မြို့ပြင်ကျမထွက်ရဲဘဲ အရပ်သားများနေထိုင်ရာမြို့ထဲသို့ ဝင်ရောက်ပြီး လက်နက်ကြီး၊ လက်နက်ငယ်များဖြင့် နေ့စဉ်လိုလိုပစ်ခတ်နေသော စစ်ကောင်စီတပ်အပေါ် ရခိုင်ပြည်သူများ စိတ်ပျက်

နိရဉ္စရာ၊ အောက်တိုဘာ ၁၅/၂၀၂၂

မိမိတို့ တပ်ရင်း (သို့မဟုတ်) တပ်စခန်းထဲမှ ပြင်ပသို့ တစ်စုံတစ်ရာမထွက်ရဲဘဲ အရပ်သား ပြည်သူများနေထိုင်သော မြို့ထဲသို့ ကားများဖြင့်ဝင်ရောက်ပြီး နေ့စဉ်လိုလို လက်နက်ကြီး၊ လက်နက်ငယ်များဖြင့် ပစ်ခတ်နေသော မြန်မာစစ်ကောင်စီတပ်၏ လုပ်ရပ်အပေါ် စိတ်ပျက်မိကြောင်း ဒေသခံပြည်သူများက ပြောကြားသည်။

မြောက်ဦးဒေသခံတစ်ဦးက “  ဒီကနေ့ မနက် ၄ နာရီခွဲလောက်မှာ မြောက်ဦးမြို့ ကားဂိတ် အနီးဝန်းကျင်က  လက်နက်ကြီးသံ ၄ ချက်နှင့် လက်နက်ငယ်သံတွေ  အဆက်မပြတ်ကြားရတယ်။ ခုလို ပစ်ခတ်တော့ အနီးအနားဝန်ကျင်ကလူတွေ အကုန်လုံး အထိတ်တလန့်ဖြစ်ကြရတယ်။ အခုက စစ်သားတွေက နေ့တိုင်း ဧည့်စာရင်းစစ်တယ်။ လူတွေကို ဖမ်းတယ်ဆိုတော့ အေအေက တစ်ယောက်မှ မြို့ပေါ်မှာ မနေတော့ဘူး။ ဒါကို စစ်တပ်က နေ့တိုင်း ညတိုင်း မြို့ထဲကိုလာတယ်။ သေနတ်တွေ ပစ်တယ်။ လူထုကို အလိုလိုနေရင်း အကြောက်တရားဝင်အောင် ခြောက်လှန့်နေတယ်။ မြို့ပြင်ကျ တဖဝါးမှ မထွက်ရဲဘူး။ အရပ်သားတွေရှိတဲ့နေရာမှာဘဲ လာပြီးသေနတ်တွေ လာပစ်နေတယ်။ စစ်သားဘဲ။ သတ္တိရှိရင် မြို့ပြင် အေအေရှိတဲ့ နေရာသွားချပေါ့” ဟု ပြောသည်။

ယနေ့ နံနက် ၄ နာရီခွဲလောက်က စစ်ကောင်စီတပ်သားများသည် မြောက်ဦးမြို့ ကားဂိတ်နှင့်  ရဲစခန်းအနီးတွင် လက်နက်ကြီး ၄ ချက်လောက်နှင့် လက်နက်ငယ် အချက် ၁၀၀ ကျော်ကို တိုက်ပွဲဖြစ်ပွားခြင်းမရှိဘဲ ဦးတည်ရာမဲ့ ပစ်ခတ်ခဲ့သည်ဟု နောက်ထပ် ဒေသခံတစ်ဦးက ပြောသည်။

"သူတို့က ညဘက်တွေ မြို့ထဲကို ကားနဲ့ ပတ်ပြီးသွားပါတယ်။ ဒီနေ့တော့ မနက်အာရုဏ် ၅ နာရီ မထိုးခင်လေးမှာ တိုက်ပွဲဖြစ်တာမျိုးတော့မဟုတ်ပါဘူး။ သူတို့ အလိုလိုပစ်တာပါ။ သူတို့အနေနဲ့က ဒေသခံတွေကို အဓိကခြိမ်းခြောက်ချင်တဲ့သဘောလို့ပဲ မြင်ပါတယ်။ အလကားနေပြီး အခုလိုတွေ လုပ်နေတာဟာ ပြည်သူတွေ အိပ်ကောင်းခြင်းမအိပ်ရအောင်၊ စားကောင်းခြင်းမစားရအောင် တမင်ကိုလုပ်နေတာပါ"ဟု ၎င်းက ပြောသည်။

