောက်ရှိလာခြင်း မရှိတော့ဟုဆိုသည်။

ကိုရင်ဆို့(ခေါ်)ကိုကျော်ဇံဝေ(ခေါ်)ကိုဖိုးလပြည့်ကို ယနေ့ရုံးချိန်းတွင် မိသားစုဝင်များနှင့်တွေ့ခွင့်ရပြီး ကျန်းကျန်းမာမာတွေ့ခဲ့ရသည်ဟု အစ်မဖြစ်သူက ပြောသည်။

သူ့အမှုကို လာမည့် အောက်တိုဘာ ၁၈ ရက်တွင် ထပ်မံ ရုံးချိန်းလိုက်သည်ဟု သိရသည်။

လူမှုကွန်ရက်စာမျက်နှာတွင် ဟာသဗီဒီယိုများနှင့် စစ်ရေး၊ နိုင်ငံရေး အခြေအနေများကိုမျှဝေရင်း လူသိများလာနေသည့် သူ့ကို စစ်သားနှင့် ရဲအင်အား ၂၀ ခန့်က စက်တင်ဘာလ ၄ ရက် နံနက် ၈ နာရီခန့်တွင် မြောက်ဦးမြို့၊ တောင်ရပ်ရပ်ကွက်ရှိ သူ၏နေအိမ်မှ ဝင်ရောက် ဖမ်းဆီးခေါ်ဆောင်သွားခြင်းဖြစ်သည်။

လက်ရှိတွင် သူ့ကိုမြောက်ဦးမြို့မရဲစခန်းတွင် ဖမ်းဆီးချုပ်နှောင်ထားသည်ဟု သိရသည်။

ယင်းနောက် သူ့ကို နိုင်ငံတော်အေးချမ်းသာယာရေးကို ပျက်ပြားစေရန် ရည်ရွယ်လျက် လှုံ့ဆော်ခြင်း၊ ဝါဒဖြန့်ခြင်းများ ပြုမှုလုပ်ဆောင်ခဲ့သည့် အတွက်ဟုဆိုကာ ဖမ်းဆီးရခြင်းဖြစ်သည်ဟု စစ်ကောင်စီက စက်တင်ဘာ ၆ ရက်ထုတ် မြန်မာ့အလင်းသတင်းစာတွင် ထုတ်ပြန်ခဲ့သည်။
 
သူ့ကို နိုင်ငံတော်ဆူပူလှုံ့ဆော်မှုဆိုင်ရာဥပဒေပုဒ်မ ၅ဝ၅(က) အမှုဖွင့်ထားသည်ဟုလည်း မိသားစုဝင်များက ပြောသည်။ (NN-13)