ကျောက်တော်တွင် စစ်ကောင်စီတပ် လက်နက်ကြီးဖြင့် ထပ်မံပစ်ခတ်

နိရဉ္စရာ၊ အောက်တိုဘာ ၁၄/၂၀၂၂

ရခိုင်ပြည်နယ်၊ ကျောက်တော်မြို့နယ်၊ ကန်စောက်အနီး အခြေစိုက်ထားသည့် ခမရ ၅၃၉ တပ်ရင်းမှ တိုက်ပွဲဖြစ်ပွားခြင်းမရှိပဲ လက်နက်ကြီးများဖြင့် ယနေ့ နေ့လယ်က ထပ်မံပစ်ခတ်ခဲ့သည်ဟု ဒေသခံများမှ သိရသည်။

အောက်တိုဘာလ ၁၄ရက်၊ ယနေ့ နေ့လယ် ၁၂နာရီ ၅၀မိနစ်ခန့်တွင်  ခမရ ၅၃၉ တပ်မှ အနည်းဆုံး လက်နက်ကြီး ၈ လုံးခန့် ရွက်မညှိုးတောင် တောင်ပေါ်သို့ ဦးတည်ပြီး ပစ်ခတ်ခဲ့သည်ဟု ဒေသခံတစ်ဦးကပြောသည်။

"တိုက်ပွဲဖြစ်တာတော့မရှိဘူး။ ဒီအတိုင်းပစ်နေတာ။ ရွက်မညှိုးတောင်တောင်ပေါ်မှာကျတယ်။ အဲ့ဒီဝန်းကျင်လောက်ကို ပစ်နေတာ။ ၈လုံးရှိပြီ" ဟု ပြောသည်။

ထိုသို့ နေ့လယ် ၁နာရီကျော်အထိ လက်နက်ကြီးစုစုပေါင်း ၈လုံးခန့် ပစ်ခတ်ခဲ့ပြီးနောက် ရပ်သွားခဲ့သည်ဟု  သိရသည်။

"၁နာရီကျော်အထိ ပစ်တယ်။ အားလုံး ၈လုံးရှိတယ်။ရွက်မညှိုးတောင်တောင်ပေါ်က စေတီအနီးအနားတွေမှာ ကျမယ်ထင်တယ်။ အဲ့ဒီတောင်ပေါ်ကိုပဲ ပစ်ခဲ့တာ" ဟု ဒေသခံတစ်ဦးကပြောသည်။

ပစ်ခတ်သည့် အကြောင်းအရင်းကို မသိရသေးသော်လည်း နေ့ညမပြတ် လက်နက်ကြီးများဖြင့် စစ်ကောင်စီတပ်က ပစ်ခတ်နေသဖြင့် ပြည်သူများအနေဖြင့် သွားလာလုပ်ကိုင်ရှာဖွေစားသောက်ရေးမှာ အခက်အခဲဖြစ်နေကြသည်ဟု ဆိုသည်။ (NN-12)