ဒုတိယဗိုလ်ချုပ်ကြီးဖုန်းမြတ်ဦးဆောင်သောမြန်မာစစ်ကောင်စီကိုယ်စားလှယ်အဖွဲ့ ဘင်္ဂလားဒေ့ရှ်ကာကွယ်ရေးဦးစီးချုပ်နှင့် ဒက္ကားတွင်တွေ့ဆုံ

နိရဉ္စရာ၊ အောက်တိုဘာ ၂၈/ ၂၀၂၂

ဒုတိယဗိုလ်ချုပ်ကြီး ဖုန်းမြတ် ဦးဆောင်သော အဖွဲ့ဝင် ၃ ဦးပါ မြန်မာစစ်ကောင်စီကိုယ်စားလှယ် အဖွဲ့သည် ဘင်္ဂလားဒေ့ရှ်ကာကွယ်ရေး ဦးစီးချုပ် ဗိုလ်ချုပ်ကြီး SM Shafiuddin Ahmad နှင့် အောက်တိုဘာ ၂၆ ရက်က ဘင်္ဂလားဒေ့ရှ်စစ်တပ်ဌာနချုပ်တွင် သွားရောက် တွေ့ဆုံခဲ့သည် ဘင်္ဂလာစစ်သတင်းများကို ဖော်ပြသည့် ISPR (Inter Service Public Relation Directorate) တွင် သတင်းဖော်ပြသည်။

ဆွေးနွေးပွဲတွင် ဘင်္ဂလားဒေ့ရှ် တပ်မတော် ကာကွယ်ရေး ဦးစီးချုပ်က နှစ်နိုင်ငံစစ်ဘက် ဆက်ဆံရေး ဖွံ့ဖြိုးတိုးတက်ရေး ဆိုင်ရာကိစ္စရပ်များနှင့် စပ်လျဉ်း၍ နှစ်နိုင်ငံ အဆင့်မြင့် တပ်မတော်အရာရှိကြီး များအား ပူးတွဲဆွေးနွေးဖလှယ်ခြင်း၊ စစ်ရေးဆိုင်ရာ လေ့ကျင့်သင်တန်းဖလှယ်ခြင်း၊ ပူးတွဲ သဘာဝ ဘေးအန္တရာယ် ဆိုင်ရာ စီမံခန့်ခွဲမှု နှင့် သက်ဆိုင်ရာ သတင်းအချက်အလက် ဖလှယ်ခြင်း စသည်တို့ကို ပူးပေါင်းဆောင်ရွက်ကြရန် တိုက်တွန်းခဲ့ပြီး  ဒေသလုံခြုံရေးကို ပူးပေါင်းလုပ်ဆောင်ရန် အာမခံခဲ့သည်ဟု ဆိုသည်။

 ၎င်းပြင် ဘင်္ဂလားဒေ့ရှ်ကာကွယ်ရေး ဦးစီးချုပ်က နေရပ်စွန့်ခွာသွားခဲ့ကြသည့် မြန်မာနိုင်ငံက ရောက်ရှိနေသည့် ဒုက္ခသည်ပြဿနာ အပါအဝင်  ဒေသဆိုင်ရာ ပြဿနာများ၊ များပြားလှသော မြန်မာနိုင်ငံက ထွက်ပြေးလာကြသည့် ဒုက္ခသည်များကို  အချိန်အကြာကြီး ထားရှိခြင်းကြောင့် ဖြစ်ပေါ်လာတဲ့ လုံခြုံရေးအန္တရာယ်များနှင့် မြန်မာနိုင်ငံထွက်ပြေးလာကြသည့် မူဆလင် ဒုက္ခသည်များ အမြန်ပြန်နိုင်ရေးအတွက် လုံခြုံရေးဆိုင်ရာကိစ္စများကို အလေးပေးပြောကြားခဲ့သည်။

ယခုအချိန်တွင် နယ်စပ်ဒေသများတွင် စစ်ရေးစစ်ဆင်ရေးများ လုပ်ဆောင်ရာတွင် ပိုမိုသတိထားရန် လိုအပ်ကြောင်း သတိပေးပြောကြားခဲ့သည်ဟု ပြောဆိုသည်။

မြန်မာကိုယ်စားလှယ်က ၎င်း၏နိုင်ငံတိုးတက်ရေးနှင့် လုံခြုံရေးအတွက် ဆောင်ရွက်လျက်ရှိပြီး နှစ်နိုင်ငံချစ်ကြည်ရင်းနှီးမှုနှင့် ဘင်္ဂလားဒေ့ရှ်နိုင်ငံနှင့်ပိုမိုဆက်သွယ်မှုမှတစ်ဆင့် နှစ်နိုင်ငံပြဿနာများကို ဖြေရှင်းရန် စိတ်ပါဝင်စားကြောင်း ဖော်ပြခဲ့သည်ဟု ဆိုသည်။

မြန်မာစစ်ကောင်စီကိုယ်စားလှယ်အဖွဲ့ကို ဦးဆောင်သည့် ဒုတိယဗိုလ်ချုပ်ကြီးဖုန်းမြတ်သည် အမှတ်(၃) စစ်ဆင်ရေး အထူးအဖွဲ့မှူးဖြစ်ပြီး ရခိုင်ပြည် စစ်ဆင်ရေးကို အဓိက ကွပ်ကဲနေသည့် စကစမှ အဆင်မြင့် စစ်ဗိုလ်ချုပ်တစ်ဦးဖြစ်ကြောင်း သိရသည်။

ယခုဆွေးနွေးပွဲနှင့်ပတ်သက်ပြီး  ISPR က ထုတ်ပြန်သည့် သတင်းတွင် ရခိုင်နယ်စပ်တွင် ဖြစ်ပွားနေသော တိုက်ပွဲများအရေးကိစ္စအပါအဝင် ရက္ခိုင့်တပ်တော်နှင့်ပတ်သက်ပြီး တစ်စုံတစ်ရာ ရေးသားဖော်ပြထားခြင်းမရှိပေ။

ဘင်္ဂလားဒေ့ရှ် တပ်မတော်ဌာနချုပ်တွင် မြန်မာကိုယ်စားလှယ်အဖွဲ့နှင့် တွေ့ဆုံမှုမှတစ်ဆင့် တပ်မတော်နှစ်ရပ်ကြား ဆက်ဆံရေးပိုမိုအားကောင်းလာကာ စစ်ရေးအရ ပူးပေါင်းဆောင်ရွက်ရန် ပိုမိုလွယ်ကူလာမည်ဟု မျှော်လင့်ကြောင်း သတင်းတွင် ဖော်ပြထားသည်။