အိန္ဒိယနိုင်ငံရှိ ရခိုင်ဆရာတော်ကြီးဘဒ္ဒန္တ ဉာဏိဿရကိုအမှူးထား၍ ဘာသာမဲ့၅ဝဝ ကျော်ကို ဗုဒ္ဓဘာသာသို့ဝင်ရောက်

နိရဉ္စရာ၊ အောက်တိုဘာ ၁၆ / ၂ဝ၂၂

အိန္ဒိယနိုင်ငံ၊ ယူပီပြည်နယ်တွင်သီတင်းသုံးနေထိုင်သည့် ရခိုင်ဆရာတော်ဘုရားကြီး ဘဒ္ဒန္တဉာဏိဿရကိုအမှူးထား၍ ဘာသာမဲ့နှင့် ဘာသာခြားဦးရေ ၅ဝဝ ကျော်သည် ဗုဒ္ဓဘာသာအဖြစ်သို့ ကူးပြောင်းဝင်ရောက်ခဲ့ကြသည်ဟု သိရသည်။

အဆိုပါ ဝင်ရောက်ပွဲအခမ်းအနားကို အိန္ဒိယနိုင်ငံ၊ Maharashtra ပြည်နယ် Nagpur ခရိုင် Bina Jo Banega ဒေသတွင် အောက်တိုဘာလ ၁၄ ရက် မွန်းတည့် ၁၂ နာရီတွင် ပြုလုပ်ခဲ့ခြင်းဖြစ်သည်။

ယင်းအခမ်းအနားတွင် ဘာသာမဲ့နှင့် ဘာသာခြား အမျိုးသားဦးရေ ၂ဝဝ ကျော်နှင့် အမျိုးသမီးဦးရေ ၃ဝဝ ကျော်ကို ရခိုင်ဆရာတော်ဘုရားကြီး ဘဒ္ဒန္တ ဉာဏိဿရက ဗုဒ္ဓဘာသာအဖြစ်သို့ သွတ်သွင်းပေးခဲ့ခြင်းဖြစ်သည်ဟု ဆရာတော် ဘုရားကြီး၏တပည့်ဖြစ်သူ အရှင်ဦးသာဂရက နိရဉ္စရာကို မိန့်သည်။

"သူတို့က အရင် နှစ်ပေါင်း ၆ဝ လောက်ကနေ အဲဒီနေရာမှာ ဗုဒ္ဓဘာသာအဖြစ် ကူးပြောင်းခဲ့ပြီးပြီ။ ဒါပေမဲ့ ဗုဒ္ဓဘာသာဆရာတော်တွေက မရှိလို့ သူတို့တွေဟာ ဘာသာမဲ့လိုဖြစ်နေကြတာ။ အဲဒါကို ဦးဇင်းနဲ့ နောက်ထပ် ရဟန်း ၂ ပါးတို့က အဲဒီနေရာကိုသွားရောက်ပြီး ဆွမ်းခံကြွတယ်။ ရွာတွေကိုလှည့်ပြီးတော့ ဟောပြောစည်းရုံးတယ်။ ၁ နှစ်ပတ်လုံးစည်းရုံးခဲ့ရတယ်။ ပြီးတော့မှ ဗုဒ္ဓဘာသာကိုဝင်မဲ့သူဦးရေစာရင်းကိုကောက်ပြီး ဆရာတော်ကြီးကိုဆက်သွယ်လို့ ဆရာတော်ကြီးက အခုလို လက်ခံပြီး သူတို့တွေကို ဗုဒ္ဓဘာသာအဖြစ်သွတ်သွင်းပေးတာဖြစ်ပါတယ်"ဟု မိန့်သည်။

ယင်းကဲ့သို့ ဗုဒ္ဓဘာသာအဖြစ်သွတ်သွင်းပေးပြီးနောက် လူဦးရေ ၅ဝဝ ကျော်အနက် ၆၇ ဦးကို ရှင်ပြုပေးပြီး ၃ ဦးကို ရဟန်းခံပေးခဲ့သည်ဟု ဆိုသည်။

