တနင်္လာ၊ ဇူလိုင်လ ၁၅ရက်၊ ၂၀၂၄

ကန်စောက်တပ်ရင်း ၅၃၉မှ ပစ်ခတ်သည့်လက်နက်ကြီးကျည် နေအိမ်နှစ်ဆောင်ကိုထိမှန်ပြီး နဝမတန်းကျောင်းသူ ၁ဦးထိခိုက်ဒဏ်ရာရရှိ


  • ရေးသူ: Web Master
  • | ရက်စွဲ: ၃၀ အောက်တိုဘာ ၂၀၂၂
  • | ကြည့်ရှုသူ: 8.9k

နိရဉ္စရာ၊ အောက်တိုဘာ ၃၀/၂၀၂၂

ကျောက်တော်မြို့နယ်၊ ကန်စောက်အခြေစိုက် စစ်ကောင်စီတပ်ရင်းအမှတ် (၅၃၉) တပ်ရင်းက ယမန်နေ့ညက ပစ်ခတ်လိုက်သည့် လက်နက်ကြီးကျည်တစ်လုံးသည် လူနေရွာထဲ ကျရောက်ပေါက်ကွဲ၍ အိမ် ၂ လုံးပျက်စီးကာ နဝမတန်းကျောင်းသူ ၁ဦး ထိခိုက်ဒဏ်ရာရှိသွားသည်ဟု သိရသည်။

လက်နက်ကြီးကျရောက်ပေါက်ကွဲ၍ ပျက်စီးသွားခဲ့သည့် အိမ်နှစ်ဆောင်မှာ ကျောက်တော်မြို့နယ်၊ ဆင်မကျော်(ခမီ)ကျေးရွာမှ ဦးလှမောင်၊ ဦးအောင်အောင်ဌေးတို့၏ နေအိမ်များဖြစ်ကြပြီး ဒဏ်ရာရသွားသည့် န၀မတန်းကျောင်းသူမှာ ဦးတင်ညွန့်မောင်၊ ဒေါ်စန္ဒာဝင်းတို့၏ သမီး မဆန်းဆန်းဝင်း(၁၅)နှစ် ဖြစ်ကြောင်း သိရသည်။

ဒေသခံ တစ်ဦးက  မနေ့က ညအချိန် ၈ နာရီလောက်မှာ ကန်စောက်တပ်ရင်း ၅၃၉ ကနေ လက်ကြီးကျည် တစ်လုံးတည်းပစ်တာပါ။ အဲဒါ ဆင်မကျော်ကျေးရွာထဲကိုကျပါတယ်။ အိမ်နှစ်ဆောင်ရဲ့ ခေါင်းမိုးက ဇကာပေါက် ဖြစ်သွားပါတယ်။ ညစာကျက်နေတဲ့  ကိုးတန်းကျောင်းသူ မဆန်းဆန်းဝင်းရဲ့  လက်နှစ်ဖက်မှာ လက်နက်ကြီးကျည်စတွေ ထိမှန်ဒဏ်ရာ ရရှိသွားခဲ့ပါတယ်ဟု ပြောကြားသည်။

ကျောက်တော်မြို့နယ်၊ ကန်စောက်အခြေစိုက် ခမရ ၅၃၉တပ်မှ ယမန်နေ့ အောက်တိုဘာလ ၂၉ ရက်နေ့၊ ည ၈နာရီအချိန်ခန့်တွင် လက်နက်ကြီး ၁ချက်ပစ်ခတ်ခဲ့ပြီး ၎င်းလက်နက်ကြီးကျည်သည် ကျေးရွာထဲသို့ ကျရောက်ပေါက်ကွဲခဲ့သည်ဟု ဒေသခံများကပြောသည်။

"မနေ့ညက ပစ်လိုက်တဲ့ လက်နက်ကြီးကျည်က သံဖြူခေါင်မိုးတွေနဲ့ အခန်းတွေပျက်စီးသွားတယ်။ ကျောင်းတက်နေတဲ့ နဝမတန်းကျောင်းသူတစ်ယောက်က စာကျက်နေတဲ့ အချိန်မှာ ကျည်စတွေက သူ စာကျက်နေတဲ့ နေရာအထိ လွှင့်စဉ်လာပြီး ကျည်စတွေလာထိတာပါ" ဟု ဆင်မကျော်ကျေးရွာမှ နောက်ထပ်ကျေးရွာသားတစ်ဦးက ပြောသည်။

လက်နက်ကြီးကျည်စထိမှန်၍ ထိခိုက်ဒဏ်ရာရှိသွားသည့် နဝမတန်းကျောင်းသူ မဆန်းဆန်းဝင်းကို ကန်စောက် ကျေးလက်ကျန်းမာရေးဌာန၌ကုသလျှက်ရှိကာ အသက်အန္တရာယ် စိုးရိမ်စရာမရှိဟု သိရသည်။

ကျောက်တော်တွင် ယမန်နေ့ အောက်တိုဘာ ၂၉ ရက်၊ နေ့လယ် ၂ နာရီခန့်က တိုက်ပွဲဖြစ်ပွားခြင်းမရှိပဲ ဒရုန်းလွှတ်ပစ်ခတ်မှုကြောင့် ကျောက်တော်မြို့နယ်၊ ရုပ်သားကျေးရွာမှ မြိုင်ဟေဝန်ကျောင်တိုက်တွင် ကျောင်းခေါင်းမိုးအပါအဝင်အပျက်အစီးတချို့ရှိခဲ့သည်။(NN-12)

ဆက်စပ် သတင်းများ