အလားတူ ကျောက်တော်မြို့တွင်လည်း မနေ့က တစ်ညဥ့်လုံး လက်နက်ကြီးဖြင့် ထပ်မံပစ်ခတ်ခဲ့သဖြင့်  ပြည်သူများ ကြောက်လန့်ခဲ့ရသည်ဟု ဒေသခံများက ပြောသည်။

ကျောက်တော် အခြေစိုက် စကခ (၉)၊ ကျောက်တော်တပ်မနှင့် စစ်ကောင်စီ တပ်ရင်းများ၊ ကင်းစခန်းချနေရာများက လက်နက်ကြီးများဖြင့် တစ်ညဥ့်လုံးပစ်ခတ်ခဲ့သည်ဟု ဆိုသည်။

"ကျောက်တော်တောင်ဘက်ကမ်းက ၃၇၅တပ်အလွန် တပ်မကပစ်တယ်။ ဒီဘက်ကမ်းအထိ မြေတွေတောင်တုန်တယ်။ ၁၀၈ မမ လက်နက်ကြီးနဲ့ ပစ်ပုံရတယ်။ ညဥ့်အချိန်ဆိုတော့ ပိုဆိုးတာပေါ့။ အသံတွေလည်း အရမ်းကျယ်တယ်။ အကုန်လုံး မအိပ်နိုင်ဖြစ်ကြရတယ်" ဟု ကျောက်တော်မြို့ခံ တစ်ဦးက ပြောသည်။

ထိုသို့လက်နက်ကြီးများဖြင့် ပစ်ခတ်ခဲ့၍ မြို့ခံပြည်သူများကြောက်လန့်ကာ အထိတ်တလန့် ဖြစ်ခဲ့ရသည်ဟုလည်း ဆိုသည်။

"ကလေးတွေကဆို ဒီလိုပစ်သံတွေ အရင်ကမကြားဖူးဘူး။ အခုမှကြားဖူးကြတာ။ ကြောက်ကြတယ်။ လူကြီးတွေဆိုလည်း ဒီလိုပစ်တာမကြုံဖူးတော့။ အကုန်လုံး အလန့်တကြားဖြစ်ကြရတယ်။ လူထုတွေကို ခြိမ်းခြောက်နေတာပါ။ တပ်ရင်းထဲကကျတော့ မထွက်ရဲဘဲ။ ခုလို အလိုလို ပစ်နေတော့ လူထုတွေကတော့ အရမ်းစိတ်ပျက်နေကြပါပြီ" ဟု မြို့ခံတစ်ဦးကပြောသည်။

ကျောက်တော်တွင် အရင်နေ့များကလည်း နေ့စဥ်ရက်ဆက်ဆိုသလို သေနတ်ပစ်၊ လက်နက်ကြီး ပစ်ခတ်မှုများရှိခဲ့သော်လည်း ညဥ့်အချိန် တစ်ညလုံးပစ်ခတ်ပြည်သူများက စိုးရိမ်မှုများ ရှိနေကြသည်ဟုလည်း သိရသည်။

ယခုကဲ့သို့ ပစ်ခတ်မှုကို မြောက်ဦး၊ ကျောက်တော် အပြင် ရသေ့တောင်၊ ဘူးသီးတောင်၊ မောင်တော၊ မင်းပြား၊ အမ်းမြို့နယ်ဘက်နှင့် ချင်းပြည်နယ် ပလက်၀မြို့နယ်တို့တွင် နေ့စဉ် ရက်ဆက်ပြုလုပ်နေပြီး ရခိုင်ပြည်သူများအား စိတ်ပိုင်း၊ ရုပ်ပိုင်းဆိုင်ရာ ထိခိုက်မှုဖြစ်အောင် စစ်ကောင်စီတပ်က ပြုလုပ်နေသည်ဟု ဒေသခံများက ပြောဆိုသည်။ (NN-7)

(ဓာတ်ပုံ- စစ်တွေမြို့ပေါ်တွင် ကင်းလှည့်နေသည့် စစ်ကောင်စီတပ်ကိုတွေ့ရစဉ်)