နိရဉ္စရာ၊ အောက်တိုဘာ၂၇/၂၀၂၂

၇ခိုင်ပြည်၊ ကျောက်တော်မြို့၊စကခ(၉) စစ်ဆေးရေးဂိတ်တွင် တာဝန်ကျနေသည့် စစ်သားများက ကားများကို အချိန်အကြာကြီး စစ်ဆေးမှုများပြုလုပ်သောကြောင့်ယနေ့တွင် ရာနှင့်ချီရှိသည့်ကားများ ပိတ်နေခဲ့သည်ဟု သတင်းရရှိသည်။

ယနေ့ နံနက်က ကားပိတ်မိနေသည့်ဒေသခံတစ်ဦးက “ သူတို့က အလိုလို အချိန်ဆွဲပြီး ကားတွေကို စစ်ဆေးပါတယ်။ အဓိက ပညာပြတာပေါ့လေ။မင်းတို့ ဘာတတ်နိုင်လည်းဆိုတဲ့ သဘောမျိုးပေါ့။ မနက်က ၈ နာရီက ဂိတ်ရှေ့ကို ရောက်တဲ့ကားတွေကို တစ်နာရီလောက်ကြာမှ သွားခွင့်ပြုတယ်။ ကျနော်တို့ကား မနက် ၉ နာရီမှ ရောက်တာ၁၀ နာရီ ၁၅ မိနစ်လောက်မှ ထွက်ခွင့်၇ပါတယ်” ဟု ပြောသည်။

ထိုသို့ ကားများကို အချိန်ကြာကြီးစစ်ဆေးသဖြင့် စစ်တွေသို့ ဦးတည်ပြီးသွားသောကားများ၊ စစ်တွေမြို့မှ မြောက်ဦး၊ မင်းပြား၊ရန်ကုန်၊ မန္တလေးသို့ ထွက်ခွာလာခဲ့သော ကားများမှာ စကခ(၉) ဂိတ်ရှေ့ တွင် တန်းစီကာ ပိတ်မိနေခဲ့သည်ဟုဆိုသည်။

“ သူတို့က ဒီနေ့ အကုန်စစ်ပါတယ်။ခရီးသည်တင်ကား၊ အိမ်စီးကား၊ တုတ်တုတ်၊ ကားအကြီး၊ အသေးက အစ စစ်ပါတယ်။  သူတို့ကလည်း ခရီးသည်တွေ ဒုက္ခရောက်မှာ မစဉ်းစားပါဘူး။သူတို့အာဏာပြရဖို့၊ ပါဝါပြရဖို့ ဒီလောက်ဘဲစဉ်းစားတာပါ။ နေ့တိုင်း ဒီဒဏ်ကို ရခိုင်ပြည်သူတွေကခါးစည်းခံနေကြ၇တာပါ”ဟု ၎င်းက ပြောသည်။

ယခုကဲ့သို့ မလိုအပ်ဘဲ ကားများကိုအချိန်ကြာကြီးစစ်ဆေးခြင်းကြောင့် ခရီးသည်တင်ကားများ၊ နယ်ဝေးသို့ သွားလာသည့် ကုန်တင်ကားများမှာမလိုအပ်ဘဲ အချိန်ကြန့်ကြာသဖြင့် ပြည်သူများကို ထိခိုက်မှုဖြစ်သည်သာမက စီးပွားရေးအရနစ်နာမှုများရှိကြောင်း ကားသမားများက ပြောသည်။

မြန်မာစစ်ကောင်စီတပ်သည်ရခိုင်ပြည်သူလူထုအားနည်းမျိုးစုံဖြင့် စိတ်ပိုင်းဆိုင်ရာ၊ ရုပ်ပိုင်းဆိုင်ရာများကိုထိခိုက်အောင် တမင်ရည်ရွယ်ပြုလုပ်နေပြီး ယခုလုပ်ရပ်မှာ အပြည်ပြည်ဆိုင်ရာ လူ့အခွင့်အရေးကျေညာစာတမ်းအပိုဒ် ၁၃ ကို ချိုးဖောက်ရာရောက်ကြောင်း ရခိုင်လူ့အခွင့်အရေး ကာကွယ်မြင့်သူများအဖွဲ့ဒါရိုက်တာ ဦးမြတ်ထွန်းက ပြောသည်။

“ လွတ်လပ်စွာခရီးသွားလာခွင့်ကိုပိတ်ပင်ခြင်းဟာ အပြည်ပြည် ဆိုင်ရာလူ့အခွင့်အရေးကြေငြာစာတမ်း အပိုဒ် ၁၃ ကို ချိုးဖေါက်ရာရောက်ပါတယ်။ ဒါလည်း လူ့အခွင့်အရေးကို ချိုးဖေါက်ရာရောက်တဲ့အတွက် သာမန်အရပ်သားခရီးသွားပြည်သူတွေကို ခုလိုမျိုး တားဆီးပိတ်ပင်တဲ့ လုပ်ရပ်မျိုးကို စစ်ကောင်စီအနေနဲ့မပြုလုပ်သင့်ဘူးလို့ ပြောလိုပါတယ်”ဟု ဦးမြတ်ထွန်းက ပြောဆိုသည်။

စစ်ကောင်စီသည် ရခိုင်ပြည်သူပြည်သားများကို ရက္ခိုင့်တပ်တော်(AA) ကို ထောက်ခံရကောင်းလားဟုဆိုကာ နည်းမျိုးစုံးဖြင့်  ဖိနှိပ်မှုများပြုလုပ်နေကြောင်း ရခိုင်နိုင်ငံရေးသမား မြေပုံမြို့နယ်ပြည်သူ့လွှတ်တော်ကိုယ်စားလှယ်ဟောင်း ဦးဖေသန်းက လည်း များမကြာမီက နိရဉ္စရာသတင်းဌာနကိုပြောဆိုထားသည်။   ( NN-20)

(ဓာတ်ပုံ- ယနေ့ နံနက်ပိုင်းက ကျောက်တော်စခက(၉) ရှေ့တွင် ကားများရာနှင့်ချီပိတ်မိနေသည်ကို တွေ့ရှိ၇စဉ်)