ကျောက်တော်မြို့နယ် ကျေးရွာအချို့ပေါ်မှ ညဉ့်အချိန် လေယာဉ်ပျံဝဲပြီး တပ်ရင်းအချို့ကလည်း လက်နက်ကြီးများပစ်ခတ်သဖြင့် ပြည်သူများအထိတ်တလန့်ဖြစ်ကြရ

နိရဥ္စရာ၊ အောက်တိုဘာ ၁၂/ ၂၀၂၂

ရခိုင်ပြည်နယ်၊ ကျောက်တော်မြို့နယ်တွင် ညဉ့်သန်းခေါင်အချိန် လေယာဉ်များ ကျေးရွာများပေါ်က ပျံဝဲပြီး မြို့နယ်အတွင်း အခြေစိုက်သည့် တပ်ရင်းများကလည်း လက်နက်ကြီးများပစ်ခတ်သဖြင့် ပြည်သူများအနေဖြင့် အထူးအထိတ်တလန့်ဖြစ်ခဲ့ရသည်ဟု  ဒေသခံများက ပြောသည်။

ကျောက်တော်မြို့နယ်ရှိ ကန်စောက်အခြေစိုက် ခမရ ၅၃၉ တပ်ရင်းက ယနေ့ အောက်တိုဘာ ၁၂ ရက်၊ ညဉ့် ၁၂ နာရီကျော်ခန့်တွင် လက်နက်ကြီးများ ပစ်ခတ်နေခဲ့ပြီး များမကြာမီ လေယာဉ် ၂ စီးလည်း ပျံဝဲ ရောက်ရှိလာခဲ့ကြောင်း၊ ၎င်းလေယာဉ်များသည် ကန်စောက် အခြေစိုက်  ၅၃၉ တပ်နှင့်အနီးအနားရှိ ကျေးရွာများဖြစ်သည့် ပန်းဖဲချောင်း၊ ခမောင်းတော၊ ကန်စောက်၊ မီးရပ်ပြင်၊ ဝါးတောင်အစရှိသည့် ကျေးရွာများပေါ်၌ ပျံဝဲနေခဲ့သည်ဟု ဒေသခံများက ပြောသည်။

ဒေသခံတစ်ဦးက "လေယာဉ်မလာခင်ကနေ လက်နက်ကြီးလှမ်းပစ်နေပြီ။ ည ၁၂ နာရီကျော်လောက် ရှိပြီ။ အသံကြားလို့ နိုးလာတာ။ ကောင်းကင်မှာ လေယာဉ်လည်း ဝဲတယ်။ လက်နက်ကြီးလည်း ပစ်တယ်။ ညဉ့်အချိန်ဆိုတော့ လက်နက်ကြီးပစ်လိုက်လို့ ကျည်က ကောင်းကင်မှာအရှိန်နဲ့သွားတဲ့ မီးရောင်တောင်မြင်ရတယ်။ ဘယ်ကိုပစ်မှန်းတော့ မသိရဘူး" ဟု ပြောသည်။

နောက်ထပ် ဒေသခံတစ်ဦးက "အိမ်ပေါ်က ကောင်းကင်မှာ လေယာဉ်ပျံဝဲနေတော့ လေယာဉ်ပေါ်ကနေ ဗုံးပဲချပစ်ခဲ့မလား။ လက်နက်ကြီးပဲ ကျလာမလား။ တစ်ညလုံး ရင်တထိတ်ထိတ်နဲ့ စိုးရိမ်နေရတယ်။ ဗုံးခိုကျင်းထဲ ဝင်လည်း ပုန်းနေလိုက်တယ်။ ကြောက်လို့" ဟု ပြောသည်။

စစ်ကောင်စီတပ်က လက်နက်ကြီးများ အဆက်မပြတ်ပစ်ခတ်ခြင်း၊  ကျေးရွာများပေါ်မှ လေယာဉ်ပျံဝဲခြင်းများနှင့် ပတ်သက်ပြီး အကြောင်းအရင်းကို မသိနိုင်ကြောင်း  ဒေသခံများက ပြောသည်။

တခြားဒေသခံတစ်ဦးကလည်း " ဘာကြောင့် ဒီလို လုပ်သလည်းဆိုတာ မသိဘူး။ အရပ်သားတွေက ညဉ့် အချိန် လေယာဉ်ပျံလာတော့ အသံအကျယ်ကြီးကြားရပြီး လက်နက်ကြီးတွေပစ်တော့ လူတိုင်း ထိတ်လန့်ကုန်တယ်။ လေယာဉ် မလာခင်ကနေ ၅၃၉ တပ်ကနေ လက်နက်ကြီးတွေပစ်တယ်။ လက်နက်ကြီးတန့်သွားတော့ လေယာဉ်ဝဲတယ်။ ကျောက်တော် ဦးစွန်းတောင်ဘက်ကိုလည်း လက်နက်ကြီး လှမ်းပစ်တယ်။ ပြီးတော့ လေယာဉ်က ယိုးချောင်း ချောင်းဖျားဘက်ကို ပျံသွားတယ်။ လေယာဉ်သွားပြီးတဲ့နောက် အဲဒီဘက်တွေကို လက်နက်ကြီးနဲ့  လှမ်းလို့ပစ်ပေးတယ်" ဟု ပြောသည်။

၎င်းပြင် ကျောက်တော် စခက (၉) မှလည်း ပီချောင်းဘက်ကို ညဉ့် ၁၂ နာရီ ၈မိနစ် ကစပြီး လက်နက်ကြီးများပစ်ခတ်ခဲ့ကြောင်း၊ များမကြာမီ လေယာဉ် ဂျက်ဖိုက်တာ ၂ စီး ရောက်ရှိလာပြီး  ပီချောင်းအထဲကတောင်တန်းထဲကို ပစ်ကြောင်း၊ လက်နက်ကြီးများကို ကျောက်တော်တပ်မကလည်း အဆက်မပြတ်ပစ်ခတ်ခဲ့ကြောင်း ဒေသခံ တစ်ဦးက ပြောကြားသည်။

ယခုကဲ့သို့ ညဉ့်အချိန် လေယာဉ်ပျံဝဲပြီး စစ်ကောင်စီတပ်ရင်းများက လက်နက်ကြီးများ ပစ်ခတ်ခဲ့မှုမှာ ရခိုင်လူထုကို အထိတ်တလန့်ဖြစ်အောင် ပြုလုပ်ခြင်းသာဖြစ်သည်ဟု ဒေသခံပြည်သူများ ပြောဆိုကြသည်။  (NN-12)