ဗုဒ္ဓဘာသာပျောက်ကွယ်လုနီးပါးဖြစ်နေသည့် အိန္ဒိယနိုင်ငံတွင် ဗုဒ္ဓသာသနာ ပြန်လည်လင်းလက်စေလိုသည့်ဆန္ဒကြောင့် ယခုကဲ့သို့ သာသနာပြုပေးရခြင်းဖြစ်သည်ဟုလည်း အရှင်ဦးသာဂရက နိရဉ္စရာကို မိန့်သည်။

"အခုလို လုပ်ပေးရလို့ ဂုဏ်လည်း ယူတယ်။ ဝမ်းလည်း သာပါတယ်"ဟု မိန့်သည်။

အိန္ဒိယနိုင်ငံတွင် ဟိန္ဒူဘာသာဝင် ၇၀ ရာခိုင်နှုန်း၊ မူဆလင် ၂၅ ရာခိုင်နှုန်း၊ ဗုဒ္ဓဘာသာဝင် ၃ ရာခိုင်နှုန်း၊ ဘာသာမဲ့နှင့် ခရစ်ယာန် ၂ ရာခိုင်နှုန်းရှိသည်ဟုလည်း အရှင်ဦးသာဂရက မိန့်သည်။

သက်တော် ၈၆ နှစ်ရှိပြီဖြစ်သော ဆရာတော်ဘုရားကြီး ဘဒ္ဒန္တ ဉာဏိဿရသည် ရခိုင်ပြည်နယ် မင်းပြားမြို့နယ်၊ ဇီးပင်ကြီးကျေးရွာဇာတိဖြစ်ပြီး အိန္ဒိယနိုင်ငံတွင် သီတင်းသုံးနေသည်မှာ နှစ်ပေါင်း ၆ဝ ခန့်ရှိပြီဟု သိရသည်။

ဆရာတော်ဘုရားကြီးသည် အိန္ဒိယနိုင်ငံတွင် ဗုဒ္ဓသာသနာထွန်းကားပြန့်ပွားရေးအတွက် စွမ်းစွမ်းတမံကြိုးပမ်းနေမှုကြောင့် အိန္ဒိယနိုင်ငံအစိုးရနှင့် ယခင်က NLD အစိုးရတို့၏ ဒေါက်တာဘွဲ့နှင့် အခြားဘွဲ့အများအပြားကို ဆက်ကပ်ပူဇော်ခံထားရသည့်ပုဂ္ဂိုလ်ဖြစ်သည်။

ဆရာတော်ကြီးသည် ပြီးခဲ့သည့်ဖေဖော်ဝါရီလ ၁၃ ရက်ကလည်း အိန္ဒိယနိုင်ငံရှိ ဘာသာမဲ့နှင့် ဘာသာခြား ဦးရေ ၅ဝဝ ဦးကို ဗုဒ္ဓဘာသာအဖြစ် သွတ်သွင်းပေးခဲ့သေးသည်။

ဆရာတော်ကြီးသည် လွန်ခဲ့သည့်နှစ်ပေါင်း ၅ဝ ခန့်ကပင် အိန္ဒိယနိုင်ငံအတွင်း ဗုဒ္ဓသာသနာထွန်းကားပြန့်ပွားရေးအတွက် သာသနာပြုနေသူဖြစ်ပြီး ယနေ့အထိ ဆရာတော်ကြီးက ဘာသာမဲ့နှင့် ဘာသာခြားဦးရေ ၁၀ သိန်းကျော်ကို ဗုဒ္ဓဘာသာအဖြစ် သွတ်သွင်းပေးခဲ့ပြီးပြီဟုလည်း သိရသည်။

ယင်းနေ့ကပြုလုပ်ခဲ့သည့် အခမ်းအနားသို့ အိန္ဒိယနိုင်ငံဆိုင်ရာ မြန်မာသံအမတ်ကြီး ဦးမိုးကျော်အောင်လည်း တက်ရောက်ချီးမြှင့်ခဲ့သည်ဟု သိရသည်။

ဓာတ်ပုံ - ဦးသာဂရ