သံတွဲမြို့နယ်၊ ရွာရှည်ကျေးရွာအုပ်ချုပ်ရေးမှူးကို ထွေအုပ်အစည်းအဝေးမှအပြန်တွင် မျက်နာဖုံးစွပ်ထားသူ ၅ ဦးကသတ်ဖြတ်သွား

နိရဥ္စရာ၊ နိုဝင်ဘာ ၃/ ၂၀၂၂

ရခိုင်ပြည်နယ်၊ သံတွဲမြို့နယ်၊ ရွာရှည်ကျေးရွာအုပ်ချုပ်ရေးမှူးကို မြို့နယ်ထွေအုပ်အစည်းအဝေးမှ ဆိုင်ကယ်ဖြင့်အပြန် အိမ်ပြန်လမ်းတွင် မျက်နာဖုံးစွပ်ထားသူ ၅ ဦးကသတ်ဖြတ်သွားခဲ့သည်ဟု သတင်းရရှိသည်။  

အသတ်ခံရသည့် ကျေးရွာအုပ်ချုပ်ရေးမှူးမှာ အသက် ၆၀ကျော်အရွယ် ဦးမောင်သန်းတင် ဖြစ်သည်ဟုသိရသည်။

၎င်းသည် နောက်ထပ် အတူးကျေးရွာအုပ်ချုပ်ရေးမှူးနှင့်အတူ သံတွဲမြို့နယ်ထွေအုပ် အစည်းအဝေးတက်ပြီး ဆိုင်ကယ်နှင့်ရွာကို ပြန်သည့်အပြန်လမ်းတွင် လူ ၅ဦးက ဓါးဖြင့်ခုတ်သတ်သွားခဲ့သည်ဟု ကျေးရွာအုပ်ချုပ်ရေးမှူးနှင့် နီးစပ်သူတစ်ဦးက နိရဉ္စရာသတင်းဌာနကိုပြောဆိုသည်။

“ ထွက်ပြေးလွှတ်မြောက်လာတဲ့ အုပ်ချုပ်ရေးမှူးက ပြောလို့သိရတာ။ ဖြစ်တာက အောက်တိုဘာ ၃၁ရက်နေ့ကတည်းက ဖြစ်တာပါ။  ရွာရှည်ကျေးရွာက အုပ်ချုပ်ရေးမှူး နဲ့ အတူးကျေးရွာ အုပ်ချုပ်ရေးမှူးတို့ ၂ဦးတို့ ထွေအုပ်မြို့နယ်ရုံးက အစည်းအဝေးတက်ပြီး ဆိုင်ကယ်နဲ့ ရွာကို ပြန်လာစဉ် အပြန်လမ်းမှာ မျက်နာဖုံးစွပ်ထားတဲ့ လူ ၅ ဦးက ထွက်လာပြီး ဓါးဖြင့် ခုတ်သတ်လိုက်တယ်။ တစ်ခါတည်း သေတယ်။ နောက်တစ်ယောက် အုပ်ချုပ်ရေးမှူးက ထွက်ပြေးလွှတ်မြောက်သွားပါတယ်”  ဟု ပြောသည်။

ဦးမောင်သန်းတင်၏ နာရေးအား ၎င်း၏ ကျေးရွာတွင် ယမန်နေ့က ပြုလုပ်ခဲ့သည်ဟု သိရသည်။

အသုဘကို သွားရောက်ခဲ့သူ တစ်ဦးက " အတူး အုပ်ချုပ်ရေးမှူး ပြောတာက ရွာရှည်ကျေးရွာက အုပ်ချုပ်ရေးမှူး ၂ယောက် ထွေအုပ်ရုံးကို အစည်းအဝေးသွားတက်လို့ ဆိုင်ကယ်တစ်စီးကို နှစ်ယောက်အတူ စီးပြီး ပြန်လာတာမှာလို့ ပြောတယ်။ ရွာရှည်ကျေးရွာ အုပ်ချုပ်ရေးမှူးက ရှေ့က ထိုင်ပြီး မောင်းတယ်။ အတူး အုပ်ချုပ်ရေးမှူးက အနောက်ကပေါ့။ အဲဒီလိုပြန်လာတဲ့ အခါ  အပြန်လမ်းမှာ လူငါးယောက်က ထွက်လာတယ်။ သေနတ်တော့မပါဘူးလို့ပြောတယ်။ ဓါးတွေနဲ့ တိုက်ခိုက်တယ်။ လည်ပင်းကို ဝက်အူလှည့်နဲ့ ထိုးသတ်လိုက်တာဖြစ်ပါတယ်။ အဲဒီမှာ သေတာ " ဟုပြောသည်။

သံတွဲခရိုင် ဆေးရုံမှ တာဝန်ကျ ဆရာဝန်တစ်ဦးကလည်း အောက်တိုဘာ ၃၁ ရက်နေ့ကဖြစ်ကြောင်း၊ ရက်အနည်းငယ် ကြာပြီဖြစ်ကြောင်း၊ ၎င်းအခင်းဖြစ်ပွားပြီးနောက် သေဆုံးသူတစ်ဦး ဆေးရုံကို စစ်ဆေးရန် လာပို့ခဲ့ကြောင်း ပြောဆိုသည်။