နိ၇ဉ္စရာ၊ အောက်တိုဘာ၂၉/၂၀၂၂

စစ်တွေမြို့၊ နာဇီရွာ၊ စက်ရုံစုစစ်ဘေးရှောင်အကွက်မှဒေသခံ ၅ ဦးကို အောက်တိုဘာ၁၃ရက် ညည့်အချိန်က စစ်ကောင်စီပူးပေါင်းတပ်ဖွဲ့က ဖမ်းဆီးသွားခဲ့ပြီး  ၁၇ ရက် ကြာ ယနေ့ အချိန်ထိအဆက်အသွယ်မရရှိသေး၍စိုးရိမ်နေကြောင်း မိသားစုများကပြောသည်။

ဖမ်းဆီးခံလိုက်၇သူများမှာ စစ်တွေမြို့၊နာဇီရွာ၊ စက်ရုံစု၊ စစ်ဘေးရှောင်အကွက် (၂) တွင်နေထိုင်သည့် ဦးအောင်သန်းဝင်း၊ဦးသန်းကျော်လွင်(၄၀)နှစ်၊ဦးထွန်းဝင်းနိုင် အသက် (၃၀)နှစ်၊ဦးခင်မောင်ကျော်(၅၃)နှစ် နှင့် စစ်တွေမြို့နယ် ရွာသာယာကျေးရွာမှဦးမောင်သန်းဌေးတို့ဖြစ်ကြသည်။

ဖမ်းဆီးခံထား၇သူ ၅ ဦးအထဲကဦးသန်းကျော်လွင်နှင့်ဦးအောင်သန်းဝင်းတို့ နှစ်ဦးကို အောက်တိုဘာ ၁၃ရက်က ညဉ့်အချိန်၌ ရပ်ကွက်အတွင်းရှိသည့် ဘုန်းကြီးကျောင်းတွင်အိပ်နေစဥ်စစ်ကောင်စီ ပူးပေါင်းတပ်ဖွဲ့က ဖမ်းဆီးခေါ်ဆောင်သွားသည်ဟု ဦးသန်းကျော်လွင် ဇနီးဖြစ်သူကနိ၇ဉ္စရာ သတင်းဌာနကို ပြောသည်။

" ကျွန်မအမျိုးသားနဲ့အောင်သန်းဝင်း နှစ်ယောက်က ရပ်ကွက်က ဘုန်းကြီးကျောင်းမှာအိပ်ပါတယ်။ ဘုန်းကြီးကျောင်းမှာ အိပ်နေစဥ်မြန်မာစစ်တပ်နဲ့ ALP အဖွဲ့တို့ ပူးပေါင်းပြီးအင်အား ၅၀ ခန့်က  အဲ့ဒီကျောင်းကိုဝိုင်းပြီးတော့ ညည့်အချိန် ၁၁နာရီ ခွဲက ဖမ်းသွားတာပါ။ သီးသန့်ထောက်လှမ်းရေး ပါမှာပေါ့။ အခုအချိန်ထိလုံး၀သတင်းအစအနမရသေးပါဘူး။ဘယ်မှာရှိနေတယ်ဆိုတာကိုလည်း သိချင်ပါတယ်" ဟုပြောသည်။

အဆိုပါနေ့ ညည့်အချိန်က ဦးခင်မောင်ကျော်နေအိမ်ကိုလည်းစစ်ကောင်စီတပ် အင်အား၂၀ ကျော်ခန့်က၀င်ရောက်ပြီး ဦးခက်မောင်ကျော်အားရိုက်နှက်ပြီးခေါ်ဆောင်သွားပြီး၊ဖုန်း ၂လုံးနှင့် အိမ်မွေးကြက်၂ကောင်ကိုလည်း ဖမ်းယူသွားခဲ့သည်ဟု ဇနီးဖြစ်သူကပြောသည်။ 

" ညည့်၁၁နာရီလောက်မှာ ကျွန်မတို့အိမ်ပေါ်ကို တက်လာပြီးတော အိမ်တံခါးတွေကို သေနတ်နဲ့ ထုပြီးဖျက်ဝင်လာကြပါတယ်။ အိမ်ထဲက တံခါးတွေကိုလည်းကန်ကျောက်လို့ဝင်လာပြီးဖမ်းတာပါ။ ကျွန်မနဲ့သမီးတွေကိုလည်းတွန်းကန်ပြီးဝင်ပါတယ်။ ကျွန်မအမျိုးသားက ကျန်းမာရေးလည်း မကောင်းပါဘူး။ သူတို့ ရိုက်နှက်ပြီး ခေါ်သွားတာပါ။ စစ်တပ်နဲ့ ALPတို့ပူးပေါင်းပြီး အင်အား ၂၀ ကျော်ခန့် ပါပါတယ်။ကျန်းမာရေးလည်း မကောင်းတော့ အမြန်ဆုံးအိမ်ကို ပြန်ရောက် စေချင်ပါတယ်။ ကျွန်မ အမျိုးသားဖုန်းနဲ့သမီးဖုန်း၊ ဖုန်း ၂ လုံးစလုံးယူသွားပါတယ်။အိမ်က ကြက် ၂ကောင်လည်း ပိုက်ဆံတပြားမှမပေးဘဲ ဖမ်းယူသွားပါတယ်"ဟုပြောသည်။

