တောင်ကုတ်မြို့နယ် မှိုဟင်းတောကျေးရွာမှ ဒေသခံတစ်ဦးကို စစ်ကောင်စီဖမ်းဆီးသွား

ရေးသူ: Web Master
| ရက်စွဲ: ၂၈ အောက်တိုဘာ ၂၀၂၂
| ကြည့်ရှုသူ: 8.3k

နိရဉ္စရာ၊ အောက်တိုဘာ ၂၈/၂၀၂၂

ရခိုင်ပြည်နယ်၊ တောင်ကုတ်မြို့နယ် မှိုဟင်းတောကျေးရွာမှ ဒေသခံအမျိုးသားတစ်ဦးကို စစ်ကောင်စီတပ်က ယနေ့ အောက်တိုဘာ ၂၈ ရက်၊ မွန်းတည့် ၁၂ နာရီခွဲခန့်တွင် ဖမ်းဆီးသွားခဲ့သည်ဟု သတင်းရရှိသည်။

ဖမ်းဆီးခံရသူမှာ တောင်ကုတ်မြို့နယ် ၊ မှိုဟင်းတောကျေးရွာ ချောင်းနားလမ်းနေ အသက် ၄၀ ကျော်အရွယ် ဦးသန်းထွန်းဖြစ်ပြီး ၎င်းသည် သင်္ဘောတွင် ပဲ့နင်းအဖြစ် လုပ်ကိုင်သူတစ်ဦးဖြစ်ကြောင်းသိရသည်။

၎င်းကို ယနေ့မွန်းတည့် ၁၂ နာရီခွဲခန့်က မှိုဟင်းတောကျေးရွာ ချောင်းနားလမ်းရှိ ၎င်း၏နေအိမ်မှ အရပ်ဝတ် စစ်ကောင်စီတပ်သား ၂၀ ခန့်မှ လာရောက်ဖမ်းဆီးသွားခြင်းဖြစ်ကြောင်း ၎င်းနှင့်နီးစပ်သူတစ်ဦးကပြောသည်။

"သူ့ကို စစ်ဆေးမေးမြန်းစရာရှိတယ်ဆိုပြီးတော့ သူ့အိမ်ကနေခေါ်သွားကြတာပါ။ အရပ်ဝတ်နဲ့စစ်သား ၂၀ လောက်ပါပါတယ်။ လက်နက်တွေလည်းပါပါတယ်။ ဘာအကြောင်းကြောင့်နဲ့ ဖမ်းခေါ်သွားတာလည်းတော့ မသိရပါဘူး" ဟု ပြောသည်။

ဖမ်းဆီးခံရသူ ဦးသန်းထွန်းအား တောင်ကုတ်အခြေစိုက် ခမရ ၃၄၆ တပ်ရင်းသို့ စစ်ကောင်စီတပ်သားများမှ ဖမ်းဆီးခေါ်ဆောင်သွားခြင်းဖြစ်ကြောင်း ဒေသခံများကပြောသည်။

လက်ရှိ ရခိုင်မှာ မင်းပြား၊ တောင်ကုတ်၊ ကျောက်တော်၊ ကျောက်ဖြူ၊ ရမ်းဗြဲ၊ မြောက်ဦး နှင့်တခြား မြို့နယ်များတွင်လည်း အပြစ်မဲ့ ဒေသခံအရပ်သားများနှင့် ပရဟိတသမားများ၊ လူမှုရေးလှုပ်ရှားသူများကို ဆက်တိုက်ဖမ်းဆီးမှုများရှိနေပြီး ဖမ်းဆီးခံထားရသူ ရာချီရှိလာနေပြီဖြစ်ကြောင်း သိရသည်။

(NN-8)