၎င်းအတူ နာဇီရွာ၊စက်ရုံစု၊စစ်ဘေးရှောင်အကွက် (၂)က ဦးထွန်းဝင်းနိုင်ကိုလည်း ညည့်အချိန် ၁၁နာရီခန့်တွင်နေအိမ်ကိုဝင်ရောက်ပြီး စစ်တပ်က အကြောင်းပြချက်မရှိ ရိုက်နှက်ဖမ်းဆီး ခေါ်ဆောင်သွားကြောင့်ဦးထွန်းဝင်းနိုင်ဇနီးက နိရဉ္စရာသတင်းဌာနကို ပြောသည်။

"  စစ်သားတွေနဲ့  ALP  ကလူတွေ ညည့်၁၁နာခွဲလောက်က အိမ်ကိုကန်ကျောက်ပြီးဝင်လာပါတယ်။ ကျွန်မတို့ကိုအိပ်နေတဲ့နေရာက ဆွဲချပြီးကျွန်မကိုလည်းရိုက်ပါတယ်။ကျောကုန်းကိုလည်းကန်ပါတယ်။ လည်ဂုတ်ကိုလည်းဖိနပ်စီးထားတဲ့ခြေထောက်နဲ့ နင်းထားပါတယ်။ ပြီးရင်အိမ်ပေါ်က အိုး၊ခွက်၊ ဆန်ထုပ်၊ပစ္စည်းတွေကို အားလုံးကို မွှေပြီးဖြိုဖျက်သောင်းကျန်းသွားပါတယ်။ပြီးရင် အမျိုးသားကိုလည်း သေနတ်နဲ့ ကျာကုန်းနဲ့ရင်၀ကို ထုရိုက်ပြီးတော့ နောက်ပြန် လက်ထိတ်ခတ်ပြီး ဖမ်းသွားပါတယ်။ ကျွန်မအမှာကိုယ်ဝန်နဲ့မို့လို့ လုပ်မစားနိုင်ပါဘူး။ သူလုပ်ကျွေးနေတာပါ။ အမျိုးသားကို ဘယ်မှာ ဖမ်းထားလဲဆိုတာလည်းသိချင်ပါတယ်။အမြန်ဆုံး အိမ်ကို ရောက်စေချင်ပါတယ် " ဟုပြောသည်။

ယခုဖမ်းဆီးမှုတွင် ရခိုင်ပြည်လွတ်မြောက်ရေးပါတီ  (ALP) မှတပ်ဖွဲ့ဝင်များ ပါဝင်ကြောင်း အမျိုးသမီး ၃ ဦးစလုံးက ပြောဆိုသဖြင့် ALP ပြောခွင့်၇သူ ဒုဗိုလ်မှူးကြီးကျော်ဇောကို ဆက်သွယ်မေးမြန်းရာ သူတို့တပ်ဖွဲ့ အနေဖြင့် စစ်ကောင်စီနှင့် ယခုလို လုပ်ရပ်မျိုးပူးပေါင်းလုပ်ဆောင်ခြင်း မရှိကြောင်းနှင့် ALPကိုနာမည်ဖျက် အပုတ်ချလို၍ ပြောဆိုခြင်းသာဖြစ်ကြောင်း ပြောဆိုသည်။

“ ဒီကိစ္စနဲ့ပတ်သတ်ပြီး ကျွန်တော်တို့အခုအချိန်ထိ စစ်ကောင်စီတပ်နဲ့ ပူးပေါင်းတာမရှိသေးပါဘူး။ ဒီဒေသခံ၅ယောက်ကို ဖမ်းဆီးထားတာလည်းပါဝင်ဆောင်ရွက်တာ မရှိပါဘူး။သက်သက် ကျွန်တော်တို့ ပါတီကို နာမည်ဖျက်  အပုတ်ချချင်တဲ့အတွက် စိတ်အထင်နဲ့ ပြောဆိုတာဖြစ်ပါတယ်။ ဒီလို မတရားသဖြင့် စွပ်စွဲမှုတွေ မကောင်းပါ။ ကျွန်တော်တို့က ပြည်သူတွေကို မိဘနေရာမှာထားပြီး၊ တပ်ဖွဲ့တွေကိုသားသမီးနေရာမှာထားထားတာပါ" ဟု နိ၇ဉ္စရာကို ပြောဆိုသည်။

အဆိုပါ ဖမ်းဆီးခံ၇သူ ၅ ဦးနှင့် ပတ်သက်ပြီး စစ်တွေအမှတ်(၁) ရဲစခန်းကို ဆက်သွယ်၍ မရသလို ပြည်နယ်ရဲမှူးကြီး သက်လွင်လည်း ဖုန်းလက်ခံ ဖြေဆိုခြင်းမရှိပါ။

လက်ရှိတွင်ဖမ်းဆီးခေါ်ဆောင်သွားသည့် ၅ဦးနှင့် မိသားစုဝင်များမှာ တစ်စုံတစ်ရာ သတင်းအစအန မရရှိသေးသောကြောင့် အလွန်စိုးရိမ်မှုများရှိနေကြပြီး၊ပြန်လည်လွှတ်ပေးရန် မိသားစုများကတောင်းဆိုနေကြသည်။ (NN-13)